Hiziqeeli 27
27
Xiroosich Shoosheeti Shoosho
1Doono Yeeri taach ishichiye: 2“Ashi bushoocho, Xiroosich shooshebe. 3Baharee gashooch beeti meeti asheenaꞌona tookkii giixeebeeti, baharee gimooch koteti Xiroosich, Nuggishoo Doono Yeeri ishichiye, gete:
‘Xiroose, “Oogeti malletechi taane” iti neene.
4Ne daaro baharee daggoochiye;
neen shuunetinaꞌo neen malletiiꞌi shuunetinaꞌone.
5Ne shaaqqeenaꞌo bullin Seniiree ciidoona shuunetinaꞌone;
ne giimboon shuunoyich
Libanoosee yigee mixon deebiyeete.
6Bashaanee meellee mixinaꞌoochee
aachi yooppe ne madelloon shuuneheete;
ne godo shuuneeto Qoophiroosee
ciidee shaaqqoonane;
bi guudo dangeyi gashoona shuuneetone.
7Ne markabeechi sharo,
baanderoochoommon wohoochaa bi bekkemmoyich,
shashiitaa bi toommooch shippeti Gibitsee waati muttee tuppoochee shippeti qoreddoochee shuuneetone;
ne maccillaateenaꞌo Elishee buure showeexi
dameroonaa shimaayitoona tuneti qoreddoochee shuuneetinaꞌone.
8Ne markabee gashechinaꞌo,
Sidoonee asheenaꞌonaa Arwaadee asheenaꞌonane.
Xiroose, ariyechi asheenaꞌo ne daggooch beetinaꞌone;
eboshiyoo ne markabee iraasheenaꞌone.
9Ne daggooch beeti ariyechi Gebaalee geeneenaꞌo
ne tiishoon qeerii beetinaꞌone;
markabechinaꞌo bulli markaboona ne waan waaꞌi,
neenna tookkii giixee beeheete.
10“ ‘Faariisee, Luudee, wottoo Fuuxee waati ginee naayinaꞌo ne ginee naayinaꞌo daggooch beetinaꞌone; boonoshi gaachoonaa xuuree ukoonon ne gafooch kaqqitinaꞌone; boonoshi neech oogoon daniitinaꞌone. 11Arwaadee asheenaꞌonaa Heleekee asheenaꞌona ne uxeree toommooch guudoona beetinaꞌone; Gamaadee asheenaꞌoo ne dilaalooch beetinaꞌone; boonoshi gaachoonoo ne xaqqee uxeree guudoona kaqqitonaꞌone; neenoo malletechi tuniitinaꞌone.
12“ ‘Ne gaannee woddoochee tiyitona, Tarisheshee asheenaꞌo neenna tookkii giixee beeheete; birewoonaa xuuroonon, shombeqoonaa budoonon deebii bare qiicoona shaddii beeheete.
13“ ‘Yawaanee, Tubaalinaa Mesheekinoochee waatinaꞌo neenna tookkii giixee beeheete; guuninaꞌonaa gooshee qiiceenaꞌonon bare qiicoona neech shaddii beeheete.
14“ ‘Beet Togarimi asheenaꞌo haresheenaꞌon, ginee haresheenaꞌonaa bicereenaꞌonon qiicoona neech shaddii beeheete.
15“ ‘Dedaanee asheenaꞌo neenna tookkii giixee beeheete; baharee gasheexi showeenaꞌo ne gabiyee godeenaꞌone; boonoshiyoo ne waanee qiicoon kemoyich dangeyi gashoonaa aaꞌi kupphe mixonon deebii beeheete.
16“ ‘Wodde qiico neech bi beetoyich, Sooriyee asheenaꞌo neenna tookkii giixee beeheete; ne qiiceenaꞌonoo maarigidoona#27:16 Maarigido, aaxxe xaqqee shigoone., damere tahoona, bi toommooch shashiitaa shippeti qoreddoona, muttee tuppoochee shippeti qoreddoona, dooqoona, wottoo ceelle inqoona shaddii beeheete.
17“ ‘Yihudinaa Israꞌeelina neenna tookkii giixee beeheete; Minitee showee teepphoon, shaawi mooyon, eeyon, zayitoonaa huutoonon qiicoona neech shaddii beeheete.
18“ ‘Ne gaannoonaa qiicee woddoonoochee tiyitona, Damaasiqee asheenaꞌo Heliboonee woyinoonaa Zahaaree bagee huushoonon deebona neenna tookkii giixee beeheete.
19“ ‘Wedaanee asheenaꞌonaa Yawaanee asheenaꞌona Uzaalee waaꞌi neenna tookkii giixee beeheete; ukkaa shuuneeti xuuroon, gaawe cinnechi michi goroon, qimaamoon qiicoona shaddii beeheete.
20“ ‘Dedaanee asheenaꞌo koree gilaashoon deebona neenna tookkii giixee beeheete.
21“ ‘Arabeenaꞌonaa Qedaaree iraasheenaꞌo bullina bagee bushiishoon, bagee baaddoonaa emmishee baaddoonon deebona neenna tookkii giixee beeheete.
22“ ‘Sheebi giixechinaꞌonaa Raꞌiimi giixechinaꞌona neenna tookkii giixee beetinaꞌone; gaawe qimaamo bullin, aaxxe xaqqo bullinaa aachoonon neenna tookkii giixee beeheete.
23“ ‘Haraani, Kanaahinaa Edeninochi katemee asheenaꞌo, Sheebee giixechinaꞌo, Ashuurinaa Kilimaadinochi katemee asheenaꞌoo neenna tookkii giixee beeheete. 24Eboshi neenna tookkii gaaweti taheenaꞌon, shimaayite taheenaꞌon, shashechi qoreddoon, showooch yaggeebeeti shagoon, gaawichaa mujjeeti woderoona gaawichii cuchiꞌi neenna tookkii giixee beeheete. 25Tarisheshee ogooge markabeenaꞌo ne qiicoon qaccii beeheete.
“ ‘Newoo baharee daggoochaa
giixee qiicoona ceenneti neene.
26Ne markaboon gasheebeetinaꞌo ooge baharooch neen deebiyeete;
aabi-keyo waani yongo neen baharee daggooch tiichiye.
27Ne gaanno, ne qiico, ne giixo,
ne markabechinaꞌo,
markabee maddechinaꞌo,
markaboon shuunechinaꞌo,
ne giixechinaꞌo, ne daggooch beeti ne ginee naayinaꞌo bulli,
ne daggooch beeti ne asheenaꞌo bulli, ne aallehooba,
baharee daggooch qoochemminaꞌone.
28Markabechinaꞌochi cookoochee tiyitona
baharee gashooch beeti showeenaꞌo qewemminaꞌone.
29Markabee gashechinaꞌo,
markabechinaꞌo, markabooch beetinaꞌo bulli,
markaboochee kindiree showooch neexemminaꞌone.
30Buttoon boonoshi qellooch shahibee,
tulloochoo gederebee,
neech oogichi cooki eeppemminaꞌone.
31Boonoshi qelloon cakkemminaꞌone;
dookoon tahemminaꞌone;
oogichii ayinoona, boonoshi kashoon caammeree,
neech eeppemminaꞌone.
32Neech ayini eefibee,
ishichi neech shooshemminaꞌone:
“Baharee daggooch aallee echeti,
Xiroosiyoommo koni beete?” gettemminaꞌone.
33Ne giixee qiico baharoochee bi waahooba,
meeti asheenaꞌon michiiti neene;
ne gaannoona wottoo ne giixee woddoona
showee toommeexi taateenaꞌon gaanniiti neene.
34Tunebaani and baharee daggooch tiisheti neene;
baharee daggooch qoocheti neene;
ne giixee qiicoonaa ne asheenaꞌona,
neenna tookkii qoochetinaꞌone.
35Baharee gashooch beeti asheenaꞌo bulli,
ne naboona keqqitinaꞌone;
boonoshi taateenaꞌo oogichii shattitinaꞌone;
shatona boonoshi aafo niretone.
36 Aageteenaꞌo daggooch beeti giixechinaꞌo
ne toommooch shokketinaꞌone;
ne ciiro keqqichito tunetone;
ebiyee bekk daneyaachemmi neene’ gete” iye.
Currently Selected:
Hiziqeeli 27: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
