Daaneeli 12
12
Ciireexi Yemeeno
1“Arooba ne asheenaꞌon quyeebeeti, giidechi maraakoo Mikaꞌeeli tiyemmone. Aroochee ne asheenaꞌo ikke aagetoon boonoshi tunetoochee tiijjiꞌi, tunee ariyaani xuuxee yemeeno tunemmone. Tunebaani arooba boonoshi shigo macaafooch kooree daneti ne asheenaꞌo bulli wodemminaꞌone.#Maat. 24:21; Maar. 13:19; Yaaꞌo. 7:14 2Qitii boonoshi duukketoochee meetinaꞌo kechemminaꞌone. Keyiree qatinaꞌo bulli yemeenee kashoon danemminaꞌone; wotta qatinaꞌo bulli yemeenoon yeelleree tiyaareetinaꞌo tunemminaꞌone.#Isi. 26:19; Maat. 25:46; Yowa. 5:28-29 3Yiiteenaꞌo gumeexi bekkoochoommon (acacoochoommon), meeti asheenaꞌon gonde gommoochee kaame gommooch wochii beetinaꞌo xojjenoochoommon, bulli yemeenoon aaxxemminaꞌone.
4“Daaneelo, yemeenee ciiree wottoon macaafoon qodi nashi dookkibe! Meetinaꞌo ariyoon daakkiya okk hach wocemminaꞌone” iye.#Yaaꞌo. 22:10
5Areegaata ta, Daaneeli, bare gutteenaꞌo, ikkoo aachee hach, wotta ikkoo aachee beqach tuneꞌi, aachi gashooch neexee beetinaꞌon ciinneho. 6Boonoshi daggoochee ikkoo ebi aacoyee tookk beeti, muttee tuppoochee shippeti tahoon taheti maraakoon, “Ebi gaakkechi shuunoo ceennemmoyich, ambiche yemeenoone echeto?” iꞌi echehe.
7Aacoyee tookk beeti, muttee tuppoochee shippeti tahoon taheti ebi maraakoo bi gutte kishoon shimaayooch tiijjiꞌi, “Ebi keejje nattaa qatooch ceennemmone. Yaafeeti asheenaꞌochi giidoo ciirehooba, ebi mooyo bulli ceennemmone” iꞌi, bulli yemeenoon beeyecho tuneti Yeerichi shigoon ceeggii bi wogaa beetaa waayeho.#Yaaꞌo. 10:5-6
8Tawoo bi gettiton waayeho; tunebaani shalligaano taane. Ebich “Ta doonocho! Ciiroochaa ebi mooyo amooniye bi tunemmo?” iyaꞌa echeho.
9Biyoo “Daaneelo, ebi mooyo ciireexi yemeenooch beddaahaa hichetonaa nashee dooggitonane; ebich ne and diggoona hambe! 10Meeti asheenaꞌo boonoshi qelloon xalliyemminaꞌone; haattee kechitinaꞌonaa muricaalleenaꞌona tunemminaꞌone. Tunebaani gondeenaꞌo ebi mooyon shalligaaneenaꞌon tuneree, gondoon shuune beeyemminaꞌone. Tunetaa yiiteenaꞌo baach shalligemminaꞌone.#Yaaꞌo. 22:11
11“Qemi qemona deejjoon giddiyoo maacheti aaboochee, ebiyoo aalloon deebemmi eeꞌo geddeti aaboochee tiijjiree, ikke humaa gutte ballaa yixane qemo beshemmone.#Daan. 9:27; 11:31; Maat. 24:15; Maar. 13:14 12Gibeneeton tuneꞌi, ikke humaa keejje ballaa shaashaa uuche qemo ciiremmi wottoon beemmo diireetone.
13“Daaneelo, ne, ciirooch beddaahaa diggoona hambe; aroochee kashemmo neene. Yemeenee ciirooba qitii ne duukketoochee keyiree, ne qoodoon danemmo neene” iye.
Currently Selected:
Daaneeli 12: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
