Hiziqeeli 3
3
1Biyoo taach ishichiye: “Ashi bushoocho, neech giddeti ebi qoddeti macaafoon mame; aroochee hami Israꞌeelee macceenaꞌoyich gete” iye.
2Ebich ta kookkoon gaxxiyo; biyoo qoddeti macaafoon taach qapphiihe. 3Aroochee taach ishichiye: “Ashi bushoocho, ebi neech ta immeti qoddeti macaafoon cokke maaree ne maacoon ceechibe” iye. Tawoo aroon maaho; ebiyoo ta kookkooch eeyochoommon shaawiye.#Yaaꞌo. 10:9-10
4Aroochee taach ishichiye: “Ashi bushoocho, tiyiree Israꞌeelee macceenaꞌo waan hambe; ta qaaroonoo boonoshich gete. 5Ne wocheebeeto Israꞌeelee macceenaꞌo waanalli boonoshi yibbaatoo giyaanoonaa aricheyaanoona tuneti dallaaweenaꞌo waan toonoone. 6Boonoshi yibbaatoo maggoo, boonoshi noonoo aricheyaano, boonoshi qaaro neech giyaano tuneti aageteenaꞌo waan neen daachiyaano taane; eboshi waan neen ta daachiito gaata, neechon waayeshinaꞌone. 7Tunebaani Israꞌeelee macceenaꞌo getaa giyaaneenaꞌonaa babbereenaꞌona boonoshi tunetoyich ta getoon waayoyich daaggaaneenaꞌone; neechonoo waayeyaachemminaꞌone. 8Ebiyoche ta neen boonoshiyoommi yitaanoonaa mulli manjoonon tuniito taane. 9Ta neen shiishe xaqqoyee beshoon kuppho tuniito taane; hukkechinaꞌo boonoshi tunetaanoona boonoshich shattaahine; boonoshi sheexoyichoo keqqiyaahine” iye.
10Daakkiꞌinoo taach ishichiye: “Ashi bushoocho, neech ta gettemmi ta qaaro bullin elle waayeree ne mullooch gede. 11Hamiree kecooch beeti ne asheenaꞌoyich gete; boonoshi waayetaa woyee waayo qajjitaa ‘Nuggishoo Doono Yeeri ishichiye’ gete” iye.
12Aroochee Yeerichi Ayaano kaama taan tiijjiye; ta gubbaanoo “Doono Yeerichi oogo bi xaaꞌoochaa diireebe” iibee gigeebeeti qaaroon waayeho. 13Ebiyoo kashechi halleenaꞌochi qoshoo biinnaa biinna tepheyee qaaro, wottoo gigee qaaroommi boonoshi gaꞌooch beeti gengeenaꞌochi guubbee qaaroone. 14Ayaano taan kaama tiijjiꞌi daammiye; tawoo caammeyoona, ippee gaameyoonoo hammo; Doono Yeerichi giidoo ta toommooch kupphehe. 15Telabiib, Kebaari aachi gashooch koteti keceenaꞌo waan waaho; ebi mooyona keqqoona arooch boonoshi daggooch shabaatte qemon koteho.
Hiziqeelin Qayecho Tuniiꞌi Yeeri Ukkiriyoo
16Shabaatte qemi ciirooch Doono Yeeri taach ishichiye: 17“Ebich ashi bushoocho, neen Israꞌeelee macceenaꞌochi qayecho tuniito taane; ebich ta qaaroon waayebe; neech ta gettemmi qaaroona boonoshin meeqqeqqiibe. 18Gonde ashoon ‘Iberoochaa qitemmo neene’ ta getaa, ne biin meeqqeqqiyoo ne qayigaata, bi gondoochee wotteree bi kashoon bi wodiyemmoyich meeqqeqqiyoo ne qayigaata, ebi axaaxechi uro bi axaaxoona qitemmone; tunebaani bi damoon ne kishoochee qaawemmo taane. 19Tunebaani gonde ashoon ne meeqqeqqiichaa bi axaaxoochee woyee bi gondee gommoochee wotto bi qayigaata, biyoo bi axaaxoona qitemmone; tunebaani ne, ne kashoon wodiyemmo neene.
20“Cadiqe asho bi cadiqittinoochee wotteꞌi gondoon bi shuunegaata, tawoo bi aafooch xugoon ta kotiigaata, aroo qitemmone; ebiyoo ne biin meeqqeqqiyaano ne tunetoyich bi axaaxoona qitemmone; bi shuuneti cadiqittinoo gabeyaachemmone; bi damoon ne kishoochee qaawemmo taane. 21Tunebaani cadiqe ashoon axaaxoon bi shuuneyaachemmoyich ne meeqqeqqiitaa biyoo axaaxoon shuuno bi qayigaata, ne meeqqeqqiyoon bi waayetoyich iberoochaa kashoona beeyemmone; newoo ne kashoon wodiyemmo neene” iye.
Hiziqeelichi Heciyoo Tippeyoo
22Arooba Doono Yeerichi giidoo aroochaa ta toommooch beetone; biyoo taach ishichiye: “Tiyiree yimaane showooch hambe; aroochaa neech gettemmo taane” iye.
23Tawoo tiyaꞌa are yimaane showooch hammo; ebiyoche Kebaari aachi gashoochaa ta beeggeti oogee yiiroommi Doono Yeerichi oogee yiiroo arooch neexeꞌi beete; tawoo baroona showooch guufeho.
24Tunebaani Yeerichi Ayaano ta maac giyiꞌi ta baatoona taan neechiye; aroochee taanna yibbaateꞌi taach ishichiye: “Hambe; ne kexooch giyiichi ne kelloon hice. 25Ashi bushoocho, woderoona cucheyemmo neene; boonoshina cucheyemmo neene; ebich ashi daggooch hamon hakkaachemmo neene. 26Ta ne heciyoon ne digaanoona xaaqqemmo taane; newoo eciya tippo tunemmo neene; boonoshi hukkechi asheenaꞌo boonoshi tunetoyich, boonoshin kaaro hakkaachemmo neene. 27Tunebaani neenna ta yibbaatehooba ne heciyoon biichemmo taane; newoo boonoshich: ‘Nuggishoo Doono Yeeri ishichiye’ gettemmo neene. Hukkechi macceenaꞌo boonoshi tunetoyich waayemmo waayebe; waayoon qajjimmo qaye” iye.
Currently Selected:
Hiziqeeli 3: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
