Keyo 7
7
1Aroochee Doono Yeeri Muusich ishichiye: “Ebeege; ta, neen Faroonich nuggishoommon tuniito taane. Ne manoo Harooniyoo ne keemechon tunemmone. 2Newoo neech ta gettemmo bullin Haroonich gete. Biyoo Faroonin ‘Israꞌeeleenaꞌo ne showoochee boonoshi kechemmoyich gawukkibe’ gettemmone. 3Tunebaani Farooni mulloon muumiyemmo taane. Worganikkiti malleteenaꞌonaa gaakkechi shuuneenaꞌonon Gibitsee showooch woddiyaꞌa ta tuniitaanona, 4ittoshi getaa waayeyaachemmone. Ebiyee gubb, Gibitseenaꞌo toommooch giidechi ta mochoon bekkii, oogeti naxoona boonoshin naxeree, ta asheenaꞌo tuneti Israꞌeeleenaꞌon boonoshi yoodi yoodee yaaroona tuniiree, Gibitsee kichemmo taane. 5Giidechi ta mochoon Gibitseenaꞌo toommooch bekkiyaꞌa, Israꞌeeleenaꞌon boonoshi showoochee ta kichiyooba, Doono Yeeri ta tunoon Gibitseenaꞌo ariyemminaꞌone” iye.
6Muusinaa Haroonina Doono Yeeri gettitoommon tuniiheete. 7Faroon waan hammiꞌi boonoshi yibbaatehooba, Muusi shinne nati ashoone; Harooniyoo shinnaa keejje nati ashoone.
Haroonichi Gumbo Dingeroon Tuno
8Doono Yeeri Muusinaa Harooninoyich ishichiye: 9“Farooni ‘Eke gaakkechi mooyon shuune bekkiibote’ bi getiyooba, Haroonich ‘Ne gumboon Farooni aafooch dufe’ gete. Gumboo dingeroon tunemmone” iye.
10Ebich Muusinaa Haroonina Faroon waan hammiꞌi, Doono Yeeri boonoshich gettitoommon tuniiheete. Harooniyoo bi gumboon Farooninaa bi iraasheenaꞌonochi aafooch duppiye; ebi gumboo dingeroon tunehe. 11Aroochee Farooni Gibitsee showeexi kaayechinaꞌon, eboshiyoo yiiteenaꞌonaa allaameenaꞌonon bi ceegaa, boonoshiyoo boonoshi kaayoona ebiyoommon tuniiheete. 12Boonoshi ikkikkoona boonoshi gumboon boonoshi dufaa dingeroon tunehe. Tunebaani Haroonichi gumbo boonoshi gumbo bullin qooxxiye. 13Ebi bulli tunetaanoona, andoo Farooni mullo muumoone. Doono Yeeri gettitoommon, Muusinaa Haroonina gettiton waayeyaanoone.
Gibitsee Showeexi Aaco Damoon Tuno
14Aroochee Doono Yeeri Muusich ishichiye: “Farooni mullo muumoone; asheenaꞌon gawukkemmon qajjitone. 15Ebich maaddoona aacooch bi hammimmona biinna danoyich hambe. Abbaayi aachi gashooch biin quyebe. Ebiyee aaf dingero tuneti ne gumboon ne kishooch yeshe. 16Aroochee biich ishichibe: Hibireenaꞌo Nuggishoo Doono Yeeri ishichiꞌi ne waan taan wochetone: ‘Barahoochaa taach goyinne maddeya boonoshi hammemmoyich, ta asheenaꞌon gawukkibe, ta getaa and beddaahaa taach deꞌa getaano neene. 17And Doono Yeeri ta tunoon ariyemmo neene’ itone. Ebi ta gumboona Abbaayi aacon yexxemmo taane; aaco damoon tunemmone. 18Aachi daggeexi haashoo bulli qiti ciiremmone; aacoo shaaqqemmone. Ebich Gibitseenaꞌo ebi aacon uyon hakkaachemminaꞌone gete” iye.
19Doono Yeeri daakkiꞌi Muusich ishichiye: “Haroonin ‘Ne gumboon daamiree, Gibitsee showeexi aaco bulli toommooch, ebiyoo woce aachi toommooch, bobbeeti aachi toommooch, kote aachi toommooch, aachi gejjee toommoochoo ne kishoon yaggibe’ gete. Aacoo damoon tunemmone. Xaqqoonaa mixonoochee shuuneeti aachi kicee qiiceenaꞌooch beeti aaco bulliyona echeyaanoon, Gibitsee showeexi aaco bulli damoon tunemmone” iye.
20Muusinaa Haroonina Doono Yeeri gettitoommon tuniiheete. Harooniyoo taatoonaa bi iraasheenaꞌonochi aafoochaa bi gumboon tiijjii, Abbaayi aacon yexxiye. Aaco bulliyoo damoon tunehe. 21Abbaayi aachi daggooch beeti haasheenaꞌo qitii ciireheete; aacoo shaaqqiye. Ebich Gibitseenaꞌo ebi aacon uyon hakkaaneenaꞌone. Gibitsee showoo bulliich aaco damoon tunehe.
22Gibitsee showeexi kaayechinaꞌo boonoshi kaayoona ebiyoommon tuniiheete. Ebich Farooni mullo andoo muumoone. Doono Yeeri gettitoommon, Muusinaa Haroonina gettiton waayeyaanoone. 23Ebin mooyooch haddaanoon, bi taatee kexooch wottee hammiye. 24Gibitsee asheenaꞌo bulli Abbaayi aacoochee uyo boonoshi mawiitoyich, Abbaayi gashoona aachi oppoon iijjiyeete.
25Doono Yeeri Abbaayi aacon bi yexxiichaa, shabaatte qemo beshehe.
Currently Selected:
Keyo 7: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
