Yibbaatoo 20
20
Koyooba Tunemmi Mooyo
1Muusi Israꞌeeleenaꞌoyich ishichiye: “Gibitsee neen kichii deebiti ne Nuggishoo Doono Yeeri neenna tookkii bi tunetoyich, ne ettoona koyeya koyooch hammaꞌa, neechoyee beshiti gaarin, hareshoonaa ginee naayinaꞌonon ne beegigaata, shattaahine. 2Koyeya ittoshi katiniyooba, qeeshoo aaf besheree asheenaꞌoyich, 3ishichibe: ‘Israꞌeeleenaꞌote, waayebote. Hanaach ittoshi etteenaꞌona tookki koyeya hammiibeeto ittoshine. Ittoshi mullo keqqaaye; shati qeweyaahote. 4Ittoshi Nuggishoo Doono Yeeri ittoshi etteenaꞌon kocha, wudoonoo ittoshi danemmoyich tuniiya ittoshina tookkii hammii beetone’ gete.
5“Aroochee ginee iraasheenaꞌo asheenaꞌoyich ishichibeete: ‘Andire kexon haggiꞌi diiriyaani asho beete? Bi beegaata, bi kexooch wottebe. Diqqich ginoochaa bi qitigaata, bare asho bi kexon diiriyemmone. 6Woyinoon bechiꞌi bi aafoon batt maataano beete? Bi beegaata, bi kexooch wottebe. Diqqich ginoochaa bi qitigaata, bare asho bi woyinee aafoon maayemmone. 7Mecheen maakkiichii batt shaagaano beete? Bi beegaata, bi kexooch wottebe. Diqqich ginoochaa bi qitigaata, baroo ebi ureen shaaggemmone’ geteete. 8Iraasheenaꞌo daakki asheenaꞌoyich ishichibeete: ‘Shattii, bi mullo keqqiibeeti asho beete? Bi beegaata, bi kexooch wottebe. Ebi tuno qayigaata, biichoommon bi maneenaꞌo mullo keqqemmone’ geteete. 9Iraasheenaꞌo asheenaꞌoyich ebin gettii boonoshi ciichitoyee gubb, guuphi guuphona qoodeeti asheenaꞌochi toommooch ginee iraasheenaꞌon iraashiibeete.
10“Ikke katemoon kocha ittoshi katiniyooba, kishoon boonoshi immemmoyich shiichi echebote. 11Neech diggoona wochiꞌi katemee kelloon boonoshi qechigaata, are katemooch beeti asheenaꞌo bulli guunon tuneree neech maddeminaꞌo tunebeete. 12Tunebaani ‘Kishoon imaache’ iꞌi neenna koyeya boonoshi qaawigaata, are katemoon giishi yeshiree koye. 13Ne Nuggishoo Doono Yeeri ne kishooch beshiiꞌi bi imiyooba, arooch beeti anaaminaꞌon goraadoona qecce wuxibe. 14Tunebaani maacheenaꞌon, gishiishi bushiisheenaꞌon, gijjeenaꞌonaa are katemooch beeti mooyo bullinon keciree neech tuniibe. Ne Nuggishoo Doono Yeeri neech immiti, ne etteenaꞌocho tuneti mooyon deꞌi neechon tuniibe. 15Ebin ne tuniyemmo, neyee oogichii wokkiꞌi beeti katemeenaꞌo bulli toommoochani, hini ne katinooch beeti aageteenaꞌo katemooch toonoone.
16“Tunebaani ne woraashemmoyich ne Nuggishoo Doono Yeeri neech immiibeeti, hini aageteenaꞌo katemeenaꞌooch beeti kashechi mooyo bullin wuxi aalliibe. 17Ne Nuggishoo Doono Yeeri neech bi gettitoommon, Hiteenaꞌon, Amooreenaꞌon, Kanaaneenaꞌon, Ferizeenaꞌon, Hiweenaꞌonaa Yebuseenaꞌonon ciroona hidi aalliibe. 18Ebiyoo boonoshi nuggisheenaꞌoyich boonoshi goyinnee maddee beegaata boonoshi tuniibeeti, ciigiiti mooyon ne shuunemmoyich neech boonoshi dojjaachemmoyich, wotta ne Nuggishoo Doono Yeeri toommooch axaaxoon ne shuuneyaachemmoyichiye.
19“Ikke katemoon koyi yecha meeti aaboon giichaa ne yeshiyooba, qofiyon daami bi aafo manjeebeeti mixon qecce aalliyaahine. Bi aafoon maayemmo ne tunetoyich, kuxxaahine. Ebi mixinaꞌo neech etteenaꞌo tooneenaꞌone. 20Katemoon ne yechemmi wottoon, bare mixinaꞌon kuxxaꞌa daqqoonaa macoonon shuunoona are katemee xaqqee uxeroon aroona beshoon hakkihine” iye.
Currently Selected:
Yibbaatoo 20: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
