Yibbaatoo 17
17
Bachechi Gijjoon Deejjoo
1Muusi Israꞌeeleenaꞌoyich ishichiye: “Ne Nuggishoo Doono Yeerich, bachechi woyee shappe mooyo bi achooch beeti gattoon woyee bagoon deejjiyaahine. Ebiyoo ne Nuggishoo Doono Yeeri aafoochaa ciigeeto bi tunetoyichiye” iye.
Bare Nuggisheenaꞌoyich Goyinnee Maddeebeeti Ashi Toommooch Kindemmi Nalloo
2-3Muusi Israꞌeeleenaꞌoyich ishichiye: “Ne Nuggishoo Doono Yeeri neech imma ii beeti katemeenaꞌooch ne beetaa, ebi katemeenaꞌoochee ikkooch beeti ashoochee anaamo tuneba maachee ne Nuggishoo Doono Yeeri, tuniyaahote, iti mooyon bi tuniyoon, ebiyoo bare nuggisheenaꞌoyich woyee aabeyich woyee ageneyich woyee xojjenoyich goyinnee bi maddoon, ebin tuniyoona Doono Yeerin xuqqii, Israꞌeeleenaꞌona tookkii bi giyiti wogoonoo bi biishon diqqich waayemmo neene. 4Ebin ne waayehooba, ebi mooyon manjii xiishibe. Ebi iberoo tuneꞌi, Israꞌeelee showooch ebiyoommi ciigiiti mooyo shuuneyoo xiishoo bi tunegaata, 5ebi gonde mooyon shuuneti ashoon, anaamo tuneba maacheen, katemee kelloyee maach kichi, xaqqoona yexi wuxibe.#Key. 22:20 6Tunebaani boonoshi qitemmo, gutte woyee keejje miixoo boonoshi toommooch miixegaata baachiye. Ikke miixoo baach boonoshi toommooch miixegaata, qitaayeete.#Had. 35:30; Yibba. 19:15 7Ebi ashoon wuxoyich, miixeenaꞌo shiichi xaqqoona yexeete; aroochee echeti asheenaꞌo yexeete. Ebin tuniyoona ebi gonde mooyon ne daggoochee wokkiibe” iye.
Magge Mooyon Nalloo
8Muusi Israꞌeeleenaꞌoyich ishichiye: “Ittoshi katemooch beeti ikkikke mooyo nallii kuxoyich nallechinaꞌoyich oogeti maggoo tunemmone. Ebiyoo ikke asho ashoon bi wuxito, gabii kuxxiꞌi bi tunoonaa diqqoona bi tunoonon, ashoon bi yexxito woyee ashi qiicoon bi duubiito ariibee bi tunoonaa diqqoona bi tunoonon bariiꞌi ariyoone. Ebi mooyo tunehooba, ne Nuggishoo Doono Yeeri kaacciti xaaꞌooch tiyi hambe. 9Ebi mooyon qeesheenaꞌo tuneti Leweenaꞌonaa aroobee yemeenooch qeejjiibeeti woraaferashoonoyich giddiibe. Boonoshiyoo ebi mooyon nallibeete. 10Doono Yeeri kaacciti xaaꞌoochaa mooyon nalli kuxiree, amoon ne tuniyemmo gaata neech gettemminaꞌone. Neech boonoshi gettiton shappayaanoon tuniibe. 11Boonoshi nalloonaa yibbaatee kuxxiꞌi neech boonoshi gettiti mooyonon tuniibe. Boonoshi nallii kuxxiti mooyoochee qanna yoocha gettaahine. 12Ne Nuggishoo Doono Yeeri aafooch neexeechii maddeebeeti qeeshoyich woyee woraaferashoyich ‘Deꞌa getaache’ ii beeti asho qitibe. Ebin tuniyoona ebi gonde mooyon Israꞌeelee showoochee wokkiibe. 13Asho bulli ebin bi waayegaata, shattemmone; wochinnoon ebiyoommi gonde mooyon shuunoyich aafoon kuppheyaachemmone” iye.
Taatoon Kaacooba Tunemmi Mooyo
14Muusi Israꞌeeleenaꞌoyich ishichiye: “Ne Nuggishoo Doono Yeeri neech immiibeeti showooch ne giyiyooba, showoon woraashaꞌa arooch ne kotehooba, ‘Ta guudoona beeti aageteenaꞌochoommon, taatoo taach qaawiihe’ gettemmo neene.#1 Saam. 8:5 15Ebiyooba ne Nuggishoo Doono Yeeri kaaccimmon ne toommooch taatiibe. Israꞌeelee yaroo tunetonani, Israꞌeelee yaroo tuneyaani shiqqoon ne toommooch taatiyaahine. 16Ebi taatoo meeti hareshoon hajjaaye; meeti hareshoon danoyich asheenaꞌon Gibits daachiyaaye. Ebiyoo Doono Yeeri bi asheenaꞌo arooch boonoshi wotteyaachemmoyich bi gettitoyichiye. 17Ebi taatoochi mullo Doono Yeerichi gommoochee bi muricaachemmoyich, meeti mecheen shaaggaaye; aachoonaa birewoononoo biich meechaaye.
18“Taatee qeenooch bi kotehooba, hini Sheeree Macaafoon qeeshoo tuneti Leweenaꞌo waanee daamiree, bi qellich macaafooch bi kooreyemmoyich tuniibe. 19Bi Nuggishoo Doono Yeerin shaton bi doyemmoyich, hini sheeroonaa qociyoonon manjii bi quyemmoyich, hini macaafo bi waanee baraaye. Kashoona bi beemmi yemeeno bullin qemi qemona shemmebe. 20Ebin bi tuniyoo, ‘Ta maneenaꞌoyee besho taane’ geti bi gabaachemmoyich, wotta Yeerichi getoochee qanne badd woyee yooche badd bi wotteyaachemmoyich biin quyemmone. Ebina biinnaa bi shiijjereenaꞌona Israꞌeeleenaꞌo toommooch meeti yemeenoon taatemminaꞌone.
Currently Selected:
Yibbaatoo 17: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
