Yibbaatoo 18
18
Qeesheenaꞌoyich Tunemmi Qoodoo
1“Qeesheenaꞌo tuneti Leweenaꞌo, Lewi yoodeenaꞌo bulli Israꞌeeleenaꞌona tookki qoodoon woyee iristoon deꞌaachemminaꞌone. Doono Yeerich giddeebeeti deejjoochee qoodoon deꞌeete. Ebi boonoshi qoodoone. 2Boonoshi maneenaꞌo daggooch iristo boonoshich beetaachemmone. Boonoshich bi gettitoommon, boonoshi iristo Doono Yeerine.#Had. 18:20
3“Gattoon woyee bagoon deejjiibeeti asho bi qoodoon tuniiree, qeeshoyich bi immemmo, wochoon, gammonaa maacee meenononiye. 4Ne maayoochee, woyinee uyoonaa zayitoonoochee maayi cilloon, wotta ne bagoochee shiichiꞌi cakketi eexon biich immemmo neene. 5Ebin qeesheenaꞌoyich ne immemmi naboo, Doono Yeeri, neexeree bi shigoona bulli yemeenoon boonoshi maddemmoyich, boonoshinaa boonoshi shiijjereenaꞌonon Israꞌeelee yoodo bulli daggoochee bi kaaccitoyichiye.
6“Ikke Lewee asho bi mullo tiyaa, bi koteti katemoon qajjii, Doono Yeeri kaacciti xaaꞌooch bi hamigaata, 7Doono Yeeri aafooch neexeꞌi maddeebeeti, biinoommi Leweenaꞌochoommon, biyoo bi Nuggishoo Doono Yeerichi shigoona maddebe. 8Bi kechi asheenaꞌo boonoshi hajjiton kemmiꞌi ambiche gijjoonona biich boonoshi deejjitaa, biinoommi Leweenaꞌona tookki tate maayoon deꞌe” iye.
Doono Yeeri Shixxiibeeti Mooyon Tuniyee Qayo
9Muusi Israꞌeeleenaꞌoyich ishichiye: “Ne Nuggishoo Doono Yeeri neech immiibeeti showooch ne giyiyooba, arooch beeti aageteenaꞌo shuuneebeeti, ciigiiti mooyon doyiyaahine. 10Ne daggooch bi bushoon woyee bi busheen qaaqqooch goggiꞌi deejjiibeeto woyee allaamoo woyee kaayecho woyee mareccee maaccecho woyee qooroo, 11woyee qaaxecho woyee dongecho woyee qititi ashoona tookkii yibbaateebeeto danaaye.#Key. 22:18; Lew. 19:26,31 12Ebi mooyon shuuneebeeto bullin Doono Yeeri ciigee beetone. Ne Nuggishoo Doono Yeeri ebi aageteenaꞌon ne aafoochee yookkii bi kichiibeeto, ebiyoommi ciigiiti mooyoyichiye. 13Ne Nuggishoo Doono Yeeri aafooch ikke oonaalli ashoon tunebe” iye.
Doono Yeeri Muusiyoommi Keemechon Deejjemmo Bi Tuno
14Muusi Israꞌeeleenaꞌoyich ishichiye: “Yoohi kichiya ne ii beeti aageteenaꞌo kaayecho woyee allaamoo waan hammii echii waayee beetinaꞌone. Tunebaani ne, ebin ne tuniyemmoyich ne Nuggishoo Doono Yeeri daaggaanoone. 15Ne Nuggishoo Doono Yeeri ne maneenaꞌo daggoochee taanoommi keemechon neech tiijjemmone. Bi gettimmon waayebe.#Mish. 3:22; 7:37 16Kooreebi guudooch ittoshi kiceehooba, ‘Qitemmo noone’ ii shattiꞌi, ‘No Nuggishoo Doono Yeerichi qaaroon wochinnoon waayaayone; ebi shattiibeeti qaaqqoonoo wochinnoon beeggaayone’ iꞌi qollehote.
17“Doono Yeeriyoo taach, ‘Ebi boonoshi qolleto tatoone. 18Boonoshi maneenaꞌo daggoochee neenoommi keemechon tiijjemmo taane; bi gettemmi mooyonoo biich gettemmo taane. Biyoo biich ta getteto bullin asheenaꞌoyich gettemmone. 19Ta shigoona ebi keemecho gettiibeeti ta qaaroon waayeyaache, immon ta qelloona ta, biin sheeremmo taane. 20Tunebaani bi gettemmoyich biich ta getaani mooyon aafoon kuppheꞌi ta shigoona keemmiibeeti keemechon woyee bare nuggisheenaꞌochi shigoona keemmii beeton wuxibote’ itone.
21“Newoo ne mulloona ‘Doono Yeeri getaani qaaro bi tunoon ariyoon aabichi hakkehone?’ ne getigaata, 22keemecho Doono Yeerichi shigoona getaa, are mooyo ceeno woyee iberoo tuno bi qayigaata, are mooyo Doono Yeeri ta getaani mooyone. Are keemecho aafee kupphoonane bi gettito; biin shattaahine” iye.
Currently Selected:
Yibbaatoo 18: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
