Keyo 30
30
Ixaanee Deejjee Gudo
(Keyo 37:25-28)
1“Ixaano shookkeyemmi deejjee gudoon geellee mixoochee shuunebe. 2Ebi gudo bi gidoo ikke hiroo, bi maaco ikke hiroo tunebe; awudde bi naaboo bulli tato tunebe; bi neexoo gutte hiroo tunebe. Ebi are deejjee gudee awudde shuutoona beeti qareenaꞌo tookkii ikkochee shuuneetinaꞌo tunebeete. 3Bi toommon, bi awudde naaboonaa qareenaꞌonon xalle aachoona dikkebe. Bi guude gawe goconoo aachoona shuunebe. 4Ebi are gocoyee desh, bi ikke baddi naaboonaa bare baddi naaboonooch, ebi ixaanee deejjee gudo shaaggeyemmi yareenaꞌo giyemmi, gutte aachee qalibetoon shuunebe. 5Yareenaꞌon geellee mixoochee shuuneree, aachoona dikkebe. 6Ebi deejjee gudoon neenna ta danaabeeti, axaaxoon maariyee guufo beeti, miixee taabootoyee aaf beeti maccillaatoyee maach kotiibe.
7“Harooni ceecheenaꞌon bi qanniibeeti maaddi maaddoona, cinnechi ixaanoon ebi deejjee gudee toommooch shoohe; 8ceecheenaꞌon bi aaxxiibeeti xumi xumoonoo ixaanoon shoohe. Ebiyoo, gubbi ittoshi shiijjeroo bulliich beddaahaa, ixaano Doono Yeeri ta aafooch bulli aaboon bi cufemmoyichiye. 9Ebi deejjee gudee toommoochaa gidd bedaani ixaanoon woyee micciibeeti deejjoon woyee maayi deejjoon deejjiyaahine. Uyee deejjoonoo aree toommooch ukkiyaahine. 10Harooni natooch ikke wottoon axaaxoon maariyoyich deejjeeti gijjee damoochee daami, ixaanee deejjee gudee awudde qareenaꞌooch huute. Nati natona ebi axaaxoon maariyee deejjee doyoo gubbi ittoshi shiijjeroo bulliich beddaahaa, tunebe. Ebi ixaanee deejjee gudo Doono Yeeri taach oogeti yaafoone” iye.
Danee Duukkaanoyich Qocheebeeti Gijjoo
11Aroochee Doono Yeeri Muusich ishichiye: 12“Israꞌeeleenaꞌon ne haddiyooba, asho bi ikkikkoona bi kashoyich biisho tunemmi biishee gijjoon Doono Yeerich qoce. Ebiyoo boonoshin ne haddiyooba, naxo boonoshi toommooch bi shagaachemmoyichiye. 13Haddee daggooch giyiti asho koniyoona yaafee kechi machoona qocceti sheqeelee qachi birewoon imbe. Ikke sheqeelo aaraa gutte giraam bedoone. Ebi birewoo Doono Yeeri taach giddemmi deejjoone. 14Hiye natonaa hiye natoyee damboona tuneꞌi haddee daggooch giyito bulli, Doono Yeeri taach ebi deejjoon giddiibe. 15Ittoshi kashoon biishoyich deejjoon ittoshi giddiibeeti aabooba, gaannecho ebi gijjoyee beshoon, girechoo ebi gijjoyee shappoon immaaye. 16Axaaxoon maariibeeti gijjoon Israꞌeeleenaꞌo waanee deꞌiree danee duukkaanee maddee shuunooch heechiibe. Doono Yeeri ta aafooch Israꞌeeleenaꞌoyich boonoshi axaaxoon maariyoyich shalligichoo tunemmone” iye.
Gooshee Gafeto
17Doono Yeeri Muusich ishichiye: 18“Machee aaco koteebeeti gafetoon bi kotoona tookki gooshoochee shuunebe. Danee duukkaanoonaa deejjee gudoonochi gutte daggooch kotiibe. Aroochoo aacon gede. 19Harooninaa bi anaami bushiisheenaꞌona ebi gafetooch beeti aacoochee kitiree, boonoshi kishoonaa boonoshi baatoonon machebeete. 20Danee duukkaanooch boonoshi giyimmi aabo bullin woyee Doono Yeeri taach, qaaqqoona micciibeeti deejjoon giddiyoona maddoyich deejjee gudooch boonoshi giddemmi aabo bullin, boonoshi qitaachemmoyich, ebi aacona machebeete. 21Boonoshi qitaachemmoyich, boonoshi kishoonaa boonoshi baatoonon machebeete. Ebiyoo Harooninaa gubbi bi shiijjeroo bullinoyich bulli yemeenee qociyoon tunebe” iye.
Yaafeeti Huutee Zayito
22Doono Yeeri Muusich ishichiye: 23“Beshe gaawe cinnechi qimaameenaꞌon, eboshiyoo, uuche balle sheqeelee nagaani hareboon, gutte ballaa aache sheqeelee gaawe cinnechi qarefoon, gutte ballaa aache sheqeelee gaawe cinnechi toochoonaa 24uuche balle sheqeelee birguudoonon#30:24 Birguudo, qarefoommi cinnechi michi goroone. deebe. Eboshi bulli yaafee kechi machoona qocaa tato tunebeete. Arooch awudde neetiree zayitoon daakkiree, 25ariyechi asheenaꞌo shuunetoommi, yaafeeti cinnechi huutee zayitoon tuniibe. Yaafeeti huutee zayito tunemmone. 26Aroochee danee duukkaanoon, miixee taabootoon, 27madelloonaa bi qiiceenaꞌo bullinon, maqirajjoonaa bi qiiceenaꞌonon, ixaanee deejjee gudoon, 28micciibeeti deejjoo giddeebeeti deejjee gudoonaa bi qiiceenaꞌo bullinon, ebiyoommon machee aaco koteebeeti gafetoon bi kotoona tookki ebi zayitoona huute. 29Oogeton yaafeetinaꞌo boonoshi tunemmoyich, yaafibe. Boonoshi achooch shaggimmo, asho tuneba amee mooyolla, yaafeeton tunemmone.
30“Qeesheenaꞌo tuneree taach boonoshi maddemmoyich, Harooninaa bi anaami bushiisheenaꞌonon zayitoona huute. Yaafishoo gete. 31Israꞌeeleenaꞌoyich ishichi gete: Gubbi ittoshi shiijjeroo bulliich beddaahaa, ebi taach yaafeeti huutee zayito tunemmone. 32Asho konichi ashittinoocholla huuttaahote. Ebi zayito shuuneetoommi gommona amee zayitoonona shuuneyaahote; yaafeetone; yaafeeton tuniiree ciinote. 33Shaahii shuunemmo woyee qeesheenaꞌoyee besh bare ashi ashittinooch huuttimmo koniyoona bi asheenaꞌo daggoochee kichaa yookkebe” iye.
Cinnechi Ixaanoon Qanniyoo
34Doono Yeeri Muusich ishichiye: “Tachaa bacceeti gaawe cinnechi qimaameenaꞌon, eboshiyoo, mixoochee cottiibeeti shittoon, woongee (yaahee) daggoochee daneebeeti shittoon, macwollaggoon shaahiibeeti mixoochee kechiibeeti shittoonaa xalle ixaanoonon daamiree, 35ariyecho shuunetoommi, gaawe cinnechi ixaanoon qanniibe. Kiiho baccaa shuuneeto, xalloonaa yaafeetona tunebe. 36Ebi aroochee giishechoon koyi buddino tunii qacichiree, danee duukkaanee miixee taabootee aafooch, neenna ta danemmi xaaꞌooch, kotiibe. Ittoshich oogeton yaafeeto tunemmone. 37Ittoshi qellich ebiyoommi gommona amee ixaanoonolla shuuneyaahote. Doono Yeeri taach yaafeeton tuniiree ciinote. 38Gaaweti bi cinnoona emiroyich, ebin shaahiiꞌi shuunemmo koniyoona bi asheenaꞌo daggoochee kichaa yookkebe” iye.
Currently Selected:
Keyo 30: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
