Daaneeli 2
2
Nabukadinatsori Gummiti Ikkinnee Gumo
1Nabukadinatsori bi taateti guttinnee natooba, gumon gummiye. Ebi gumo biin oogeton bi keqqichitoyich, tokketoo bi aafoochee aallehe. 2Aroochee taatoo gumon biishiree boonoshi gettemmoyich, kaayechinaꞌon, allaameenaꞌon, yiiteenaꞌonaa xojjenee hiddechinaꞌonon ceekkiihe. Waaꞌi bi aafooch boonoshi neexemmona, 3taatoo boonoshich ishichiye: “Gumon gummehoye; ebi gumo ama geto gaata ta ariimmi wottoon keqqoo taan yechitone” iye.
4Xojjenee hiddechinaꞌo taatoyich Araamee noonoona, “Taatoocho, hume naton taatebe! Ne guuno nooch ne gumon ne maaccemmona, biishiree neech gettemmo noone” iyeete.
5Taatoo boonoshich ishichiye: “Gumonaa bi biishonon taach ittoshi geto qayigaata, ittoshi ashittino qecciqeccaayaa bi kuchemmonaa ittoshi kexo happaa bi aallemmonoyich, ebi mooyon maacceto taane. 6Tunebaani gumonaa bi biishonon ittoshi getigaata, oogeti wojjoonaa oogoonon ittoshich immemmo taane. Illa and gumonaa bi biishonon taach getote” iye.
7Boonoshiyoo wochinnoon ishichiyeete: “Taatoocho, gumon baach ne guuno nooch ne maacigaata, ebi gumon biishiree neech gettemmo noone” iyeete.
8Taatoo boonoshich ishichiye: “Ta getteti mooyo manjoo bi tunoon ittoshi ariitoyich, mooyon qeejjoyich gommon qaawiibeeto ittoshi tunoon ariito taane. 9Gumon taach geton ittoshi qayigaata, barbaraani ikke shaahe nalloo ittoshi toommooch kindemmone. ‘Mooyo qeyi shaddeyemmone’ ii gabiꞌi, taan dawushi beeya kootoon getta koceeto ittoshine. Ebich gumon taach getote. Ebi gumon biichii geton hakkemmo ittoshi tunoon ebina ariyemmo taane” iye.
10Xojjenee hiddechinaꞌo taatoyich ishichiꞌi wochiyeete: “Ebi taatoo ariiya qaawiti mooyon geton hakkemmi asho koniyoona showee toommooch aalloone. Taatoo taane ito, am shaahoon giidechonaa oogoona bi tunetaanoona, ebiyoommi mooyon kaayechinaꞌon, allaameenaꞌonaa xojjenee hiddechinaꞌonon echee ariyaanoone. 11Ebi taatoo echeebeeti mooyo oogeton maggoone. Boonoshi beeyi xaaꞌoo ashi daggooch tuneyaani nuggisheenaꞌoyee besh, taatoyich ebin geton hakkemmo aalloone” iyeete.
12Ebi mooyona taatoo oogeton ippee kaareꞌi, Baabloon beeti yiiteenaꞌo bulli wuxaa boonoshi aallemmoyich gettiye. 13Ebich yiiteenaꞌo bulli qitemmoyich awaajjo kechiye. Daaneelinaa bi nuucheenaꞌononoo wuxiya qaawiyeete.
Yeeri Gumonaa Bi Biishoonon Daaneelich Bekkiyoo
14Arooba Daaneeli Baabloon beeti yiiteenaꞌon wuxoyich kechiti, taatoochi quyee naayinaꞌo iraashoo Ariyookin nibbeebee shiimoona yibbaatiihe; 15biyoo Ariyookin “Taatoo ebi shaahe magge awaajjoon bi kichito, amoyichiye?” iꞌi echehe. Ariyookiyoo Daaneelich bulli mooyon gettiye. 16Daaneeli bekkech taatoo waan giyiꞌi, gumon biishi bi gettemmi aaboon bi taajjemmoyich echehe.
17Aroochee Daaneeli kexooch hammii bi nuucheenaꞌo Hanaaniyi, Mishaꞌeelinaa Azariyaasinoyich ebi mooyon gettiye. 18Biyoo Baabloonee yiiteenaꞌona tookki boonoshi qitaachemmoyich, shimaajji Nuggishoo boonoshich ariqqeree ebi aacheeti mooyon boonoshich bi gaxxemmoyich, boonoshi qollemmoyich gettiye. 19Aroobee xum ebi aacheeti mooyo yaaꞌoona Daaneelich bekkehe. Biyoo shimaajji Nuggishoon galletehe; 20ishichiinoo iye:
“Yeeri ariyechonaa giidechonane;
biyoo bulli yemeenoochee bulli yemeenooch galleteebe.
21Yeeri yemeenoonaa gooroonon shaddiye;
taatoon taatiihe; bi taatittinoonoo shoottiye.
Asheenaꞌoyich shalligoonaa ariyoonon immiibeeto, Yeerine.
22Yeeri maggoo tunetonaa aacheeti mooyonon gaxxii bekkiihe;
Yeeri manderooch aacheeti mooyon ariihe;
biyoo bekkoochiye bi beeto.
23Ta qaabbechinaꞌochi Nuggishoocho,
neen galletoye; neen oogiihoye.
Newoo taach shalligoonaa giidoonon immeto neene;
neen no qolleti mooyon taach arichiito neene;
taatoyich no wochemmi mooyon nooch arichiito neene” iye.
Taatoochi Gumonaa Bi Biishonon Daaneeli Geto
24Ebich Daaneeli Baabloonee yiiteenaꞌon bi wuxemmoyich taatoo ukkiriiti Ariyook waan hammiꞌi ishichiye: “Baabloonee yiiteenaꞌon wuxiyaahine; taatoo waan taan daambe; tawoo taatoochi gumon biishi gettemmo taane” iye.
25Ariyooki afaafinoona Daaneelin taatoo waan daammiꞌi, “Ne gumon biichii geton hakkemmi uroon, Yihudee waati keceenaꞌo daggoochee daneto taane” iye.
26Belxesoori getteebeeti Daaneelin taatoo, “Ta gummeti gumonaa bi biishonon geton hakkenne?” iye.
27Daaneeliyoo taatoyich ishichiye: “Taatoocho, yiiteenaꞌo, allaameenaꞌo, kaayechinaꞌonaa xojjenee hiddechinaꞌonoochee ikkolla ne echeti aacheeti mooyon bekkiyoon hakkemmo aalloone. 28Tunebaani aacheeti mooyon gaxxii bekkiibeeti Nuggishoo shimaayooch beetone. Biyoo woyemmi yemeenooch tunemmi mooyon neech bekkiitone. Ne qeenooch tokketaabee ne gummeti gumonaa yaaꞌoona ebine:
29“Taatoocho, ne qeenooch tokketaabee, woyemmi yemeenooch tunemmi mooyon gummehine. Aacheeti mooyon gaxxiibeeti Nuggishoo tuneya ii beeti mooyon neech bekkiitone. 30Ebi aacheeti mooyo taach gaxxeeꞌi bi bekketo, ashoyee beshe shalligecho ta tunetoyich tuneyaanoon, ne gumo ama geto gaata ne ariyemmoyich, wotta ebi wochii wochii ne gabiibeeti mooyonoo ne ariyemmoyichiye.
31“Taatoocho, ne beeggeto, ne aafooch neexeebeeti, oogichii waccii beetonaa ciinoyich shattii beetona tuneti, oogeti misilooniye. 32Ebi misilo, bi qello xalle aachoochee, bi getoonaa kishoona birewoochee, bi shimetoonaa doshoona gooshoochee, 33bi borboroo xuuroochee, aroyee deshi baatoo, qato xuuroochee qatoo nuuqqoochee shuuneetone. 34Ebin ciinnaa ne beetaa, ikke ooge xaqqo asho koniyoona biin yeshaanoon waaxeꞌi guudoochee kindiye; xuuroonaa nuuqqoonoochee shuuneeti, misiloochi baatoon yexxiꞌi buricciye. 35Bekkech xuuroo, nuuqqoo, gooshoo, birewoonaa aachoona, eboshi bulli buriceheete; maayo bucheebeeti xaaꞌooch beeti maaxxoochoommon tuneheete. Yongo amoonolla echiyaanoon hidii daammiye. Tunebaani misiloon yexxiti xaqqo dicciꞌi ooge guudon tunehe; showoo bulliichoo ceenniye.
36“Gumo ebine. And illa bi biishon neech gettemmo taane. 37Taatoocho, ne, taateenaꞌo taatoo neene. Shimaajji Nuggishoo ne taatemmoyich tuniitone; giidoon, hakkoonaa oogee yiiroonon neech immitone. 38Ashoon, kubbi cooxonaa shimaajji kafoonon amee xaaꞌoochona bi beetaa, eboshi bullin ne hajjemmoyich ne kishooch beshiiꞌi immitone. Ebi aachoochee shuuneeti qello geto neene.
39“Neyee gubb, neyee bedaani bare taatittino tiyemmone. Aroyee gubb showoo bullin hajjemmi, gooshoona shaaheeti keejjinnee taatittino tiyemmone. 40Aroochee bulli mooyon buriccii yiikkeebeeti, xuuroommon kuppho tuneti awuddinnee taatittino tiyemmone. Xuuroo bulli mooyon tiichii yiikkoommon, biyee shiichiꞌi beeti taatittino bullin tiishi yiikkemmone. 41Bi baatoonaa yapheroona qati xuuroonaa qati nuuqqoona tuneton beeggeto neene. Ebi geto, ikkittino aalli taatittino tunemmone getone. Tunebaani xuuroonaa nuuqqoona bacceeton ne beeggetoommon, qatona xuuroochi manjoo biich beeyemmone. 42Bi baatee yaphero qati xuuroonaa qati nuuqqoona bi tunetoommon, ebi taatittino qatona kuppho, qatonoo niroo tunemmone. 43Aroochee wotta xuuroo nuuqqoona tookkii bacceeton beeggeto neene. Ebi geto, showoon qeejjii beetinaꞌo shaagoona naacheree ikkottemminaꞌone getone. Tunebaani xuuroonaa nuuqqoona yeshee bi qayoommon yesheyaachemminaꞌone.
44“Ebi are taateenaꞌochi yemeenooch shimaajji Nuggishoo bulli yemeenoon beeyemmi taatittinoon neechemmone. Ebi taatittino bare asheenaꞌo kochii wochoon hakkaani taatittinoone. Biyoo ebi taatittineenaꞌo bullin buriciree aalliichi, bulli yemeenoon beeyemmone. 45Ne beeggeti, asho koniyoona biin yeshaanoon guudoochee waaxee kindiꞌi, xuuroon, gooshoon, nuuqqoon, birewoonaa aachoonon buricciti xaqqo geto, ebine.
“Oogoo tuneti Yeeri gubb tunemmon neech bekkiitone. Ebi gumo iberoone; bi biishoo xiisheetone” iye.
Daaneelinaa Bi Nuucheenaꞌonoyich Taatoo Oogoon Wojjoo
46Aroochee taatoo Nabukadinatsori baroona guufeꞌi Daaneelich goyinnehe. Buuroonaa ixaanoona biich giddemmoyichoo gettiye. 47Daaneelich taatoo “Ebi aacheeti mooyon gaxxii bekkiyoon ne hakkitoyich, ittoshi Nuggishoo iberoon nuggisheenaꞌo bulliyee beshe Nuggishoo, taateenaꞌochi Doono, aacheeti mooyonoo gaxxii bekkiyechone” iye.
48Daaneelich taatoo oogoon wojjiye; meeti wojjoonoo biich wojjiye. Baabloonee showoo bulliich biin iraashiihe; Baabloonee yiiteenaꞌo toommoochoo biin iraashiihe. 49Daaneeli taatoon echetaa taatoo, Sidiraaqin, Misaaqinaa Abidinaginon Baabloonee showooch iraashiihe. Tunebaani Daaneeli taatee kexooch beehe.
Currently Selected:
Daaneeli 2: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
