Keyo 26
26
Yaafee Duukkaanoo
(Keyo 36:8-38)
1“Yaafee duukkaanoon muttee tuppoochee ciciitaa yokkeeti, shimaayito, dameroonaa ceelloona tuneti woshiqoona shippeti qoreddoochee shuuneeti aashire maccillaateenaꞌona shuunebe. Ebi maccillaateenaꞌo toommooch kiruubeenaꞌo malletiitaa shippebeete. 2Maccillaatoo bulli tato tunebe; bi ikkikkoochi neexo hiyaa shimitte hiroo, bi maaco awudde hiroo tunebe. 3Uuche maccillaatoon xaaqqi gaawichiree koye. Echeti uuche maccillaatoon ebiyoommon xaaqqi gaawichiree koye. 4Ebi ikkooch xaaqqeeti ikke maccillaatee gocooch, shimaayite qoreddoochee shuuneeti kenneenaꞌon (kennikkeenaꞌon) gede. Wotta ohe ikke maccillaatee gocooch ebiyoommon gede. 5Aache kennoon ikke maccillaatee gocooch, wotta aache kennoon ohe ikke maccillaatee gocooch ciiniiree gede. 6Aroochee yaafee duukkaanoo ikkochee yesheto bi tunemmoyich, aache qamaaxiroon aachoochee shuuneree, ebi aroona maccillaateenaꞌon ikkochi yeshiibe.
7“Yaafee duukkaanoon tookkaa qeremmi, emmishee eexoochee shippeti qoreddeenaꞌon shuunebe. Ebi qoreddoo aaraa ikkoo tunebe. 8Ebi aaraa ikke qoreddoo tato tunebe; bi ikkikkoochi neexo shaashe hiroo, bi maacoo awudde hiroo tunebe. 9Uuche qoreddoon ikkooch xaaqqi, ebiyoommon wotta shiritte qoreddoon ikkooch xaaqqi gaawichiree koye. Duukkaanee aafaa shirittinnee qoreddoon qodiichi bi toommooch xappibe. 10Ikke badd beeti uuche qoreddoo ikkooch xaaqqeeti, ciireexi gocooch aache kennoon, ebiyoommon wotta bare badd beeti shiritte qoreddoo ikkooch xaaqqeeti, ciireexi gocooch aache kennoon gede. 11Aroochee aache qamaaxiroon gooshoochee shuunebe. Duukkaanoon ikkochiꞌi yeshiyoyich, ebi aache qamaaxiroon kenneenaꞌochi aahoona beshiibe. 12Echeti qati maccillaatoon duukkaanee gubbaa yeenderikkibe. 13Yaafee duukkaanee gutte gocooch tunemmi maccillaateenaꞌo, ikke hiroo ikke gocon, wotta andoo ikke hiroo bare gocon, bi oppemmoyich tuniitaa yeenderebeete. 14Duukkaanoyich qucaa shuuneeti, bagee baaddoochi gooqqoochee qeroon shuunebe. Wotta bi toommooch xappeyemmi qeroon qucaa shuuneeti bare gijjee gooqqoochee shuunebe.
15“Yaafee duukkaanoyich kaamoo tuneti tureenaꞌon geellee mixoochee shuunebe. 16-17Gutti gutte mixon buroona ikkochi xaaqqiree ikke turoon tuniibe. Ikkikke turee neexo aashire hiroo, bi maacoo ikke hiraa qato tunebe. Turee deshi ciiroochaa gutte kallaachoon kichibe. Yaafee duukkaanee turoo bullin ebiyoommi gommona shuunebe. 18Yaafee duukkaanee deshi-waanich hiye turoon shuunebe. 19Ebi hiye tureenaꞌoyich boonoshi neexemmi aabbe baateenaꞌon birewoochee shuunebe. Ikke turee gutte kallaachoyich gutte baatoon, wotta bare turee gutte kallaachoyich gutte baatoon tuniibe. 20Ebiyoommon yaafee duukkaanee dambi-waanich hiye turoon shuunebe. 21Boonoshi kallaachoyich tunemmi aabbe baatoon birewoochee shuunebe. Ikke turee xepphooch gutte baatoon, wotta bare turee xepphooch gutte baatoon tuniibe. 22Yaafee duukkaanee gubbich, ebiyoo aabi-gimo waanich, shiritte turoon shuunebe. 23Gubbi duꞌeenaꞌoyich gutte turoon shuunebe. 24Ebi tureenaꞌo deshee tiijjiꞌi damba ikkinnee qalibetooch beddaahaa, ikkottee yeshetinaꞌo tunebeete. Gutte duꞌoyich tunemmi gutte turoo ebiyoommi gommona shuuneebe. 25Birewoochee shuuneeti gutti gutte baatoo ikkikke turoyich beebe; ebina shimitte turoonaa aaraa shiritte baatoona tunemmone.
26“Wotta aaraa uuche yaroon geellee mixoochee shuunebe. Ikke badd beeti yaafee duukkaanee tureenaꞌoyich uuche yaroon, 27bare badd beeti yaafee duukkaanee tureenaꞌoyich uuche yaroonaa yaafee duukkaanee gubb, aabi-gimo waan beeti tureenaꞌoyich uuche yaroonon shuunebe. 28Daggeexi yaroon tureenaꞌo daggoona tuniiree, cilloochee cillooch beddaahaa beshiibe. 29Tureenaꞌon aachoona dikkebe. Yareenaꞌon yeshiyoyich, qalibeteenaꞌon aachoochee shuunebe. Yareenaꞌonoo aachoona dikkebe.
30“Yaafee duukkaanoonoo guudi toommoochaa neech ta bekkiitoommi gommona xogibe.
Yaafee Duukkaanee Maaci Maccillaatoonaa Kellee Maccillaatoona
31“Yaafee duukkaanee maaci maccillaatoon shimaayito, dameroonaa ceelloona tuneti, muttee tuppoochee ciciitaa yokkeeti woshiqoona shippeti qoreddoochee shuunebe. Aree toommooch kiruubeenaꞌo malletiitaa shippebeete. 32Birewoochee shuuneeti awudde baatee toommooch neexeti, geellee mixoochee shuunee, aachoona dikkeeti awudde giimbee toommooch beeti, aachoochee shuuneeti kaꞌeenaꞌooch yeenderikkibe. 33Maccillaatoon qamaaxireenaꞌooch kaꞌiichi, wogee taabootoon maac giijjiree, maccillaatee gubbaa kotiibe. Ebina maccillaatoo Yaafe Xaaꞌoon Yaafe Xaaꞌeexi Yaafoyee barbariyemmone. 34Axaaxoon maariyee guufoon Yaafe Xaaꞌeexi Yaafooch beeti, wogee taabootee toommooch kotiibe. 35Madelloon taabootoon bariibeeti maccillaatoyee maach, dambi-waan, maqirajjoonoo ebi madellee ciinooch, deshi-waan, kotiibe.
36“Duukkaanee kellee maccillaatoon shimaayito, dameroonaa ceelloona tuneti, muttee tuppoochee ciciitaa yokkeeti woshiqoona shippeti qoreddoochee shuunebe. Aree toommoochoo shashiiree shife. 37Ebi maccillaatoyich geellee mixoochee uuche giimbeenaꞌon shuuneree aachoona dikkebe. Ebi giimbeenaꞌoyich kaꞌeenaꞌon aachoochee shuunebe. Uuche baatoonoo gooshoochee shuunebe.
Currently Selected:
Keyo 26: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
