Yibbaatoo 10
10
Geteenaꞌo Kooreeti Andire Yalle Xaqqeenaꞌo
(Keyo 34:1-10)
1“Aabbe areddoonaa aabbe xumoona ciiremmona, Doono Yeeri taach ishichiye: ‘Aafichoommi gutte xaqqoon xaribe. Mixoochee taabootoon shuuneree, eboshin yeshi ta waan, guudi toommooch wobe. 2Aafi ne tiicheti yalle xaqqeenaꞌo toommooch kooreeti qaareenaꞌon ebi areenaꞌo toommooch ta kooraa, taabootooch geddemmo neene’ iye.
3“Ebina geellee mixoochee taabootoon shuunaa, aafichoommi gutte yalle xaqqoon xaraa yechaꞌa guudi toommooch kecheho. 4Iitoo kiceehooba, guudi toommoochaa, qaaqqee daggoochaa Doono Yeeri ittoshich bi gettiti, ebiyee aaf bi kooritoommi aashire geteenaꞌon arooch kooriye; Doono Yeeriyoo eboshin taach immiye. 5Tawoo guudi toommoochee wotteho; Doono Yeeri taach gettitoommon, ta shuuneti taabootee daggooch ebi yalle xaqqeenaꞌon kotiiho. Aroochoo beeheete” iye.
6Israꞌeeleenaꞌo Beeroot Bene Yaqaanee#10:6 Ebi geto, “Yaqaanee asheenaꞌochi aachi oppo” getone. tiyii, Moseraah hammiyeete. Ebi aroochaa Harooni qitiꞌi duukkehe. Bi bushoo Elazaari bi xaaꞌooch kereeꞌi, qeeshee guudo tuneꞌi ukkirehe.#Had. 20:28; 33:38 7Aroochee tiyii Gudigoda, wotta Gudigodee tiyii meeti woce aaco beeti, Yoxibaat hammiyeete.
8Muusi daakkiꞌi ishichiye: “Arooba Doono Yeeri bi wogee taabootoon boonoshi shaaggemmoyich, bi aafooch neexeree boonoshi maddemmonaa bi shigoona boonoshi diiremmonoyich, Lewi yoodoon bariihe. Ebinoo hanaach beddaahaa tunii beetinaꞌone.#Had. 3:5-8 9Ebich Lewi yoodoyich bi maneenaꞌo daggooch bi qoodoo woyee iristo aalloone. Ne Nuggishoo Doono Yeeri biich bi gettitoommon, bi iristo Doono Yeerine.
10“Tawoo ebiyee aaf ta tuniitoommon, aabbe areddoonaa aabbe xumoonon guudi toommooch yagiyoye. Doono Yeeri arooboo wotta ta qolloon waayeꞌi, ittoshin wuxaanoon qajjiye.#Key. 34:28 11Aroochee taach ishichiye: ‘Tibe; boonoshi qaabbechinaꞌoyich imma ta wogeti showooch giyi boonoshi hajjemmoyich, ebi asheenaꞌoyee aaf shiichi qaxiribe’ iye.
Doono Yeerich Goyinnee Maddoonaa Biin Oogiyoona
12“Andoo Israꞌeelo, ne Nuggishoo Doono Yeeri ne waanee bi qaawiibeeto, amooniye? Ne Nuggishoo Doono Yeerin ne shattemmoyich, bi gommo bullina ne hammemmoyich, biin ne shunnemmoyich, ceeni ne mulloonaa ceeni ne kashoona biich ne goyinne maddemmoyich, 13bi getoonaa bi qociyoonon ne quyemmoyichiye. Hanaach ebin neech ta gettaabeeto, mooyo neech bi kaamemmoyichiye.
14“Shimaayoonaa shimaayeexi shimaayoona, showoonaa bi toommooch beeti mooyo bullina ne Nuggishoo Doono Yeerichone. 15Tunebaani Doono Yeeri ittoshi qaabbechinaꞌon bi shunniti shunoo manjoo bi tunetoyich, showee toommooch beeti aageteenaꞌo bulli daggoochee, boonoshi shiijjeroo tuneti ittoshin kaacciye. Ebich and beddaahaa ittoshi biinna kaacheti asho ittoshine. 16Illa ebich, ebiyee damba Doono Yeerich deꞌa getote. Babberittinoonoo qayote. 17Ittoshi Nuggishoo Doono Yeeri, nuggisheenaꞌochi Nuggishoonaa dooninaꞌochi Doononane. Biyoo giidecho, hakkechonaa shattiitona tuneti Nuggishoone. Ashoon barbariiꞌi heppaache; xuccoonoo maataache. 18Biyoo nihaalleenaꞌonaa xuumeenaꞌonoyich nallii beetone; noonna tookkii koteti shiqqeenaꞌonoo shunnii beetone; boonoshichoo maayoonaa tahoonon immii beetone. 19Illa ebich shiqqoon shunote. Ittoshiyoo ebiyee aaf Gibits shiqqoo tuneꞌi beebee echeto ittoshine. 20Ne Nuggishoo Doono Yeerin shate. Biich baach goyinne maddebe. Biinna tookki ikkottebe. Bi shigoonoo wogebe. 21Biin naadibe. Biyoo ne Nuggishoone. Ne aafoona ne beeggeti, ebi are giidechonaa shattiitona tuneti mooyon neech tuniitone. 22Ne qaabbechinaꞌo Gibits boonoshi hammito, shabe asheenaꞌo baach tuneꞌiniye. Tunebaani and ne Nuggishoo Doono Yeeri shimaayeexi xojjenoochoommon, neen meechitone” iye.#Hal. 46:27
Currently Selected:
Yibbaatoo 10: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
