2 Tasaloonqi 3
3
Corootee Gaachoon Phawuloosi Echo
1Illa no maneenaꞌote! Ittoshi waan bi tunetoommon, Doonochi qaaro kaateree bi gaminnemmonaa bi oogemmonoyich nooch corootibote. 2Wotta asho bulli no gettaabeeti qaaroon iberiibeeto toonoone; ebich hukkechinaꞌonaa gonde asheenaꞌonochi kishoochee no wodemmoyich qollebote. 3No Doono gibeneetone; biyoo ittoshin kupphiyemmone; gondoochi nihoo kishoocheenoo ittoshin quyemmone. 4Ittoshich no gettaabeeti mooyinaꞌon and tuniibeeto ittoshi tunoon, gubboo tuniyemmo ittoshi tunoon Doono Yesuusina ittoshin gibenaabeeto noone. 5Doono ittoshi mulloon Yeerichi shunoonaa Kiristoosichi haaꞌiyoonooch wochibe!
“Shuune Qebote” Iꞌi Phawuloosi Geto
6No maneenaꞌote! Shuuna biisheenaꞌonaa ittoshich no dojjiti doyoona hamaani maneenaꞌona waanee ittoshi wokkemmoyich, no Doono Yesuus Kiristoosichi yakkirecho tunaꞌa ittoshich gettaabeeto noone. 7Ittoshina tookkaa no beehooba, shuuna biisho toono noone. Ebich noon shaahoo ittoshich bede mooyo bi tunoon ittoshi qelloona ariibeeto ittoshine. 8Ittoshi daggoochee ikke ashi toommoocholla shaagoon no tuneyaachemmoyich, xumoonaa areddoonon aajjaa yullaa shuunaabeenalli, koni waaneenona baad cikkii koshon maataano noone. 9Ebin no tuniito, no shaahiyoon ittoshi dabbemmoyichalli, nooch qaawiibeeti mooyon ittoshi waanee danoyich aalloo nooch aalletaa toonoone. 10Wotta ittoshina tookkaa no beehoobolla, “Shuunee shuunoon shunaano maayaaye” iyaꞌa getteto noone.
11Ishichaa no iti naboo, ittoshi daggooch ikkikke shuuna biisheenaꞌo beemon no waayetoyichiye; eboshi boonoshin gedaani mooyooch giyiibee baad cikkii guuddii beetinaꞌone. 12Eboshiyoommi asheenaꞌo yiti shuuneree boonoshi hajjee koshon boonoshi maayemmoyich, no Doono Yesuus Kiristoosichi yakkirecho tunaꞌa gettaabeeto noone; manjiiꞌaanoo ciiccaabeeto noone. 13Illa no maneenaꞌote! Gaawe shuunoon shuunoyich taahiyaahote.
14Hini wochooch kooraꞌa no daachiiti qaaroyich deꞌa getaani ashoon ariibote; bi yeellemmoyich biinna tookki ikkotteyaahote. 15Tunebaani manoochoommon kaare ciicotalli, shixechon shaahiiree ciinnaahote.
Ciireexi Diggiyoo
16Diggoon immiibeeti Doono Yesuus Kiristoosi bi qelloona bulli gommona bulli aaboon diggoon ittoshich imbe. Doono Yesuus Kiristoosi ittoshi bullina tookki tunebe!
17Hini diggiyoon ta hajjee kishoona ittoshich koorito, ta Phawuloosi taane; ta kooraa beeti wocho bullin ittoshi xiishemmo ebinane; ta kooraa beetoo eechaꞌaaniye.
18No Doono Yesuus Kiristoosichi wojjoo ittoshi bullina tookki tunebe.
Currently Selected:
2 Tasaloonqi 3: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.