Keyo 6
6
1Aroochee Doono Yeeri Muusich ishichiye: “And Farooni toommooch ta tuniyemmon beeggemmo neene. Giidechi ta mochoochee tiyitona, ta asheenaꞌon gawukkemmone. Iberoon giidechi ta mochoochee tiyitona, ‘Ta showoochee keyi hambote’ geti yoohi kichemmone” iye.
Yeeri Muusin Wochinnoon Wocho
2Yeeriyoo daakkiꞌi Muusich ishichiye: “Ta, Doono Yeeri taane. 3Beshe Hakkechi Nuggishoo ta tunoon arichiyoona, Abrahamich, Yisaaqich, Yaaqobichoo bekketo taane. Tunebaani Doono Yeeri ii beeti ta shigoona boonoshich bekkeyaano taane.#Hal. 17:1; 28:3; 35:11; Key. 3:13-15 4Iibbittinoona boonoshi beebee echeti Kanaanee showoon boonoshich imoyich wogeto taane. 5Wotta Gibitseenaꞌo boonoshin guuno tuniiꞌi hajjaa, gaashilliibee Israꞌeeleenaꞌo cookiti cookoon waayeto taane; ta wogeti wogoon shalligito taane.
6“Ebich Israꞌeeleenaꞌoyich ishichi gete: Doono Yeeri ishichitone: ‘Ta, Doono Yeeri taane. Gibitseenaꞌochi guuchittinee waanjoochee ittoshin kichemmo taane; boonoshich guuno tunoochee ittoshin biishemmo taane. Qaaꞌi naxoon boonoshi toommooch deeboyich giidechi ta mochoon boonoshi toommooch tiijjemmo taane; ittoshinoo biishemmo taane. 7Ittoshin ta maccoo tuniyemmo taane; ittoshichoo Nuggishoon tunemmo taane. Gibitseenaꞌochi guuchittinee waanjoochee ittoshin kichiti, ittoshi Nuggishoo Doono Yeeri ta tunoon ariyemmo ittoshine. 8Abrahamich, Yisaaqinaa Yaaqobinoyich imma ta wogeti showooch ittoshin giijjemmo taane; ittoshi hajjoon tuniiree ittoshich immemmo taane. Ta, Doono Yeeri taane’ itone gete” iye.
9Muusiyoo ishin Israꞌeeleenaꞌoyich gettiye. Tunebaani asheenaꞌo oogeton boonoshi mullee tiishoochee tiyitona, wotta boonoshi toommooch tuneti guuchittinee magge shuunoochee tiyitona, ebi bi gettiti mooyon waayemmon qajjiyeete.
10Aroochee Doono Yeeri Muusin 11“Israꞌeeleenaꞌon bi gawukkaa, bi showoochee keyi boonoshi hammemmoyich, Gibitsee taatoo Faroonich hamiree gete” iye.
12Tunebaani Muusi wochiꞌi Doono Yeerich, “Israꞌeeleenaꞌo ta getaa waayoon qajjiton, Farooni ta getaa aabichiree waayehe? Tawoo yibbaatoon hakkaani eciya tippo taane” iye.
13Doono Yeeriyoo Muusinaa Harooninoyich ishichiye: “Israꞌeeleenaꞌonaa Gibitsee taatoo Farooninoyich ishichibote: ‘Doono Yeeri Israꞌeeleenaꞌon Gibitsee no kichemmoyich gettitone’ getote” iye.
Israꞌeeleenaꞌo Shiijjee Yaaroo
14Israꞌeeleenaꞌochi qaabbechi yareenaꞌo eboshine:
Israꞌeelichi gutenee bushoo Roobeelichi anaami bushiisheenaꞌo Hanooki, Faali, Hetsirooninaa Kariminane. Eboshi Roobeeli yoodee qaabbechi niheenaꞌone.
15Simoonichi anaami bushiisheenaꞌo Yemuꞌeeli, Yamiini, Ohaadi, Yakiini, Tsohaarinaa Kanaanechee bushoo Shaawullinane. Eboshi Simooni yoodee qaabbechi niheenaꞌone.
16Lewi yagiti yemeeno balli shaashaa shabaatte natone. Bi anaami bushiisheenaꞌo Gerishooni, Qohaatinaa Meraarinane. Boonoshi shiijjereenaꞌo eboshine:
17Gerishoonichi anaami bushiisheenaꞌo Libiininaa Shimeꞌinane.
18Qohaatichi anaami bushiisheenaꞌo Amiraami, Yitsaari, Kebirooninaa Uzeelinane. Qohaati yagiti yemeeno balli shaashaa keejje natone.
19Meraari bushiishoo Mahilinaa Muushinane. Lewi yoodee qaabbechi niheenaꞌo boonoshi shiijjeri shiijjeroona eboshine.#Had. 3:17-20; 26:57-58; 1 Kiin. 6:16-19
20Amiraami bi nihoo manee Yokebeedin shaaggiye. Biyoo Harooninaa Muusinon shiyahan. Amiraami yagiti yemeeno balli shaashaa shabaatte natone.
21Yitsaarichi anaami bushiisheenaꞌo Qoraahi, Nefeeginaa Zikirinane.
22Uzeelichi anaami bushiisheenaꞌo Mishaꞌeeli, Elisafaaninaa Sitirinane.
23Harooniyoo Aminadaabi bushoo Nahishooni manee Elisheebin shaaggiye. Biyoo Nadaabin, Abiihin, Elazaarinaa Itamaarinon shiyahan.
24Qoraahichi anaami bushiisheenaꞌo Asiiri, Eliqaaninaa Abiyasaafinane. Eboshi Qoraahi yareenaꞌochi qaabbechi niheenaꞌone.
25Haroonichi bushoo Elazaari Futeelichi maache bushiisheenaꞌoochee ikkeen shaaggiye. Biyoo Finihaasin shiyahan.
Eboshi bulli Lewi yoodee qaabbechinaꞌochi yari yaree ukkireenaꞌone.
26“Israꞌeeleenaꞌon boonoshi yoodi yoodee yaaroona tuniiree, Gibitsee kichibote” iꞌi Doono Yeeri gettito, ebi Harooninaa Muusinoniye. 27Israꞌeeleenaꞌon bi gawukkemmoyich Gibitsee taatoo Faroonich gettitinaꞌo boonoshine.
Yeeri Muusinaa Harooninoyich Yibbaato
28Doono Yeeri Muusich Gibitsaa bi yibbaatehooba 29biich, “Ta, Doono Yeeri taane; neech ta gettaabeeto bullin Gibitsee taatoo Faroonich gete” iye.
30Tunebaani Muusi Doono Yeerich “Ta, eciya tippo taane; ta getaa Farooni aabichiree waayehe?” iye.
Currently Selected:
Keyo 6: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
