Hiziqeeli 26
26
Xiroosi Toommooch Keemmeti Keemo
1Kecee no hammeti aaraa ikkinnee natooba, agenee ikkinnee qemooba Doono Yeeri taach ishichiye: 2“Ashi bushoocho, Xiroosi Yerusaalemi toommooch ishichitine: ‘Usha, macceenaꞌo giyiibeeti kellee tiishetane; bi gifeenaꞌoo wogallimiꞌi taach qecheetinaꞌone; bi tiishetoyich ta oogemmi taane’ itine.
3“Ebich Nuggishoo Doono Yeeri ishichiye: ‘Xiroose, ne toommooch tiyeto taane; baharo aachi aayon shuurikkii bi tiijjoommon, neen koyoyich meeti aageteenaꞌon tiijjemmo taane. 4Xiroosi xaqqee uxereenaꞌon happemminaꞌone; bi dilaaleenaꞌonoo tiichemminaꞌone; shokke xaqqo echemmi wottoon showoon hidiree aalliyemmo taane. 5Asheenaꞌo boonoshi dabboon shuuꞌiibeeti, baharee daggooch beeti xaaꞌoon tunemmine; Nuggishoo Doono Yeeri ta ebin getteto taane. Aageteenaꞌo biin boggemminaꞌone. 6Inde bi showooch beeti bi asheenaꞌo goraadoona guureyemminaꞌone; ebina Doono Yeeri ta tunoon ariyemmine’ iye.#Yoꞌeel. 3:4-8; Amo. 1:9-10
7“Ebich Nuggishoo Doono Yeeri ishichiye: ‘Dambi-waanee, taateenaꞌo taatoo, Baabloonee taatoo Nabukadinatsorin haresheenaꞌonaa gaarinaꞌona tookki, hareshechinaꞌonaa dofee ginee naayinaꞌona tookki Xiroosi toommooch deebemmo taane. 8Inde showooch beeti ne asheenaꞌon goraadoona wuxemmone; neen kocha ne guudoona giichemmone; ne uxeree cillooch beddaahaa showoon gutemmone; gaachoon ne toommooch tiijjemmone. 9Uxeroon happemmi qiicoona ne uxereenaꞌon happemmone; bi qiicoona ne dilaaloon happemmone. 10Bi haresheenaꞌo meetoochee tiyitona boonoshi quttoo neen qeremmone; asho tiisheti xaqqee uxerechi katemooch bi gimoommon, aroo ne uxeree kelloona bi giyiyooba, haresheenaꞌochi, ginee gaarinaꞌonaa bare gaarinaꞌonochi qaaroochee tiyitona ne uxereenaꞌo qewemminaꞌone. 11Bi hareshechinaꞌo hareshoona ne gomminaꞌo bullin koteree, goraadoona ne asheenaꞌon wuxemminaꞌone; kupphe ne giimbeenaꞌo showooch dihemminaꞌone. 12Ne gaannoon keccemminaꞌone; ne giixee qiicoon boggemminaꞌone; ne xaqqee uxeroon dichemminaꞌone; ne emiriibeeti ne kexinaꞌon happemminaꞌone; ne xaqqeenaꞌon, ne mixinaꞌonaa ne buriceenaꞌonon baharee daggooch duppemminaꞌone. 13Ne duubbi dulloon cicirikkaayemmo taane; ne ooge ximbee qaaro ebiyee bekk waayeyaachemmone. 14Shokkaache xaqqoon neen tuniyemmo taane; haashe yesheenaꞌo boonoshi dabboon ichiibeeti xaaꞌoon tunemmi neene; ebiyee bekk wochinnoon shuuneyaachemmi neene; ebiyoo Doono Yeeri ta gettetoyichiye’ iye Nuggishoo Doono Yeeri.
15“Nuggishoo Doono Yeeri Xiroosich ishichii beetone: ‘Mayetinaꞌo maacerehooba, ne daggoochaa asho wuxeehooba, ne dihee qaaroochee tiyitona baharee gasheexi showeenaꞌo shuuraacheheete? 16Baharee gasheexi taateenaꞌo boonoshi taatee qeenoochee kindemminaꞌone; toommeexi boonoshi tahoonoo shoottemminaꞌone; shashechi boonoshi tahoon kichemminaꞌone; boonoshi qellich keqqoon taheree showooch kotemminaꞌone; kuxaanoon qewebee ne toommooch shaggitona geewemminaꞌone. 17Ishichiree ne toommooch shooshemminaꞌone:
“Baharee toommooch giidechi,
ne asheenaꞌona ne guudoona beetinaꞌo bullin shatiibeeti,
aricheti katemeene,
aabichaꞌa baharoochee aallenne!
18Illa ne dihee aabooba
baharee gasheexi showeenaꞌo qewemminaꞌone;
baharee daggooch beeti buure showeenaꞌo
ne aalloochee tiyitona geewemminaꞌone”
geti shooshemminaꞌone’ iye.
19“Nuggishoo Doono Yeeri ishichiye: ‘Ashaalli shokkaache katemoommon neen ta tuniihooba, ooge aacon ne toommooch ta deebiyooboo aaco neen guuppemmone. 20Wonnee asheenaꞌo beetooch, maash neen daachiyemmo taane; ne daggooch beeyemmo bi daneyaachemmoyich, oppooch kindii beetinaꞌona tookki wonna happeeti xaaꞌooch, deshi showooch ne beeyemmoyich tuniyemmo taane; ebich ashi beeyi xaaꞌoon tuneyaachemmi neene; kashechinaꞌochi showooch neech xaaꞌoo daneyaachemmone. 21Ne ciiroon keqqichito tuniyemmo taane; ebiyee bekk beetaachemmi neene; qaaweyemmi neene; tunebaani ciroona daneyaachemmi neene, iye Nuggishoo Doono Yeeri’ ” iye.
Currently Selected:
Hiziqeeli 26: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
