Hiziqeeli 39
39
Googi Kochee Dihoo
1“Andoo ashi bushoocho, Googi toommooch keemoon ishichi keembe: ‘Nuggishoo Doono Yeeri ishichiye: Mesheekinaa Tubaalinochi iraashoo tuneti Googo, ta ne toommooch tiyeto taane. 2Neen gubb wochi dambi-waani wohi showoochee gashe deebiree, koyoyich Israꞌeelee guudinaꞌooch daachiyemmo taane. 3Ne yooche kishoochee maꞌoon yexxemmo taane; ne qanne kishoochee shangoon holliyemmo taane. 4Neennaa ne ginee naayinaꞌo bullina, neenna tookkii beeti asheenaꞌoo Israꞌeelee guudinaꞌooch dihemmo ittoshine; shimaajji gacoonaa kubbi cooxonoyich maayoon tuniiree ne meenon immemmo taane. 5Xalle gaddooch dihemmo neene; ebiyoo Nuggishoo Doono Yeeri ta gettetoyichiye. 6Magooginaa baharee gasheexi showooch keqqaalloon kotetinaꞌonochi toommooch qaaqqoon kindiyemmo taane; ebina Doono Yeeri ta tunoon ariyemminaꞌone.
7“ ‘Yaafe ta shigo ta asheenaꞌo tuneti Israꞌeeleenaꞌochi daggooch arichemmoyich tuniyemmo taane; ebiyee bekk yaafe ta shigo naakkemmoyich tuniyaachemmo taane; aageteenaꞌo Doono Yeeri ta, Israꞌeelee Yaafoo ta tunoon ariyemminaꞌone. 8Waa beetone; iberoochaa tunemmone iyaꞌa Nuggishoo Doono Yeeri ta getteti aabo ebine.
9“ ‘Israꞌeelee katemooch beetinaꞌo hamiree ginee qiiceenaꞌon qaaqqoona michemminaꞌone; ooge gaachoonaa giishi gaachoonon, maꞌoonaa shangoonon, ginoonaa yeelloonon qaaqqooch gediree shabaatte naton shookkemminaꞌone. 10Ginee qiicoonalli boonoshi shookkemmo kubboochee michi mito woyee shaaroochee mixon kuxo boonoshich qaawiyaachemmone; wonna boonoshin boggitinaꞌonaa keccitinaꞌonon and bogi keccemminaꞌone; Nuggishoo Doono Yeeri ta ebin getteto taane.
Googichi Maasho
11“ ‘Ebiyooba Israꞌeelee showoochee baharoochaa aabi-keyo waanee, gommechinaꞌochi bamboochee, Googich maashee xaaꞌoon immemmo taane; biyoo beshe kaattoon bayi deqqemmone; arooch Googinaa dofee bi asheenaꞌo bullina duukkeyemminaꞌone; ebi bamboo Hamoon Googi#39:11 Hamoon Googi geto, “Dofee Googi asheenaꞌo” getone. getaa ceekkemmone.
12“ ‘Israꞌeelee macceenaꞌo shabaatte agenee wottoon boonoshi dubenoon duuhiree showoon xalliyemminaꞌone. 13Showee asheenaꞌo bulliyoo boonoshin duukkemminaꞌone; ta oogoon ta bekkiyemmi aabooba Israꞌeeleenaꞌoyich oogoon tunemmone; Nuggishoo Doono Yeeri ta, ebin getteto taane.
14“ ‘Duukkeyaanoon echetinaꞌon guudi duukkemmi asheenaꞌo kaacceyemminaꞌone; boonoshiyoo showee toommooch echetinaꞌon guudi duuhiree showoon xalliyemminaꞌone; shabaatte agenee ciirooch guudi qaawemminaꞌone. 15Showee toommooch boonoshi guudi beetaa, boonoshi daggoochee ikkoo shaawushoon bi beegigaata, oppoon iijjii beetinaꞌo Hamoon Googi bambooch boonoshi duukkimmi wottoon malletoon geddemmone; 16ebina showoon xalliyemminaꞌone. Ebi xaaꞌooch Hamooni katemee beetine, itone’ gete.
17“Ashi bushoocho, shimaajji gaco bullinaa kubbi cooxonoyich ishichibe: ‘Israꞌeelee guudinaꞌoochaa ittoshich ta qanniiti ooge deejjee gifirooch, meenon mamonaa damoon uyonoyich bulli xaaꞌoochee kiceeree wobote. 18Bashaani showeexi awujjiti ogooge bagee baaddoonaa gishiishi bagee baaddoonochi, emmishoonaa gubbenoonochi meenon mamoommon giidechinaꞌochi meenon maayemmo ittoshine; iraasheenaꞌochi damoonoo uchemmo ittoshine. 19Ittoshich ta qanniiti deejjee gifiroochee ittoshi michimmi wottoon awuyon maayemmo ittoshine; ittoshi mashemmi wottoon damoon uchemmo ittoshine. 20Ittoshi michimmi wottoon, ittoshich ta giddiiti madoochee hareshoonaa hareshechinaꞌonochi meenon, giidechinaꞌonaa ginee naayinaꞌo bullinochi meenon maayemmo ittoshine, iye Nuggishoo Doono Yeeri’ gete.#Yaaꞌo. 19:17-18
Israꞌeeleenaꞌo Boonoshi Showooch Wotto
21“Ta oogoon aageteenaꞌo daggoochaa bekkiyemmo taane; aageteenaꞌo bulliyoo ta nalliti nalloon, boonoshi toommooch ta tiijjiti ta mochoon beeggemminaꞌone. 22Ebiyee bekk Israꞌeelee macceenaꞌo Doono Yeeri ta, boonoshi Nuggishoo ta tunoon ariyemminaꞌone. 23Aroochee Israꞌeelee macceenaꞌo kecaa hammito boonoshi axaaxee naboona bi tunoon aageteenaꞌo ariyemminaꞌone; taan boonoshi xuqqitoyich, tawoo ta aafoon boonoshiyee badd wochiyoye; boonoshi etteenaꞌoyichoo beshiyaꞌa immehoye; boonoshi bulliyona goraadoona dihiyeete. 24Boonoshi eeꞌooyich, boonoshi xuꞌoyichoo bede mooyon boonoshi toommooch tuniihoye; ta aafoonoo boonoshiyee badd wochiyoye.
25“Ebich Nuggishoo Doono Yeeri ta ishichiibeeto taane: And Yaaqobichi kecoon wochemmo taane; Israꞌeelee maccoo bullich ariqqemmo taane; yaafe ta shigoyich qanaatemmo taane. 26Boonoshin shatiyemmo aalloon boonoshi showooch diggoona boonoshi kotehooba, boonoshi cooneyoonaa taach gibeneyaano boonoshi tunoonon battemminaꞌone. 27Macceenaꞌo daggoochee boonoshin wochii ta deebiyooba, boonoshi etteenaꞌochi showoochee boonoshin ta kiciyooba meeti aageteenaꞌo aafoochaa boonoshina ta yaafittinoon bekkiyemmo taane. 28Kecaa aageteenaꞌo showooch boonoshi hammemmoyich ta tuniitaanona, koninolla arooch echiyaanoon kecoochee boono hajjee showooch wochii deebeto, boonoshi Nuggishoo Doono Yeeri ta tunoon ariyemminaꞌone. 29Ta Ayaanoon Israꞌeelee macceenaꞌochi toommooch ta woniitoyich, ebiyee bekk ta aafoon boonoshiyee badd wochaachemmo taane; Nuggishoo Doono Yeeri ebin getteto taane” iye.
Currently Selected:
Hiziqeeli 39: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
