Keyo 25
25
Yaafee Duukkaanoon Shuunoyich Giddemmi Wojjoo
(Keyo 35:4-9)
1Doono Yeeri Muusich ishichiye: 2“Wojjoon taach boonoshi deebemmoyich, Israꞌeeleenaꞌoyich gete. Mulloochee tiijjiꞌi imma qaawiti asho bulli waanee wojjoon deꞌe. 3Boonoshi waanee ne deqqemmi wojjeenaꞌo eboshine: aachoo; birewoo; gooshoo; 4shimaayito, dameroonaa ceelloona tuneti woshiqoo; muttee tuppoochee shippeti qoreddoo; emmishee eexoochee shippeti qoreddoo; 5qucaa shuuneeti, bagee baaddoochi gooqqo; gaawichaa qucheti bare gijjee gooqqo; geellee mixo; 6ceechoyich tunemmi zayito; huutee zayitoonaa cinnechi ixaanoonoyich tunemmi qimaamo; 7qeeshee guudoochi efoodoonaa geteexi kiisoonochi toommooch geddeyemmi aaxxe xaqqeenaꞌo, eboshiyoo shohaamo getteebeeti aaxxe xaqqoonaa bare aaxxe xaqqeenaꞌonane.
8“Boonoshi daggooch ta beeyemmoyich, yaafee duukkaanoon taach boonoshi shuunemmoyich tuniibe. 9Yaafee duukkaanoonaa bi daggooch beeti qiico bullinon neech ta bekkiimmi gommona shuunebote.
Wogee Taabooto
(Keyo 37:1-9)
10“Taabootoon geellee mixoochee boonoshi shuunemmoyich tuniibe. Ebi taabootoo bi gidoo gutte hiraa qato, bi maaco ikke hiraa qato, bi neexoo ikke hiraa qato tunebe. 11Bi maacinaa maachinon xalle aachoona dikkebe. Bi guude gawe goconoo aachoona shuunebe. 12Awudde qalibetoon aachoochee shuuneree, guttoon ikke baddaa, guttoon wotta bare baddaa tuniiree, awudde baatoona tookki yeshiibe. 13Aroochee gutte yareenaꞌon geellee mixoochee shuuneree aachoona dikkebe. 14Taabootoo shaaggeyemmoyich, ebi yareenaꞌon taabootee naabooch geddeti qalibeteenaꞌochi aahoona beshiiree giijjibe. 15Ebi yareenaꞌo taabootee qalibeteenaꞌo daggooch beebeete; ebi aroochee ciroona kechaayeete. 16Neech ta immemmi, sheeroo kooreeti gutte yalle xaqqeenaꞌon taabootee maac kotiibe.
17“Axaaxoon maariyee guufoon xalle aachoochee shuunebe. Ebi guufo bi gidoo gutte hiraa qato, bi maaco ikke hiraa qato tunebe. 18Axaaxoon maariyee guufee goconaa goconooch tunemmi, gutte kiruubeenaꞌon aachoon qici shuunebe. 19Ikke kiruuboon ikke baddi gocooch, wotta ikke kiruuboon bare baddi gocooch tuniibe. Boonoshiyoo axaaxoon maariyee guufoona tookkii ikkochee shuuneetinaꞌo tunebeete. 20Kiruubeenaꞌo boonoshinaa boonoshina ciinee beetinaꞌo tuneechi, boonoshi aafoon axaaxoon maariyee guufo waan tuniibeete; boonoshi qoshoon yaggiree axaaxoon maariyee guufoon yiiribeete. 21Neech ta immemmi, sheeroo kooreeti gutte yalle xaqqeenaꞌon taabootee maac kotiibe. Aroochee axaaxoon maariyee guufoon taabootee toommooch kotiibe. 22Taabootee toommooch beeti gutte kiruubeenaꞌochi gutte daggooch, axaaxoon maariyee guufee tookk tuneechi, neenna danemmo taane. Israꞌeeleenaꞌoyich tunemmi ta geto bullin neech gettemmo taane.
Yaaree Kosho Kotemmi Madelloo
(Keyo 37:10-16)
23“Madelloon geellee mixoochee shuunebe. Ebi madelloo bi gidoo gutte hiroo, bi maaco ikke hiroo, bi neexo ikke hiraa qato tunebe. 24Xalle aachoona dikkebe. Bi guude gawe gocon aachoona shuunebe. 25Ikke ciixi qach bede goci degoon bi guude gawoona shuunebe. Bi guude gawe goconoo aachoona shuunebe. 26Madelloyich awudde qalibetoon aachoochee shuuneree, awudde baatoo beeti awudde shuutoona yeshiibe. 27Madelloon shaagoyich tunemmi yareenaꞌon boonoshi yechemmoyich, ebi qalibeteenaꞌo goci degee katinooch tunebeete. 28Yareenaꞌon geellee mixoochee shuuneree aachoona dikkebe. Ebi yareenaꞌona madelloo shaakkeeba. 29Yalle saaneenaꞌonaa shaateenaꞌonon, ebiyoommon wotta uyee deejjoon ukkoyich tunemmi koddeenaꞌonaa quppe saaneenaꞌonon xalle aachoochee shuunebe. 30Ta aafooch beeyemmi, taach yaafeeti yaaree koshon ebi madellee toommooch bulli aaboon kotiibe.#Lew. 24:5-8
Ceechoo Kotemmi Maqirajjo
(Keyo 37:17-24)
31“Ceechoo kotemmi maqirajjoon xalle aachoochee shuunebe. Bi neexemmi baatoonaa yaaboonon qici shuunebe. Ebi maqirajjee bungeenaꞌonaa bi bungeenaꞌochi degeenaꞌona, ceechee zayito beeti qulleenaꞌoo maqirajjoona tookkii ikkochee shuuneetinaꞌo tunebeete. 32Maqirajjee ikke badd keejje ato, bare badd keejje ato bulla shiritte ato tunebe. 33Maqirajjoona tookkii yesheti shiritte ato, bi ikkikkoyich, luuzee michi bungoonaa bi degoonon shaahiitaa shuuneeti keejje qullo tunebe. 34Maqirajjee giindooch wotta luuzee bungoonaa bi degoonon shaahiitaa shuuneeti awudde qullo tunebe. 35Maqirajjee batti batti gutte ateenaꞌochi xepphooch, bi hilleexi gutte ateenaꞌochi xepphooch, keejjinneexi gutte ateenaꞌochi xepphoochoo, bungee dego tunebe. 36Ebi bungee degeenaꞌonaa ateenaꞌo bullina maqirajjoona tookki ikkochee shuuneetinaꞌo tunebeete; eboshi bulli xalle aachoochee qicaa shuuneebeete.
37“Aroochee shabaatte ceecheenaꞌon shuuneree, maqirajjee ciinooch beeti xaaꞌooch boonoshi aaxxe bekkemmoyich, maqirajjooch kotiibe. 38Qafeteenaꞌonaa ciitoo kiceyemmi yalle gafeteenaꞌonon xalle aachoochee shuunebe. 39Maqirajjoonaa bi qiiceenaꞌo bullinon shaashaa awudde kiilo giraamee xalle aachoochee shuunebe. 40Hini guudi toommoochaa neech ta bekkiitoommi gommona shuunoyich neen ariibe!
Currently Selected:
Keyo 25: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
