Keyo 38
38
Deejjee Gudo Shuuneyoo
(Keyo 27:1-8)
1Betsaleeli micciibeeti deejjoo giddeebeeti deejjee gudoon geellee mixoochee shuunehe. Ebi deejjee gudo bi gidoo uuche hiroo, bi maaco uuche hiroo, bi neexoo keejje hiroo tuneechii, awudde bi naaboo tatoone. 2Bi awudde shuutoona qareenaꞌon shuunehe. Ebi qareenaꞌo deejjee gudoona tookkii ikkochee shuuneetinaꞌone. Deejjee gudo bullin gooshoona dikkehe. 3Deejjee gudoyich qiiceenaꞌo bullin, eboshiyoo tulloo booddeebeeti gubeenaꞌon, tulloo ucheebeeti maankeenaꞌon, quppe saaneenaꞌon, gomeenaꞌonaa qaaqqee buno yecheyemmi qiiceenaꞌonon gooshoochee shuunehe. 4Tulloo kechemmoyich tunemmi, dabboommi mooyon gooshoochee shuunehe. Ebi dabboon deejjee gudee gitooch beddaahaa bi shaggemmoyich, deejjee gudee daggooch, noonoyee desh tuniihe. 5Ebi dabbee awudde shuutooch yareenaꞌo giyemmi awudde qalibetoon gooshoochee shuunehe. 6Yareenaꞌon geellee mixoochee shuuneꞌi, boonoshin gooshoona dikkehe. 7Deejjee gudo shaaggeyemmi, ebi yareenaꞌon deejjee gudee gutte naabeexi qalibeteenaꞌochi aahoona giijjiye. Deejjee gudoon maacaa aaho tuniiꞌi shaaqqoona shuunehe.
Gooshee Gafeto Shuuneyoo
(Keyo 30:18)
8Betsaleeli danee duukkaanee kellooch maddeebeeti genneenaꞌo deebiti, gooshee heeraawoochee machee aaco koteebeeti gafetoonaa bi kotoonon, shuunehe.
Yaafee Duukkaanee Addibaaboo Shuuneyoo
(Keyo 27:9-19)
9Betsaleeli yaafee duukkaanee addibaaboon shuunehe. Deshi-waan beeti, addibaabee gidoyich balle hiroo tuneti maccillaateenaꞌo beetinaꞌone. Boonoshi shuuneeto, muttee tuppoochee ciciitaa yokkeeti woshiqoona shippeti qoreddoocheeniye. 10Boonoshin tuuggemmi hiye giimbeenaꞌonaa ebi giimbeenaꞌochi hiye baateenaꞌona gooshoochee shuuneetinaꞌone; tunebaani ebi giimbeenaꞌo toommooch beeti kaꞌeenaꞌonaa yaabeenaꞌona birewoochee shuuneetinaꞌone. 11Ebiyoommon wotta dambi-waan beeti addibaabee gidoyich balle hiroo tuneti maccillaateenaꞌo beetinaꞌone. Boonoshin tuuggemmi hiye giimbeenaꞌonaa ebi giimbeenaꞌochi hiye baateenaꞌona gooshoochee shuuneetinaꞌone; wotta ebi giimbeenaꞌo toommooch beeti kaꞌeenaꞌonaa yaabeenaꞌona birewoochee shuuneetinaꞌone.
12Aabi-gimo waan beeti addibaabee gidoyich aache hire maccillaateenaꞌo beetinaꞌone. Boonoshin tuuggemmi aashire giimbeenaꞌonaa ebi giimbeenaꞌoyich aashire baateenaꞌona beetinaꞌone. Ebi giimbeenaꞌo toommooch beeti kaꞌeenaꞌonaa yaabeenaꞌona birewoochee shuuneetinaꞌone. 13Aabi-keyo waan beeti addibaabee gidoo aache hiroone. 14Ikke baddaa, kelloochee tiijjiꞌi, aaraa uuche hire maccillaateenaꞌo beetinaꞌone. Boonoshin tuuggemmi keejje giimbeenaꞌonaa ebi giimbeenaꞌoyich keejje baateenaꞌona beetinaꞌone. 15Bare baddaa, kelloochee tiijjiꞌi, aaraa uuche hire maccillaateenaꞌo beetinaꞌone. Boonoshin tuuggemmi keejje giimbenaꞌonaa ebi giimbeenaꞌoyich keejje baateenaꞌona beetinaꞌone. 16Addibaabee guudooch beeti maccillaatoo bulli muttee tuppoochee ciciitaa yokkeeti woshiqoona shippeti qoreddoochee shuuneetone. 17Addibaabee guudooch beeti giimbeenaꞌochi baateenaꞌo gooshoochee shuuneetinaꞌone; wotta giimbeenaꞌo toommooch beeti kaꞌeenaꞌonaa yaabeenaꞌona birewoochee shuuneetinaꞌone. Ebi giimbeenaꞌo toommo birewoona dikkeetone; addibaabee giimbeenaꞌo bullichi yaabeenaꞌo birewoochee shuuneetinaꞌone.
18Addibaabee kelloyich, shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona shippeti qoreddoochee shuuneeti maccillaatoo beetone; bi toommoochoo shashiitaa shippetone. Ebi maccillaatoo, addibaabee uxeree maccillaateenaꞌochoommon, bi gidoo hiye hiroo, bi neexoo uuche hiroone. 19Ebi maccillaatoon tuuggemmi awudde giimbeenaꞌonaa ebi are giimbeenaꞌoyich gooshoochee shuuneeti awudde baateenaꞌona beetinaꞌone. Boonoshi kaꞌeenaꞌo birewoochee shuuneetinaꞌone; boonoshi toommonaa yaabeenaꞌona birewoona dikkeetinaꞌone. 20Yaafee duukkaanee xogeenaꞌonaa bi guudooch beeti addibaabee uxeree xogeenaꞌona bulloshi gooshoochee shuuneetinaꞌone.
Yaafee Duukkaanee Shuunoyich Tuneti Mooyinaꞌo
21Yaafee duukkaanee shuunoyich, ebiyoo miixee duukkaanee shuunoyich, Muusi gettitoommon, qeeshoo Harooni bushoo Itamaari yaabaa, Leweenaꞌo kooriti mooyinaꞌo haddoo ebine. 22Yihudi yoodoochee tuneti, Huuri bushoochi bushoo, Uriyi bushoo Betsaleeli Doono Yeeri Muusich gettito bullin shuunehe. 23Biinna tookkii shuuneebeeti, Daani yoodoochee tuneti, Ahisamaaki bushoo Oholiyaabi, kishee shuunee ariyecho, shuunee qoppechonaa shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona shashiyechonane.
24Yaafee duukkaanee shuunoo bullich Doono Yeerich yaafeeto bi tunoon bekkiyoyich, bi aafooch kaama tiijjiꞌi asheenaꞌo immiti aachoo bulli yaafee kechi machoona qocaa, ikke hume kiilo giraamo tunehe. 25Israꞌeeleenaꞌo haddeehooba, boonoshi waanee daneti birewoo yaafee kechi machoona qocaa keejje humaa awudde ballaa shaashe kiilo giraamo tunehe. 26Haddeeti, hiye natonaa hiye natoyee damboona tuneti anaamo bulli shiritte ballaa keejje humaa uuche ballaa aachoone. Ebi are asheenaꞌo bulli boonoshi ikkikkoona yaafee kechi machoona qocceti, sheqeelee qachi birewoon qoccitinaꞌone.#Key. 30:11-16
27Yaafee duukkaanee giimbeenaꞌochi, wotta duukkaanee maaci maccillaatee giimbeenaꞌochi balle baateenaꞌo keejje humaa awudde balle kiilo giraamee birewoona shuuneeheete. Ebi geto, ikkikke baatoo shaashaa awudde kiilo giraamee birewoona shuuneete getone. 28Betsaleeli giimbeenaꞌochi kaꞌeenaꞌonaa yaabeenaꞌonon echeti shaashe kiilo giraamee birewoona shuunehe; wotta ebi are giimbeenaꞌo toommon dikkehe.
29Doono Yeerich yaafeeto bi tunoon bekkiyoyich, bi aafooch kaama tiijjiꞌi asheenaꞌo immiti gooshoo gutte humaa awudde ballaa hiyaa uuche kiilo giraamoone. 30Betsaleeli ebi gooshoona danee duukkaanee kellee giimbeenaꞌochi baateenaꞌon, gooshee deejjee gudoon, tulloo kechemmoyich tunemmi, gooshee dabboommi mooyonaa deejjee gudee qiiceenaꞌo bullinon shuunehe; 31wotta yaafee duukkaanee addibaabee uxeree guudooch beeti giimbeenaꞌochi baateenaꞌonaa addibaabee kellee giimbeenaꞌochi baateenaꞌonon shuunehe; ebiyoommon wotta yaafee duukkaanee xogeenaꞌonaa addibaabee uxeree guudooch beeti xogeenaꞌona bulloshin shuunehe.
Currently Selected:
Keyo 38: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
