Yibbaatoo 11
11
Doono Yeeri Bi Asheenaꞌoyich Tuniiti Gaawe Mooyo
1Muusi Israꞌeeleenaꞌoyich ishichiye: “Illa ebich ne Nuggishoo Doono Yeerin shune. Ne tuniyemmoyich bi qaawiibeeti mooyo bullin, bi qociyoon, bi dojjiti doyoonaa bi getoonon bulli aaboon ceechi quyebe. 2-3Ittoshi Nuggishoo Doono Yeeri biinna tookkii ittoshi tunoona ittoshich bi dojjiton eke and shalligibote. Ebi mooyon beeggiꞌi doyito ittoshi qelloona ittoshiyani, ittoshi bushiisheenaꞌo tooneenaꞌone. Gibitsaa worganikkiti malletoon tuniyoona Gibitsee taatoo Farooninaa bi showoo bullina oogeton xuuxemmoyich bi tuniihooba, Doono Yeeri bi oogoon, kupphe bi kishoonaa giidechi bi mochoonon bi bekkiitaa, beeggito ittoshine. 4Gibitsee ginee naayinaꞌo ittoshin yookkii boonoshi dabbiyooba, boonoshin, boonoshi haresheenaꞌonaa gaarinaꞌonon Doono Yeeri Ceelle baharo qooxxemmoyich tuniiꞌi ciroona boonoshin bi aalliyoon beeggito ittoshine.#Key. 14:28 5Hini xaaꞌooch waa ittoshi shaggimmi wottoon barahoochaa Doono Yeeri ittoshich tuniiti mooyon beeggito ittoshine. 6Roobeeli yoodoochee tuneti, Eliyaabi bushiisheenaꞌo Daataaninaa Abiraaminochi toommooch amoon bi tuniito gaata beeggito ittoshine. Asho bulli ciinnii beetaa, showoo haawutteꞌi boonoshin, boonoshi kechi asheenaꞌon, boonoshi duukkaanoon, boonoshi guuninaꞌonaa gijjeenaꞌona tookkii qooxxiye.#Had. 16:23,31-32 7Doono Yeeri ooge bi giidoona ebi bulli mooyon bi tuniyoon ittoshi hajjee aafoona beeggito ittoshine” iye.
Bi Asheenaꞌoyich Gaawe Mooyon Tuniiya Doono Yeeri Gibenikkoo
8Muusiyoo daakkiꞌi ishichiye: “Hanaach ittoshich ta gettaabeeti geteenaꞌon ceechii ittoshi quyegaata, katinoon Yoordaanoosin kimiree ittoshi woraashemmi showoon kochii yeshoyich giidechon tunemmo ittoshine. 9Boonoshinaa boonoshi shiijjereenaꞌonoyich imma Doono Yeeri ittoshi qaabbechinaꞌoyich wogeꞌi bi gibenikkiti, ejjoonaa eeyona xuupphiibeeti showooch meeti yemeenoon kotemmo ittoshine. 10And giyi woraashiya ittoshi ii beeti showoo gawukkiꞌi ittoshi kechiti Gibitsee showoommo toonoone; ebi aroochaa yaroon shookkiichii daaddee bechoochoommon, aacon uchoyich aajjiibee echeto ittoshine. 11Giyiree ittoshi woraashiya ii beeti showoo geppoonaa bamboona beeti showoo, shimaayoochee amiyon daneebeeti showoone. 12Ebi showoo ittoshi Nuggishoo Doono Yeeri shiimee yechiibeeti showoo, nati gimoochee nati ciirooch beddaahaa, ciinoochee bi aafoon bi kuxaani showoone.
13“Hanaach ittoshich ta gettaabeeti geteenaꞌon ceechi quyebote. Ittoshi Nuggishoo Doono Yeerin shunote. Ceeni ittoshi mulloona, ceeni ittoshi kashoonoo biich goyinne maddebote. 14Ebin ittoshi tuniigaata, biyoo ittoshich naawee amiyonaa yoochi amiyonon bi goori gooroona bi dichaa, maayoon, woyinoonaa zayitoonon maci kicemmo ittoshine. 15Ittoshi gijjeenaꞌoyich tunemmi mocoon ittoshi showooch colliyemmone. Ittoshiyoo maa michemmo ittoshine.#Lew. 26:3-5; Yibba. 7:12-15; 28:1-14 16Bare nuggisheenaꞌoyich ittoshi goyinne maddemmoyich, ittoshi mullo ittoshin bi geechaachemmoyich ittoshi qelloon ariibote! 17Ebin ittoshi tuniigaata, Doono Yeeri kaaro ittoshi toommooch cufemmone. Biyoo amiyo dihaa showoo maayoon bi shakkiyaachemmoyich shimaayoon hiccemmone. Doono Yeeri ittoshich immiibeeti gaawe showoochee kaateree aallemmo ittoshine.#Yibba. 7:16; 28:15-44
18“Illa ebich ebi ta qaareenaꞌon ittoshi mulloonaa ittoshi eengoonooch kotiibote. Batteyaanoon shalligi ittoshi beeyemmoyich, kooriree ittoshi kishoonaa baree gutte daggoonooch tifote. 19Ittoshi bushiishoyichoo dojjibote. Kexooch ne kotaa beegaata, gommona ne hammaa beegaata, ne qeyaa beegaata, ne tiyaa beegaatoo ne noonoochee kuxaanoon gete. 20Ne kechi kellee qoomeenaꞌooch, ne katemee uxeree kelloochoo kooribe.#Yibba. 6:6-9 21Ebin ittoshi tuniigaata, Doono Yeeri ittoshi qaabbechinaꞌoyich imma wogeꞌi bi gibenikkiti showooch ittoshinaa ittoshi bushiisheenaꞌona meeti yemeenoon beeyemmo ittoshine. Shimaayoo showee toommooch bi beemmi wottoon arooch beeyemmo ittoshine.
22“Ittoshi Nuggishoo Doono Yeerin ittoshi shunnemmoyich, bi gommo bullina ittoshi hammemmoyich, biinna tookkishoo ittoshi ikkottemmoyich, ittoshi ceechi quyemmoyich ittoshich ta gettaabeeti ebi geto bullin ceechii ittoshi quyegaata, 23Doono Yeeri ebi aageteenaꞌo bullin ittoshi aafoochee yoohi kichemmone. Ittoshiyee beshe giidechinaꞌonaa woddeenaꞌona tuneti aageteenaꞌon yoohi kichemmo ittoshine. 24Ittoshi baatoo neexxiti showoo bulli ittoshicho tunemmone. Ittoshi showee daaro deshi-waan beeti barahoochee tiijjiree, dambi-waan beeti Libanoosi guudinaꞌooch beddaahaa, aabi-keyo waanaa Efiraaxisi aaconaa aabi-gimo waanaa Meditiraanee baharoonooch beddaahaa tunemmone. 25Ittoshi aafooch kuppheree neexemmo koniyoona aalloone. Ittoshi Nuggishoo Doono Yeeri ittoshich bi gibenikkitoommon, ittoshi shaggimmi showoo bulliich beeti asheenaꞌo ittoshin shatiree boonoshi qewemmoyich tuniyemmone.#Yaas. 1:3-5
26“Illa ebiyoche, hanaach diiroonaa ufonon ittoshi aafooch tuniito taane. 27Diiroo ittoshich bi tunemmo, hanaach ittoshich ta gettaabeeti, ittoshi Nuggishoo Doono Yeerichi getoon ittoshi ceechi gaatane. 28Tunebaani ufo ittoshi toommooch bi tunemmo, ittoshi Nuggishoo Doono Yeerichi getoon quyo ittoshi qayigaata, hanaach ittoshich ta gettaabeeti getoona hamon qajjiꞌi, ittoshi ariyaani bare nuggisheenaꞌon dabboyich badd ittoshi wottegaatane. 29Giyi woraashiya ne hammaabeeti showooch ne Nuggishoo Doono Yeeri neen bi giijjiyooba, Gerizimi guudi toommoochaa diiroon, wotta Ebaali guudi toommoochaa ufon awaajjemmo neene.#Yibba. 27:11-13; Yaas. 8:33-35 30Ittoshi arii beetoommon, ebi guudinaꞌo beeto, Yoordaanoosi aacoochaa aabi-gimo waan, Yoordaanoosi bambooch beeti Kanaaneenaꞌo showoochiye. Ebiyoo Galigali katemee gaꞌooch, Mooreehichi goree katinoochiye. 31Ittoshi Nuggishoo Doono Yeeri ittoshich immiibeeti showooch giyi woraashiya Yoordaanoosin kimma ii beeto ittoshine. Are showoon hajjiꞌi arooch ittoshi kotehooba, 32hanaach ittoshich ta gettaabeeti qociyeenaꞌo bullinaa doyeenaꞌo bullinon ittoshi tuniyemmoyich, ittoshi qelloon ariibote” iye.
Currently Selected:
Yibbaatoo 11: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
