Hiziqeeli 16
16
Yerusaalemi Gibeneyaane Tuno
1Wochinnoon Doono Yeeri taach ishichiye: 2“Ashi bushoocho, ciigiiti bi mooyon Yerusaalemich arichiibe. 3‘Yerusaalemich, Nuggishoo Doono Yeeri ishichiye: Ne yaroonaa ne shiijje showoona Kanaaniye; ne nihoo Amooree ashoone; ne indee Hitee asheene. 4Ne shiijjehooba, ne yundo maacheyaanoone; ne xallemmoyich aacona badireyaane neene; kiihon yopphetaa tahoona kaappeyaane neene. 5Ne shiijjehooba shixxiiti ne tunetoyich, gaddooch duppehinalli koniyoona ariqqeꞌi ebi mooyoochee ikkeenolla neech tuniito aalloone.
6“ ‘Ne gaꞌoona ta beshemmona, damoona wooraꞌa qaferaa ne beetaa daneho; damoona kaapaꞌa ne beetaa “Kashoona beebe” iyo; eeha damoona kaapaꞌa ne beetaa “Kashoona beebe” iyoye. 7Gaddeexi mocoochoommon ne diccemmoyich tuniihoye; newoo diccaa genjaꞌa mallet gaawe gidiideen tunehine; xano kichihine; ne shurubboo genjehe; tunebaani andoo shokkaachee neene.
8“ ‘Wochinnoon ne gaꞌoona beshaabee neen ciinnaꞌa, shaakkeya ne bedon beeggeho; tawoo ta tahoon ne toommooch yaggii, ne achoon qeriyoye; wogaa neenna tookkii wogoon giyaꞌa neen taachi tuniihoye, iye Nuggishoo Doono Yeeri.
9“ ‘Aroochee aacona neen machaꞌa, damoochee neen xalliihoye; zayitoonoo neen huuttoye. 10Shashe qamisoon neech tajjiyoye; gaawe gooqqoochee shuuneeti caammoon neech geddoye; muttee tuppoochee shippeti shaashoon ne qellooch kaappoye; aaxxe tahoonoo ne toommooch xappiyoye. 11Macecikkiti shashoona neen shashiihoye; ne kishooch shagaamoon geddoye; ne qettoochoo shashoon tippoye. 12Ne muddooch axxaamittoon, ne waamooch gudichoon geddoye; ne qelloochoo gaawe gubbichoon ukiihoye. 13Aachoonaa birewoonon geddaꞌa shasheti neene; muttee tuppoochee shippeti gaawe taho, shashe qamisoonaa aaxxe tahoona neech beetone; ne maayo gaawe buddino, eeyonaa zayitoonane. Newoo beshoon mallet gaawee tunaꞌa diccehine; taatee tunoyichoo beddehine. 14Neech ta immeti oogoochee tiyitona ne malleto gaawetoyich ne woroo aagetoo bulliich waayeehe, iye Nuggishoo Doono Yeeri.
15“ ‘Tunebaani ne, ne malletoonaa aricheti ne tunoonon gibenaꞌa gommo beshina tookkii shunee mamooch giyehine. 16Ne tahoochee daammaꞌa ne goyinnemmi goyinnee xaaꞌoon macecikkihine; aroocheenoo shunoo maahine; ebiyoommi mooyo ebiyee aaf tunee ariyaanoone; ebiyee bekkoo tuneyaachemmone. 17Neech ta immeti ta aachoonaa birewoonoochee shuuneeti ne shashoon daammaa anaaminaꞌochi misiloon shuunaꞌa boonoshina tookkii shunoo maahine. 18Shashe ne tahoon daammaꞌa boonoshich tajjihine; ta zayitoonaa ta ixaanoonon daammaꞌa boonoshich deejjoo giddiihine. 19Ne maayemmoyich neech ta immeti maayoon, ebiyoo gaawe buddinoon, eeyonaa zayitoonon gaawe cinnoon bi cinnemmoyich tuniiꞌa boonoshich giddiihine; ebiyoommi mooyo tunetone, iye Nuggishoo Doono Yeeri.
20“ ‘Taach ne shiyeti anaami bushiisheenaꞌonaa maache bushiisheenaꞌonon, maayo boonoshi tunemmoyich, boonoshich deejjihine. Ebi ne yahiti yahoo kette mooyone? 21Ta bushiisheenaꞌon guurii qaaqqooch michaa boonoshich deejjihine. 22Ebi ciigiiti ne yahee yemeenooba, shokkaachee tunaa damoona wooraꞌa ne beehoobee ne bushittinee yemeenoon gabaane neene.
23“ ‘Neech woowo, woowo! iye Nuggishoo Doono Yeeri. Ebi bulli gondoon tuniichaa, 24ne qellich xoobe xaaꞌoon qanniihine; addibaaboo bulliichoo hashekkimiti xaaꞌoon qanniihine. 25Gamini gamine gommi gashooch hashekkimiti xaaꞌoon shuunehine; ne malletoonoo eeꞌiihine; aroona besheebeeto bullich ne qelloon beshii imona yahoon meechihine. 26Yahiichii wotteyaani#16:26 woyee, “Boonoshi anaami achoo oogeti” Gibitsee asheenaꞌona tookkii yahihine; taan ippiyoyich woddii yahihine. 27Ebich neen sheeroyich ta mochoon ne toommooch tiijjito taane; neech ta immaabeeti ne qoodoon shappiito taane; ne gonde shuunoon ciigeebeeti ne etteenaꞌochi qaatooch, Filsixeemee asheenaꞌochi kishooch, neen beshiyaa immeto taane. 28Neech bedo bi qajjitoyich Asooreenaꞌona tookkii yahihine; tunebaani andoo tooꞌaanee neene. 29Giixee showoo Baabloon beddaahaa woddii yahihine; ebinoo tooꞌaanee neene.
30“ ‘Yeellaalli yahechi maachechoommon ebi bulli mooyon ne tuniito am shaahe mullaalle tunaꞌaaniye? iye Nuggishoo Doono Yeeri. 31Gommi gommi gashooch ne yahemmi xoobe xaaꞌoon shuuneti neene; addibaaboo bulliichoo hashekkimiti xaaꞌoon qanniiti neene; tunebaani yahechi maachechoommonolla gijjee kicoon qaawaanee neene.
32“ ‘Hini yahechine! Bi kenoon qajjaachaa dallaawoona tookkii qeyaabeeti maacheen tuneti neene. 33Yahechi maachee asheenaꞌo waanee gijjoon deqqaa beetine; tunebaani ne, shunimaayeenaꞌoyich wojjoon immehine; xaaꞌoo bulliichee waaree neenna tookki shunoon boonoshi maayemmoyich xuccoon immehine. 34Ne yahoona bare maacheenaꞌoyee baree neene; yahecho koniyoona neen danoyich maanjoo biich qaawiyaache; gijjoon ne qoccehinalli koniyoona gijjoon neech qocaache; ebich ne bariti neene.
35“ ‘Ebich yahechine, Doono Yeerichi qaaroon waayebe: 36Nuggishoo Doono Yeeri ishichiye: Ne shunimaayeenaꞌona tookkii yahoona eeꞌe ne mooyo bi ufetoyich, ne achoo bi shoottetoyich, ciigiiti shahalleenaꞌoyich ne goyinnetonaa ne bushiisheenaꞌochi damoon ukkoona ebi shahalleenaꞌoyich ne deejjitonoyich, 37boonoshina tookkii ne emiriti ne shunimaayeenaꞌo bullin, ne shunnetinaꞌonaa ne shixxetinaꞌonon, bulli xaaꞌoochee ne toommooch kicemmo taane; kiciichi ne achoon boonoshi beeggemmoyich, gaxxemmo taane. 38Shaddechinaꞌonaa damee ukkechinaꞌona tuneti maacheenaꞌochi toommooch nalleebeeti nalloon ne toommooch nallemmo taane; ta neboonaa qanaatee ta kaaroonon ne toommooch kindiiree damoona ne wooremmoyich tuniyemmo taane. 39Ne shunimaayeenaꞌochi kishooch neen beshii immemmo taane; boonoshiyoo ne xoobe xaaꞌoonaa ne goyinnee xaaꞌoonon happemminaꞌone; ne tahoon shooti, ne shashoon daami neen shokke hulloo echiyemminaꞌone. 40Xaqqoona neen qiccemmi, goraadoonoo neen qeccemmi macceenaꞌon ne toommooch tiijjemminaꞌone. 41Ne kexinaꞌon qaaqqoona michemminaꞌone; meeti maacheenaꞌo aafoochaa ne toommooch nallemminaꞌone; yahoon ne neechemmoyich tuniyemmo taane; ebiyee bekk ne shunechinaꞌoyich gatiyoon qocaachemmi neene. 42Ebina ne toommooch ta ippeti ippo aqqemmone; ta qanaato ne waanee wokkemmone; cikkiyemmo taane, wochinnoonoo kaareyaachemmo taane.
43“ ‘Ne bushittinee gooroon gaboo ne qajjetoyich, ne shuuneti mooyo bullinoo taan ne ippiitoyich, ne shuunetoommon neech shuunemmo taane; bare ciigiiti ne mooyo bulli toommooch yahoon meechaane neene? iye Nuggishoo Doono Yeeri.
44“ ‘Yerusaaleme, asheenaꞌo ne mooyon, “Bushee bi indeyoommin tunehane” geti tochemminaꞌone. 45Ne, bi kenoonaa bi bushiishoonon shixxeti ne indeechi bushee neene; ne, boonoshi keneenaꞌonaa bushiisheenaꞌonon shixxiti ne maache maneenaꞌochi manee neene. Ne indee Hitee asheene; ne nihoo Amooree ashoone. 46Ne qaabbe manee, bi maache bushiishoona tookkii neyee dambi-waan beeti Shamaarine; ne guuche manee bi maache bushiishoona tookkii neyee deshi-waan beeti Sodoomine. 47Ne, boonoshi gommon dabboo woyee ciigiiti boonoshi mooyon tuniyoo baach tuneyaanoon, giisheche aabee daggooch ne gommo bullina boonoshiyee beshe gonde mooyon tuniihine. 48Beeyecho ta tunoona wogehoye: Ne manee Sodoominaa bi bushiisheenaꞌona neennaa ne bushiisheenaꞌona tuniitoommon tuniyaaneenaꞌone, iye Nuggishoo Doono Yeeri.
49“ ‘Ne manee Sodoomichi xuꞌo ebine: Biinnaa bi bushiisheenaꞌona geecechinaꞌone; wodde maayoonaa mashaamiti beemona boonoshich beetaa girechinaꞌonaa iritechinaꞌonon gaacheyaacheete. 50Geeciyeete; ta aafoochoo ciigiiti mooyon tuniiheete; ebin ta beegiyooba boonoshin aalliihoye. 51Shamaari ne shuuneti axaaxee qaton shuuneyaaneene; ne biyee beshe ciigiiti mooyon tuniyoona biin deꞌe shaahiihine. 52Ne maneenaꞌochoyee beshe ciigiiti mooyon tuniyoona ne boonoshi nalloon kettoo ne tuniitoyich, boonoshiyoo neyee beshe cadiqoon boonoshi tunetoyich ne yeelloon shaage; ne maneenaꞌon deꞌoon ne shaahiitoyich, yeellebe; ne yeelloonoo shaage.
Sodoominaa Shamaarina Wochinnoon Shuuneyemminaꞌo Tuno
53“ ‘Sodoominaa bi bushiisheenaꞌonochi kecoon, wottoo Shamaarinaa bi bushiisheenaꞌonochi kecoon wochemmo taane; ne hajjee kecoonoo boonoshi daggoochaa neech wochemmo taane. 54Ebiyoo yeelloon ne shaaggemmonaa ne tuniito bullich ne yeellemmonoyichiye; Sodoominaa Shamaarina gondoona neenominaꞌo tuno boonoshi qajjitoyich goggemminaꞌone. 55Ne maneenaꞌo tuneti Sodoominaa Shamaarina boonoshi bushiisheenaꞌoo wonnee boonoshi goorooch wottemminaꞌone; neennaa ne bushiisheenaꞌonoo wonnee ittoshi goorooch wottemmo ittoshine. 56Ne geecee aabooba ne manee Sodoomin cooqqiraane neene? 57Ebiyoo ne axaaxoo gaxxeeyoye aafiye. And Sooriyee#16:57 Ikkikke Yaafe Macaafeenaꞌo “Edoomi” iyeete. maache bushiisheenaꞌonaa bi giyeenaꞌo bullina, ne guudoona beechi neen hoxeebeeti Filsixeemee maache bushiishoo bullina cooneeti neene. 58Qocaallee ne tunoonaa ciigiiti ne shuunoonoyich naxeyemmi neene, iye Doono Yeeri.
Bulli Yemeenoon Manjemmi Wogo
59“ ‘Nuggishoo Doono Yeeri ishichiye: Wogoon happoona ta wogoon ne hoxetoyich ne tuniitoommon ne toommooch tuniyemmo taane. 60Tunebaani ne bushittinooba neenna tookkii ta giyeti wogoon shalligemmo taane; neenna tookki bulli yemeenee wogoon manjiyemmo taane. 61Ne qaabbe maneenaa ne guuche maneenon bushiishoochoommon neech ta imiyooba ne gommon gabiree yeellemmi neene; boonoshin neech ta immemmo neenna tookkii ta giyeti wogoommon toonoone. 62Neenna tookkii ta wogeti wogoon manjiyemmo taane; newoo Doono Yeeri ta tunoon ariyemmi neene. 63Ne tuniiti mooyo bullin echebe ta iyooba ne xuꞌo neech bi tipphiimmona yeellemmi neene; yeellee naboona wochinnoon noonoo wochaachemmi neene, iye Nuggishoo Doono Yeeri’ gete” iye.
Currently Selected:
Hiziqeeli 16: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
