Hiziqeeli 17
17
Booyonaa Woyinee Qomboonochi Shaahiyoo
1Doono Yeeri taach ishichiye: 2“Ashi bushoocho, turitebe; Israꞌeelee macceenaꞌoyich shaahiyoona yibbaatebe. 3Boonoshich, Nuggishoo Doono Yeeri ishichiye, gete: ‘Ogooge qoshoonaa genje wulloona biich beeti ikke xuphaaxuphe ooge booyo Libanoos yoobbii waaꞌi, yigee michi waamon yechiye. 4Bi cilloonoo tiichiꞌi giixechinaꞌochi showooch daammiye; daammiꞌi giixechinaꞌochi katemooch kotiihe.
5“ ‘Aroochee Israꞌeelee showoochee yaroon daammiye; daammiꞌi wodde aaco beeti qeemi showooch bechiye. 6Bi collehooba qamini wottoo dengich gafgappiti woyinoon tunehe; bi ateenaꞌoo ebi booyo waan wotteꞌi dicciyeete; bi cammoo dugilla gaawichii dicciye. Ebi woyino waajjee ateꞌi woyinee qomboon tunehe.
7“ ‘Aroochee wotta ogooge qoshoonaa wodde huushoona biich beeti bare ooge booyo beehe; ebi woyinee qomboo aacon danoyich bi cammon ebi booyo waan awurehe; bi atoonoo bi waan yaggiye. 8Tunebaani ebi woyino bi becheeto bi atemmoyich, bi aafemmonaa gaawe woyinoon bi tunemmonoyich, wodde aaco beeti gaawe showoochiye’ gete.
9“Nuggishoo Doono Yeeri ishichiye, gete: ‘Ebi woyino diccehe? Aafi booyo cammona waaxi, bi aafoon shekiriree, nolle bi waamoo shoollemmoyich tuniyaachehe? Biin cammona waaxoyich kupphe mochoo woyee meeti asho qaawiyaachemmone. 10Ebi woyino becheyoon becheetone; tunebaani dicon hakkehe? Aabi-keyo waani yongo biin yexiyooba ciroona shoollaachehe? Bi becheeti tagoochaa shoollaachehe?’ itone gete” iye.
Shaahiyeechi Biisho
11Aroochee Doono Yeeri taach ishichiye: 12“Hukkechi macceenaꞌoyich ishichibe: ‘Ebi moochi biisho amo gaata ariyaachote? Ebiyoche, Baabloonee taatoo Yerusaalem waaꞌi bi taatoonaa bi iraasheenaꞌonon Baabloonee showooch bi waan daammitone. 13Taatee yaroochee ikkoon daammiꞌi biich gibeneeto bi tunemmoyich wogiiꞌi, biinna tookkii wogoon giyiye; biyoo wotta aricheti asheenaꞌonoo keccii daammiye. 14Ebin bi tuniito, ebi taatee showoo yittemmoyich, wochinnoon qaallaanoon biinna tookkii geddeti wogoon manjii bi quyemmoyichiye. 15Tunebaani Yihudee taatoo bi toommooch hukkeꞌi haresheenaꞌonaa meeti ginee naayinaꞌonon bi danemmoyich wocheyechinaꞌon Gibits daachiihe. Biich kaamehe? Ebiyoommi mooyon tuniimmi asho muriccehe? Wogoon happiichi muricon hakkehe?#2 Taat. 24:15-20; 2 Kiin. 36:10-13
16“ ‘Beeyecho ta tunoona wogehoye, iye Nuggishoo Doono Yeeri: Wogoon bi qallayiti, biinna tookkii bi giyiti wogoon bi happiti, biin taatiiti taatoo beeti xaaꞌoochaa, Baabloonaa qitemmone. 17Baablooneenaꞌo meeti asheenaꞌon aalliyoyich showoon boonoshi gutiyoobinaa mishigoon boonoshi shuunehoobina, Farooni, giidechi bi ginee naayinaꞌonaa dofee koyechinaꞌona tookkii waaꞌi biin gaachoon hakkaache. 18Bi giyiti wogoon happoona wogoon bi qallayitoyich, kishoon bi immitoyee gubb ebi bullinoo bi tuniitoyich, muricaachemmone’ gete.
19“Ebich Nuggishoo Doono Yeeri ishichiye: ‘Beeyecho ta tunoona wogehoye: Bi qallayiti ta wogo, bi happiti ta wogo, biin yechemmoyich tuniyemmo taane. 20Ta dabboona biin dabbe yechemmo taane; Baabloonee showooch biin daammemmo taane; taach gibeneyoo bi qajjitoyich aroochaa bi toommooch nallemmo taane. 21Aricheti bi ginee naayinaꞌo bulli goraadoona dihemminaꞌone; aroochee echemminaꞌo kaatti kaatta shacemminaꞌone; ebin getteto Doono Yeeri ta tunoon ariyemmo ittoshine’ iye.
Yeeri Gibenikkiti Gibeno
22“Nuggishoo Doono Yeeri ishichiye:
‘Genje yigee michi toommoochee,
ta qelloona cilloon daami kotiyemmo taane.
Aree cilloochee ikke nolloon haxxemmo taane;
genje, ooge guudi toommooch bechemmo taane.
23Ta bechemmo genje, ooge Israꞌeelee guudi toommoochiye;
biyoo atemmone; aafemmone; aricheti yigoon tunemmone;
bi baatoochoo kafeenaꞌo kashemminaꞌone;
bi ateenaꞌochi yiiroochoo qoshoona yoobbiibeeto bulli kexon haggemmone.
24Kubbeexi mixinaꞌo bulli, genje mixinaꞌon qamichito,
qamini mixinaꞌon genjiito,
gaare mixon shuuꞌiito,
shuuqqiti mixinaꞌonoo gaariito,
Doono Yeeri ta tunoon ariyemminaꞌone.
Doono Yeeri ta, ebin getteto taane; ebinoo tuniyemmo taane’ itone gete” iye.
Currently Selected:
Hiziqeeli 17: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
