Hiziqeeli 38
38
Googi Yeerichi Ginee Qiico Tuno
1Doono Yeeri taach ishichiye: 2“Ashi bushoocho, ne aafoon Magoogi showooch beeti Mesheekinaa Tubaalinochi iraashoo Goog waan wochiichi bi toommooch keemoon keembe; 3biich ishichibe: ‘Nuggishoo Doono Yeeri ishichiye: Mesheekinaa Tubaalinochi iraashoo Googo, ne toommooch tiyeto taane. 4Ne gammooch qamaaxiroon gediree neen, ne ginee naayinaꞌon, ne haresheenaꞌonaa ne hareshechinaꞌonon, koyooba taheebeeti tahoon tahetinaꞌo bullin, ooge gaachoonaa giishi gaachoonon yechiton, goraadoonoo yechito bullin gubb wochemmo taane. 5Faariisi, Topphiyoonaa Fuuxinochi asheenaꞌona, gaachoon kalletinaꞌonaa xuuree ukoon uketinaꞌo bulli boonoshina tookki tunemminaꞌone; 6Gomeerinaa bi ginee naayinaꞌo bullina, dambi-waan wohooch beeti Beet Togariminaa bi ginee naayinaꞌo bullina, wottoo meeti asheenaꞌo neenna tookkii beetinaꞌone.
7“ ‘Neennaa ne guudoona kiceetinaꞌona qannibote; newoo boonoshi ukkiroon tunebe. 8Meeti yemeenoyee gubb ceekkemmo neene; gubbi natinaꞌooch koyoona tiisheechii batt qaalliibeeti Israꞌeelee showoon kochemmo neene. Ebi showoo, bi asheenaꞌo meeti aageteenaꞌo daggoochee kicaa waa, meeti yemeenoon shokko echeti Israꞌeelee guudinaꞌooch koteti showoone; boonoshiyoo aageteenaꞌo daggoochee waaꞌi, and bulliyona diggoona arooch kotetinaꞌone. 9Newoo yubee yongoochoommon waaree kochemmo neene; neennaa ne ginee naayinaꞌo bullina, neenna tookkii beeti meeti asheenaꞌoo showoon quboochoommon guuppemmo ittoshine.
10“ ‘Nuggishoo Doono Yeeri Googich ishichii beetone: Ebiyooba mooyon gabooch giyemmo neene; gonde yamoonoo yamemmo neene; 11newoo ishichemmo neene: “Gayaalli gafeenaꞌooch damba kechemmo taane; uxeraalli, kelloonaa tuggoona aalli katemeenaꞌooch keqqaalloon diggoona beetinaꞌochi toommooch dihemmo taane. 12Keccemmo taane; boggemmo taane; aageteenaꞌo daggoochee waati, and asho koteti shokkaache showeexinaꞌochi toommooch, gijjeenaꞌonaa qiiceenaꞌona boonoshich beeti, showee gutte daggooch koteti asheenaꞌochi toommooch ta kishoon yaggemmo taane” gettemmo neene. 13Sheebinaa Dedaanina, Tarisheshee giixechinaꞌonaa bi gafeenaꞌo bullina neech ishichemminaꞌone: “Kecoon daamma waanne? Bogoon ne boggemmoyich, birewoonaa aachoonon daamoyich, gaare gijjoonaa qiicoonon wodde kecoon daamoyich, meeti ne asheenaꞌon kicinne?” gettemminaꞌone, itone’ gete.
14“Ebich ashi bushoocho, Googi toommooch ishichi keemoon keembe; Nuggishoo Doono Yeeri ishichiye: ‘Ta asheenaꞌo tuneti Israꞌeeleenaꞌo diggoona boonoshi beehooba, ne tiyemmo neene. 15Dambi-waan wokkiꞌi beeti xaaꞌoochee, neenna tookkii beeti, boonoshi bulliyona hareshoon yebbeti, beelloo tuneti, meeti asheenaꞌona tookki woyemmo neene. 16Showoon guuppiibeeti quboochoommon ta asheenaꞌo tuneti Israꞌeeleenaꞌochi toommooch woyemmo neene; Googo, gubbi yemeenooch ta showoon ne kochemmoyich neen deebemmo taane; ebiyoo neenna ta yaafittinoon boonoshi aafoochaa ta bekkiihooba, aageteenaꞌo taan ariyemmoyichiye.
17“ ‘Nuggishoo Doono Yeeri ishichiye: Boonoshin kocha neen deebemmo ta tunoon wonnee yemeenooch ta guuninaꞌo tuneti Israꞌeelee keemechinaꞌo wodde naton keemmiti asho ne toono neene?’ itone gete” iye.
Googi Toommooch Yeeri Deebemmi Naxo
18Nuggishoo Doono Yeeri ishichiye: “Googi Israꞌeelee showoon bi koyiyooba, ta kaaro cufemmone; 19ebiyooba Israꞌeelee showooch, oogeti showee qewo tunemmo bi tunoon ta qanaatoona, ta neboonoo getteto taane. 20Bahareexi haasheenaꞌo, shimaajji kafeenaꞌo, kubbi cooxinaꞌo, yuummere halleenaꞌo, showee toommooch beeti asheenaꞌo bulli ta aafoochaa qewemminaꞌone; guudinaꞌo guufemminaꞌone; qaaꞌeenaꞌo shekiremminaꞌone; xaqqee uxereenaꞌo dihemminaꞌone. 21Ta guudinaꞌo bulliichee Googi toommooch goraadoo kaacheyemmoyich tuniyemmo taane, iye Nuggishoo Doono Yeeri. Asho bullichi goraado bi nuuchoon maayemmone. 22Biiyoona, bi damoon ukkoonoo bi toommooch nallemmo taane; yattoon, xaqqoommi baderoon, qaaqqoonaa waageroonon, biinnaa bi ginee naayinaꞌonochi, wottoo biinna tookkii beeti meeti asheenaꞌochi toommooch kindiyemmo taane. 23Ebina ta oogoonaa ta yaafittinoonon bekkiyemmo taane; meeti aageteenaꞌoyichoo taan arichiyemmo taane; aroochee ta, Doono Yeeri ta tunoon ariyemminaꞌone.
Currently Selected:
Hiziqeeli 38: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
