Keyo 31
31
Yeeri Betsaleelinaa Oholiyaabinon Kaaco
(Keyo 35:30–36:1)
1Doono Yeeri Muusich ishichiye: 2“Yihudi yoodoochee tuneti Huuri bushoochi bushoo, Uriyichi bushoo Betsaleelin kaacceto taane. 3Ta Ayaanoona bi ceennemmoyich tuniito taane; kishee shuunoo tuneti mooyo amoyichona hakkoon, ariyoonaa mulloonon biich immeto taane. 4Ebiyoo ebi kishee shuunoon bi qoppemmoyich, aachoona, birewoonaa gooshoona shuuneebeeti qiiceenaꞌon bi shuunemmoyich, 5qebbooch geddeyemmi aaxxe xaqqeenaꞌon bi qiicemmonaa mixon bi qiicemmonoyich, kishee shuunoo bullinoo bi shuunemmoyichiye. 6Wotta biinna tookki bi shuunemmoyich, Daani yoodoochee tuneti Ahisamaakichi bushoo Oholiyaabin daakkaꞌa kaacceto taane. Ebiyoommon wotta neech ta getteto bullin boonoshi shuunemmoyich, kishee shuunee ariyechinaꞌo bullich hakkoon immeto taane. 7Ebiyoo danee duukkaanoon, miixee taabootoonaa bi toommeexi, axaaxoon maariyee guufoonon, duukkaanee qiiceenaꞌo bullin, 8ebiyoo madelloon bi qiiceenaꞌona tookki, xalle aachoochee shuuneeti aachee maqirajjoon bi qiico bullina tookki, ixaano shookkeebeeti deejjee gudoon, 9micciibeeti deejjoo deejjeyemmi gudoon bi qiico bullina tookki, machee aaco koteebeeti gafetoon bi kotoona tookki, 10gaawichaa shippeti taheenaꞌon, eboshiyoo Harooninaa bi anaami bushiisheenaꞌona qeesheenaꞌo tune maddebee boonoshi tahemmi yaafeeti taheenaꞌon, 11huutee zayitoonaa Yaafe Xaaꞌoyich tunemmi gaawe cinnechi ixaanoonon boonoshi shuunemmoyichiye. Neech ta gettetoommi gommona ebi bullin shuunebeete” iye.
Shambetee Aabo
12Aroochee Doono Yeeri Muusich ishichiye: 13“Israꞌeeleenaꞌoyich ishichibe: ‘Doono Yeeri ta, ittoshin yaafiibeeto ta tunoon ittoshi ariyemmoyich, taannaa ittoshinochi daggooch, gubbi ittoshi shiijjeroo bulli daggoochoo malletoo bi tunetoyich, ta shambetoon quyebote.
14“ ‘Ittoshich yaafoo bi tunetoyich, shambetee aaboon quyebote. Ebin shaaddemmo koniyoona qitibe. Arooba shuunoon shuunemmo koniyoona bi asheenaꞌo daggoochee kichaa yookkebe. 15Shiritte qemon shuunoon shuunemmo ittoshine; tunebaani shabaattinnee qemo, kashe ittoshi heechemmi, Doono Yeeri taach yaafeeti shambetoone. Shambetee aabooba shuunoon shuunemmo koniyoona qitibe.#Key. 20:8-11; 23:12; 34:21; 35:2; Lew. 23:3; Yibba. 5:12-14 16Israꞌeeleenaꞌo gubbi boonoshi shiijjereenaꞌo bulliich beddaahaa, bulli yemeenee wogoon tuniiree shambetoon quyebeete. 17Taannaa Israꞌeeleenaꞌonochi daggooch bulli yemeenoon malletoo tunemmone. Ebiyoo Doono Yeeri ta, shimaayoonaa showoonon shiritte qemi daggooch shuunaꞌa, shabaattinnee qemooba ta shuunoochee ta kashetoyichiye’ gete” iye.#Key. 20:11
18Doono Yeeri Siini guudi toommoochaa Muusina tookkii bi yibbaatoon bi ciichitoyee gubb, bi yapheroona kooreeti, gutte yalle miixee xaqqeenaꞌon#31:18 Miixee xaqqeenaꞌo, aashire geteenaꞌo kooreeti xaqqeenaꞌone. Muusich immiye.
Currently Selected:
Keyo 31: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
