Keyo 39
39
Qeesheenaꞌochi Taheenaꞌo Shuuneyoo
(Keyo 28:1-14)
1Yaafe Xaaꞌooch maddemminaꞌoyich, shimaayito, dameroonaa ceelloona tuneti woshiqoona shippeti qoreddoochee malletechi taheenaꞌon shuuneheete. Haroonichoo yaafeeti taheenaꞌon shuuneheete; ebi bullin Doono Yeeri Muusich gettitoommon tuniiꞌi, shuuneheete.
Efoodo Shuuneyoo
(Keyo 28:6-14)
2 Efoodoon aachee woshiqoona, shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona shippeti qoreddoochee shuuneheete. 3Ariyechi shuunecho shuunee beetoommon, shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona boonoshi shippiti efoodee toommooch, qiccii shishiichii kiikkiꞌi, woshiqoon shaahii boonoshi shuuneti aachoon malletii shippiyeete. 4Efoodoyich toommeexi bi gutte shuutoona tookkii yesheꞌi beeti gutte gogee toommeexi kaꞌeenaꞌon shuuneheete. 5Ebin yeshiyoo bi hakkeyemmoyich, malletiitaa shippeti cuyo efoodoona tookkii ikke shaahoo tuneꞌi, aachee woshiqoona, shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona shippehe. Ebi bullin Doono Yeeri Muusich gettitoommon tuniiꞌi shuuneheete.
6Shohaamee aaxxe xaqqeenaꞌon qanniiꞌi, aachee qebbeenaꞌooch geddiyeete; ebi aaxxe xaqqeenaꞌo toommooch shuunoon ariibeeti asho maatemoon bi qiicoommon, Israꞌeelee yoodeenaꞌochi shigoon qiicii kooriyeete. 7Aroochee Israꞌeelee yoodeenaꞌochi shalligichee xaqqeenaꞌo boonoshi tunemmoyich, ebi gutte aaxxe xaqqeenaꞌon gutte gogee toommeexi efoodee kaꞌeenaꞌona tookkii yeshiiheete. Ebi bullin Doono Yeeri Muusich gettitoommon tuniiꞌi shuuneheete.
Geteexi Kiiso Shuuneyoo
(Keyo 28:15-30)
8Geteexi kiisoon efoodoochoommon, aachee woshiqoona, shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona malletiiꞌi shuuneheete. 9Xappaa qoddeto tuneechii, bi neexo ikke ciixo, bi maaco ikke ciixone; awudde bi naaboo tatoone. 10Aroochee bi toommooch awudde yaaroona aaxxe xaqqeenaꞌon geddiyeete. Ikkinnee yaarooch saridiyoonoon, topphaziyoonoonaa garineetoonon, 11guttinnee yaarooch maarigidoon, sapiiroonaa almaazoonon, 12keejjinnee yaarooch yaakintoon, ageetoonaa amexoosoonon, 13awuddinnee yaarooch beruulloon, shohaamoonaa yasphiidoonon geddiyeete. Eboshi bullin aachee qebbeenaꞌooch geddiyeete. 14Ebi aaraa gutte xaqqeenaꞌo aaraa gutte Israꞌeelee yoodeenaꞌoochee ikkikke yoodee shigo boonoshi ikkikkoo toommooch maatemoochoommon qiiceetone.
15Geteexi kiisoyich woderoochoommon yokkeeti tifeenaꞌon xalle aachoochee shuuneheete. 16Gutte qebboonaa gutte qalibetoonon aachoochee shuuneꞌi, geteexi kiisee damba qachi gutte gocona tookkii yeshiiheete. 17Ebi aachoochee shuuneeti gutte tifoon geteexi kiisee damba qachi gutte goceexi qalibetoona tookkii yeshiiheete. 18Bare gutte tifee cilleenaꞌon aaf beeti efoodee gogee toommeexi kaꞌeenaꞌo toommooch beeti, aachee gutte qebbeenaꞌona tookkii yeshiiheete. 19Gutte aachee qalibetoon shuuneꞌi, efoodee gaꞌooch beeti, geteexi kiisee deshi gutte gocona maacaa yeshiiheete. 20Aroochee bare gutte aachee qalibetoon shuuneꞌi, malletiitaa shippeti efoodee buroo beetoyee damba qach, efoodee aaf beeti, toommeexi gogee kaꞌeenaꞌochi deshi qachaa yeshiiheete. 21Geteexi kiiso malletiitaa shippeti efoodee buree toommooch bi tunemmoyich, wotta efoodoochee bi muricaachemmoyich, kiisee qalibeteenaꞌon efoodee qalibeteenaꞌona tookkii xaaqqiꞌi, shimaayite yokkoona cuchiyeete. Ebi bullin Doono Yeeri Muusich gettitoommon tuniiꞌi shuuneheete.
Qeeshee Guudo Tahemmi Qamiso Shuuneyoo
(Keyo 28:31-43)
22 Efoodee dechiich taheyemmi qamisoon shimaayite woshiqoochee baach shippeti qoreddoochee shuuneheete. 23Qello giyemmi qettoon kichiyeete. Bi keexeyaachemmoyich, qettee guudoon shippeti qoreddoona xappiꞌi kochiyeete. 24Qamisee baata ciiroochaa guude gawoon shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona romaanee michi aafoommi mooyinaꞌon shashiiꞌi shippiyeete. 25Qaaxilleenaꞌonoo xalle aachoochee shuuneheete. Eboshinoo romaanee michi aafoommi mooyinaꞌo dagg daggooch beshii beshiiꞌi qamisee baata ciireexi guude gawooch shuchiyeete. 26Qeeshee guudo taheree maddemmi qamisee baata ciireexi guude gawooch qaaxilleenaꞌonaa romaanee michi aafoommi mooyinaꞌona shaaddii shaaddiitaa geddetinaꞌone. Ebi bullin Doono Yeeri Muusich gettitoommon tuniiꞌi shuuneheete.
Qeesheenaꞌo Tahemmi Bare Taheenaꞌo Shuuneyoo
(Keyo 28:39-40)
27Harooninaa bi anaami bushiisheenaꞌonoyich kittoon muttee tuppoochee ciciitaa yokkeeti woshiqoona shippeti qoreddoochee shuuneheete. 28Ebiyoommon wotta qelli caaceenaꞌonaa shureenaꞌonon muttee tuppoochee ciciitaa yokkeeti woshiqoona shippeti qoreddoochee shuuneheete. 29Buroon muttee tuppoochee ciciitaa yokkeeti woshiqoona, wotta shimaayito, dameroonaa ceelloona tuneti woshiqoona shippeti qoreddoochee shuuneheete; bi toommoochoo shashii shippiyeete. Ebi bullin Doono Yeeri Muusich gettitoommon tuniiꞌi shuuneheete.
Yaafeeti Gubbichee Geengoo Shuuneyoo
(Keyo 28:36-37)
30Yaafeeti gubbichee gengoon xalle aachoochee shuuneꞌi, bi toommooch “Doono Yeerich Yaafeeto” ii beeton qiicii kooriyeete. 31Aroochee damba qachaa qelli caacoona tookkii, shimaayite yokkoona cuchiyeete. Ebi bullin Doono Yeeri Muusich gettitoommon tuniiꞌi shuuneheete.
Yaafee Duukkaanoo Shuunetaa Ciiro
(Keyo 35:10-19)
32Ebiyoommi gommona yaafee duukkaanee shuunoo, ebiyoo Doono Yeerina danee duukkaanee shuunoo bulli, shuunetaa ciyiye. Israꞌeeleenaꞌo Doono Yeeri Muusich gettitoommon tuniiꞌi, bulli mooyon shuuneheete. 33Aroochee ebi yaafee duukkaanoonaa bi qiiceenaꞌo bullinon Muus waan deebiyeete. Boonoshi deebiti duukkaanee qiiceenaꞌo, qamaaxireenaꞌo, tureenaꞌo, yareenaꞌo, giimbeenaꞌonaa boonoshi baateenaꞌona; 34bagee baaddoochi gooqqoochee qucaa shuuneeti qeroo, gaawichaa qucheti gooqqoochee shuuneeti qeroo, taabootoon qeremmi maccillaatoo; 35miixee taabooto, bi yareenaꞌonaa axaaxoon maariyee guufoona; 36madelloo, bi qiico bullinaa Doono Yeeri aafooch beeyemmi, yaafeeti yaaree koshona; 37xalle aachoochee shuuneeti maqirajjo, bi toommooch beeti ceecheenaꞌo, bi qiico bullinaa ceechoyich tunemmi zayitoona; 38aachoochee shuuneeti, ixaanee deejjee gudo, huutee zayito, cinnechi ixaano; duukkaanee kelloyich tunemmi maccillaatoo; 39gooshoochee shuuneeti deejjee gudo, tulloo kechemmoyich tunemmi, gooshoochee shuuneeti, dabboommi mooyo, bi yareenaꞌonaa bi qiico bullina; machee aaco koteebeeti gafetoonaa bi kotoona; 40addibaabee maccillaateenaꞌo boonoshi giimbeenaꞌonaa boonoshi neexemmi baateenaꞌona, addibaabee kelloyich tunemmi maccillaatoo, duukkaanoonaa bi addibaaboonoyich tunemmi wodereenaꞌonaa xogeenaꞌona; yaafee duukkaanee, ebiyoo danee duukkaanee daggooch beeti shuunoyich tunemmi qiico bullinaa 41Yaafe Xaaꞌoochaa maddoyich taheyemmi, malletiitaa shuuneeti taheenaꞌo, eboshiyoo Harooninaa bi anaami bushiisheenaꞌona qeesheenaꞌo tuneree tahemmi yaafeeti taheenaꞌonane.
42Doono Yeeri Muusich gettitoommon tuniiꞌi Israꞌeeleenaꞌo shuunoo bullin shuunee ciichiyeete. 43Muusiyoo ebi shuuneeti mooyo bullin Doono Yeeri gettitoommon tuniiꞌi boonoshi shuunoon beeggiye; boonoshinoo diiriye.
Currently Selected:
Keyo 39: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
