Yibbaatoo 21
21
Ashoon Wuxiti Asho Dano Qayigaata Tunemmi Mooyo
1Muusi Israꞌeeleenaꞌoyich ishichiye: “Ne Nuggishoo Doono Yeeri ne hajjemmoyich neech bi immiibeeti showoochaa ikke asho ashi kishoona qitiꞌi, bi dubeno xalle gaddoochee bi danegaata, biin wuxito konigaata bi arichoo qayigaatoo, 2ne daggeexi geeneenaꞌonaa woraaferasheenaꞌona aree katinooch beeti katemeenaꞌoochee keyi waaree, uro qitiꞌi beeti xaaꞌoochee tiijjiree, bi katinooch beeti katemeenaꞌooch beddaahaa beeti xaaꞌoon qellayibeete. 3Uro qitiꞌi beeti xaaꞌee katinooch beeti katemeexi geeneenaꞌo shuunoyich bedaani, batt waanjoo bi qettooch haxxeyaani gidereen deebeete. 4Are gidereen woce aaco beeti, gochee woyee maayo shookkee ariyaani bambooch deebiree, bi qettimixon yexi tiisheete. 5Lewichi shiijjereenaꞌo tuneti qeesheenaꞌo wotta arooch hambeete. Ebiyoo asho ikkoo baroon xuꞌaa, taggeebeeti taggoon nallemminaꞌo boonoshi tunetoyichiye; wotta ne Nuggishoo Doono Yeeri biich boonoshi maddemmonaa bi shigoona boonoshi diiremmonoyich boonoshin bi kaaccitoyichiye. 6Aroochee ebi qititi uro beeti katemee katinooch beeti geeneenaꞌo ebi gidereechi meeshee toommoochaa boonoshi kishoon machebeete. 7Boonoshiyoo ishichibeete: ‘No kishoo ebi damoon ukkaanoone; koni biin wuxito gaatoo beegaano noone. 8Doono Yeero, Gibitsee biishaꞌa ne kichiti ne asheenaꞌo tuneti Israꞌeeleenaꞌon maaribe. Noon maariree hini qititi uroochi damoon no waanee qaawiyaahine’ geteete. Ebi uroochi damoyich maaroon danemminaꞌone. 9Ebina Doono Yeeri aafooch kaamoonaa tatoona tuneti mooyon tuniiree xalle ashi damoon ukkoona waabeeti xuꞌoon ne daggoochee wokkiyemmo neene” iye.
Ginoochee Kecaa Waati Maacheenaꞌochi Mooyo
10Muusi Israꞌeeleenaꞌoyich ishichiye: “Koyooch ne hamaa, Doono Yeeri ne etteenaꞌon ne kishooch beshiiꞌi bi imaa, boonoshin keccaa ne deebiyooba, 11ebi keccetinaꞌo daggoochee mallet gaawe maacheen beeggaa shunnaꞌa biin shaagga ne qaawigaata, 12biin ne kexooch daambe. Biyoo bi qelloon cakkebuye; bi gommoonoo qaambuye. 13Bi keccehooba, bi taheti tahoon shaddibuye. Ne kexooch koteree bi nihoonaa bi indeenoyich ikke agenoon bi eeppetoyee gubb, bi waan shagiree biich kenoon tunebe. Biyoo neech mecheen tunebuye. 14Neen emirikkoo bi qayigaata, bi shunnetooch bi hammemmoyich biin gawukkibe. Biin ne qeyetoyich, gijjoona kemon woyee gonneechoommon ciinon hakkaachine” iye.
Gutenee Bushoochi Woraashee Mooyo
15Muusi Israꞌeeleenaꞌoyich ishichiye: “Ikke asho gutte mecheen shaaggiichii, ikkeen shunnii bareen shixxii bi beetaa, boonoshi guttiyona anaami bushoon boonoshi shiyaa, shiichii shiijjeto bi shixi mecheechi bushoo bi tunegaata, 16bi gijjoon bi bushiisheenaꞌo woraashemmoyich bi qoodiyooba, shixi mechee waanee shiijjeti bi gutenee bushoon qayiichi shuni mechee waanee shiijjeto waan gaꞌeree biin gutenee bushoon tuniiree ciinnaaye. 17Bi shixi mecheechi bushoo bi tunetaanoona, gutte kishoon tunii, bi gijjoochee qoodi imiree gutenee bushoo bi tunoon arichiibe. Are bushoo bi nihoochi batti batti giidoo bi tunetoyich, gutenee bushittinee aalloo (gooroo) biichone” iye.
Babbere Bushoochi Mooyo
18Muusi Israꞌeeleenaꞌoyich ishichiye: “Ikke ashoyich bi nihoochi woyee bi indeechi getoon waayeyaache ii beeti, biin boonoshi sheeritaanona getaa giyaani babbere bushoo bi beegaata, 19bushoochi nihoonaa indeena bi beeti katemooch beeti geeneenaꞌo waan, katemee kellooch beeti addibaabooch biin daambeete. 20Boonoshiyoo geeneenaꞌoyich, ‘Hini no bushoo babberoonaa getaa giyaanoonane. No getoon waayeyaache itone. Biyoo gijjoon shaccechonaa mashechonane’ geteete. 21Ebina are katemeexi asheenaꞌo biin xaqqoona yexi wuxibeete. Ebin tuniyoona ebiyoommi gonde mooyon ne daggoochee wokkiibe. Ebina Israꞌeeleenaꞌo bulli ebin waayeree shattemminaꞌone” iye.
Baribare Sheereenaꞌo
22Muusi Israꞌeeleenaꞌoyich ishichiye: “Ikke asho qitooch bechemmi axaaxoon bi shuunetaa, biin wuxaꞌa bi dubenoon mixooch ne yoodigaata, 23ebi dubenoon arooch qeejjaanoon arooba duuhe. Ebiyoo mixooch yooddeto Yeerina uppeto bi tunetoyichiye. Ne Nuggishoo Doono Yeeri ne woraashemmoyich neech bi immiibeeti showoon ne eeꞌiyaachemmoyich arooba duuhe” iye.
Currently Selected:
Yibbaatoo 21: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
