Daaneeli 3
3
Taatoo Neechiti Aachoochee Shuuneeti Misilo
1Taatoo Nabukadinatsori bi neexo shiche hiroo, bi gidoo shiritte hiroo tuneti misiloon aachoochee shuuniihe. Aroonoo Baabloonee showooch beeti, Duuri bakkooch neechiihe. 2Aroochee taatoo Nabukadinatsori iraasheenaꞌon, ukkireenaꞌon, woraaferasheenaꞌon, mikkirechinaꞌon, araaqee iraasheenaꞌon,#3:2 Araaqee iraashoo taatoochi qiiceenaꞌo bulli toommooch iraashoo tuneti ashoone. nallechinaꞌon, showee geeneenaꞌonaa showoon qeejjii beetinaꞌo bullinon bi neechiti misilee diiree baarooch boonoshi woyemmoyich ceekkiihe. 3Ebi iraasheenaꞌo, ukkireenaꞌo, woraaferasheenaꞌo, mikkirechinaꞌo, araaqee iraasheenaꞌo, nallechinaꞌo, showee geeneenaꞌonaa showoon qeejjii beetinaꞌo bullina taatoo neechiti misilee diiree baarooch waaꞌi, ebi misilee aafooch neexeheete.
4Aroochee awaajjee gettecho bi qaaroon oogichiꞌi, “Ashi yaroo bulliichee, aagetoo bulliichee, asho yibbaateebeeti noonoo bulliicheenoo kiceeti asheenaꞌote, ittoshich getteeto ebine: 5‘Xurumbee qaaroon, tiimbe qaaroon, tiree qaaroon, shumburee qaaroon, giishi ximbee qaaroon, ooge ximbee qaaroon, ebi duubbi qiiceenaꞌo bullichi qaaroon ittoshi waayegaata, ta neechiti, aachoochee shuuneeti misiloyich baroona guuferee goyinnebote! 6Baroona guufeꞌi goyinneyaano koniyoona bi beegaata, aaxxeebeeti qaaqqee sheellooch bekkech duppeyemmone’ itone” iye.
7Ebich xurumbee qaaroon, tiree qaaroon, shumburee qaaroon, giishi ximbee qaaroon, ooge ximbee qaaroon, ebi duubbi qiiceenaꞌo bullichi qaaroon boonoshi waayehooba, ashi yaroo bulliichee, aagetoo bulliichee, asho yibbaateebeeti noonoo bulliicheenoo kiceeti asheenaꞌo bulli taatoo Nabukadinatsori neechiti, aachoochee shuuneeti misiloyich baroona guufeꞌi goyinneheete.
Keejje Gurimaasheenaꞌon Asheenaꞌo Taggo
8Areegaata, Baabloonee asheenaꞌoochee ikkikkeenaꞌo taatoo waan giddeꞌi Ayihudeenaꞌon taggeheete. 9Boonoshiyoo taatoo Nabukadinatsorich ishichiyeete: “Taatoocho, hume naton taatebe! 10-11Taatoocho, xurumbee qaaroon, tiree qaaroon, shumburee qaaroon, giishi ximbee qaaroon, ooge ximbee qaaroon, ebi duubbi qiiceenaꞌo bullichi qaaroon waayemmo bulli baroona guuferee aachoochee shuuneeti misiloyich bi goyinnemmoyich, baroona guufeꞌi goyinneyaano koniyoona bi beegaata, aaxxeebeeti qaaqqee sheellooch bi duppeyemmoyich awaajjoon kichito neene. 12Tunebaani taatoocho, Baabloonee woraafooch boonoshi shuunemmoyich ne iraashiiti ikkikke Ayihudeenaꞌo, eboshiyoo Sidiraaqi, Misaaqinaa Abidinagina, ne getoon mooch haddaaneenaꞌone. Ne nuggisheenaꞌoyich maddaacheete; aachoochee shuuniyaꞌa ne neechiti misiloyichoo goyinneyaacheete” iyeete.
13Ebich taatoo Nabukadinatsori oogeti ippoona Sidiraaqin, Misaaqinaa Abidinaginon deebi bi aafooch boonoshi neechemmoyich tuniihe. 14Nabukadinatsori boonoshich ishichiye: “Haanoshite! Sidiraaq, Misaaq, Abidinago! Ta nuggisheenaꞌoyich maddaachone ittoshi getonaa aachoochee shuuniyaꞌa ta neechiti misiloyich goyinneyaachone ittoshi getona iberoone? 15Andoo xurumbee qaaroon, tiree qaaroon, shumburee qaaroon, giishi ximbee qaaroon, ooge ximbee qaaroon, ebi duubbi qiiceenaꞌo bullichi qaaroon ittoshi waayemmona, ta neechiti misiloyich baroona guuferee goyinneya ittoshi qannigaata, gaawiye. Goyinno ittoshi qayigaata, aaxxeebeeti qaaqqee sheellooch bekkech duppeyemmo ittoshine. Ta kishoochee ittoshin wodiyemmi nuggishoo, konine?” iye.
16Sidiraaqi, Misaaqinaa Abidinagina Nabukadinatsorich ishichiꞌi wochiyeete: “Taatoocho, ebi echoyich wochoo nooch qaawiyaani mooyone. 17Taatoocho, aaxxeebeeti qaaqqee sheellooch no duppegaata, biich no goyinnaabeeti Nuggishoo noon wodiyoon hakkiye; ne kishoocheenoo noon wodiyemmone. 18Tunebaani taatoocho, noon wodiyoon bi qayi gaatoona, ne nuggisheenaꞌoyich goyinneyaachemmo, aachoochee shuuniyaꞌa ne neechiti misiloyichoo goyinneyaachemmo no tuno neech aricheton tunebe” iyeete.
Qaaqqee Sheellooch Keejje Gurimaasheenaꞌo Duppeyoo
19Aroochee Nabukadinatsori Sidiraaqi, Misaaqinaa Abidinaginochi toommooch oogeton ippee shinehe; bi aafoo aaqqiye. Ebi qaaqqee sheelloo bi gaamooch shabaatte kishoon daakkiree bi gaamemmoyich bi asheenaꞌoyich gettiye. 20Bi ginee naayinaꞌo daggoochee giidechinaꞌo tuneti asheenaꞌo Sidiraaqin, Misaaqinaa Abidinaginon cuyiree qaaqqee sheellooch boonoshi duppemmoyich gettiye. 21Boonoshiyoo ebi asheenaꞌon boonoshi iddimo, kittoo, qelli caacoonaa bare boonoshi taho bullina tookkii cuchiꞌi daammii qaaqqee sheellooch duppiyeete. 22Qaaqqoo gaawichiree bi gaamemmoyich taatoo manjiiꞌi bi gettitoyich, Sidiraaqin, Misaaqinaa Abidinaginon daammii duppiti asheenaꞌon qaaqqee nalloo michii wuxiye. 23Ebi keejje asheenaꞌo boonoshi cuchetona aaxxeebeeti qaaqqee sheellee daggooch dihiyeete.
24Areegaata taatoo Nabukadinatsori worganoona bi kotetoochee bekkech capphii tiyiꞌi, bi mikkirechinaꞌoyich, “Cucheree qaaqqee daggooch boonoshi duppeyemmoyich no tuniito, keejje asheenaꞌon toone?” iye.
Boonoshiyoo “Taatoocho, iberoone; keejje asheenaꞌoniye” iyeete.
25Biyoo daakkiꞌi, “Ebiyoche, awudde asheenaꞌo qaaqqee daggoona shaꞌee beetinaꞌon beeggaabeeto taane. Boonoshiyoo cucheyaaneenaꞌone. Boonoshi qeddoo ciroona micaanoone. Awuddinnoo nuggisheexi ikkooniye bi shaahiibeeto” iye.
Keejje Asheenaꞌoyich Taatoo Nabukadinatsori Oogoon Wojjoo
26Nabukadinatsoriyoo qaaqqee sheellee kellooch giddeꞌi, “Beshe Nuggishoo Yeeri guuno tuneti Sidiraaq, Misaaq, Abidinago! Waa keyote; hach wobote” iye. Boonoshiyoo kechiyeete.
27Iraasheenaꞌo, ukkireenaꞌo, woraaferasheenaꞌonaa mikkirechinaꞌona ikkooch kiceeꞌi, ebi keejje asheenaꞌochi qeddoon qaaqqoo ciroona michaano bi tunoon beeggiyeete. Qaaqqoo boonoshi qelli eexon tuneba boonoshi taheti tahoon michaanoone. Qaaqqee sheerolla boonoshi achooch aalloone.
28Aroochee taatoo ishichiye: “Bi maraakoon deejjiꞌi, boonoshi Nuggishoyee besh bare nuggishoyich maddoonaa goyinnoonon qajjiti, ta getoon qajjiti, boonoshi kashoon beshiiꞌi immiti, biinoo gibeneti bi guuninaꞌon wodiiti, Sidiraaqi, Misaaqinaa Abidinaginochi Nuggishoo diireebe!
29“Ebich ebiyoommon wodiibeeti bare nuggishoo aallo bi tunetoyich, Sidiraaqi, Misaaqinaa Abidinaginochi Nuggishoo toommooch gonde mooyon yibbaatemmi, ashi yaroo bulliichee, aagetoo bulliichee, asho yibbaateebeeti noonoocheenoo tuneti asho koniyoona, bi ashittino qecciqeccaayaa bi kuchemmonaa bi kexo happaa bi aallemmonoyich getteto taane” iye.
30Aroochee taatoo Sidiraaqin, Misaaqinaa Abidinaginon Baabloonee showooch aafichoyee beshe xaaꞌooch iraashiihe.
Currently Selected:
Daaneeli 3: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
