Hosee'i 11
11
Doono Yeeri Israꞌeeleenaꞌon Shuno
1Doono Yeeri ishichiye: “Israꞌeelin batt busha bi beetaa shunnehoye;
ta bushoonoo Gibitsee ceeggehoye.#Key. 4:22-23; Maat. 2:15
2Tunebaani Israꞌeeli woddii ta ceeggemmona,
woddiiꞌi ta waanee wokkiye.
Ta asheenaꞌoo Baꞌaaloyich deejjoon deejjiyeete;
shahalleenaꞌoyichoo ixaanoon shookkiyeete.
3Efreemin haattaa, bi shaꞌemmoyich tuniito taane;
ta sheenooch tiqqeto taane;
tunebaani boonoshin wodiito ta tunoon ariyaaneenaꞌone.
4Asho ariqqoommon ariqqaꞌa woderoona,
shunee woderoonoo boonoshin ta waan yaabiyoye;
boonoshi waanjoon kettiihoye;
yittaꞌaanoo boonoshich maanjiyoye.
5“Ta waan wotto boonoshi qajjitoyich Gibits wottemminaꞌone. Asooree taatoo boonoshin hajjemmone. 6Boonoshi katemeenaꞌooch gino woyemmone; katemee kellee tuggeenaꞌonoo aalliyemmone; boonoshi gonde gaboochee tiyitona boonoshin maayemmone. 7Ta asheenaꞌo ta waanee bara wottoon qaawiyeete; gaachee danoyichoo damba cookiyeete; tunebaani boonoshin gaachemmo koniyoona aalloone.
8Efreemo, aabichiree neen duppehote?
Israꞌeelo, aabichiree neen beshii immehote?
Adiimaa ta tuniitoommon aabichiree ne toommooch tuniyehote?
Tseboyimaa ta tuniitoommon aabichiree ne toommooch tuniyehote?
Ta mullo ta maacoochaa qewetone;
taanoo ariqqichitone.#Yibba. 29:23
9Ta kaaree shiixxoon ne toommooch kindiyaachemmo taane.
Efreemin wochinnoon aalliyaachemmo taane.
Ebiyoo boonoshi daggooch beeti,
Yaafe Nuggishoo ta tunetoyich,
asho tuno ta qajjetoyichiye.
Naxoona ne waan waataachemmo taane.
10“Doono Yeeri taan dabbemminaꞌone. Tawoo daaheroochoommon gigemmo taane. Ta gigemmona ta bushiisheenaꞌo aabi-gimo waanee qewebee woyemminaꞌone. 11Qewebee Gibitsee kafoochoommon, Asooree showoocheenoo uggechoommon, woyemminaꞌone. Tawoo boonoshi kexooch boonoshi beeyemmoyich tuniyemmo taane” iye Doono Yeeri.
Yeeri Israꞌeeleenaꞌonaa Yihudee Asheenaꞌonon Ittibato
12Doono Yeeri ishichiye: “Efreemi kootoona, Israꞌeelee yareenaꞌoo maroona taan giichiyeete. Yihudi, Nuggishoyich hajjeyaano, gibeneeti Yaafe Nuggishoon shixxii beetone.
Currently Selected:
Hosee'i 11: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
