2 Tasaloonqi 2
2
Hukkechi Uro
1Andoo no maneenaꞌote! No Doono Yesuus Kiristoosi wottee womichonaa bi waan no kiceyeechonon ittoshin no qollaabeeto,#1 Tasa. 4:15-17 2ikkikkeenaꞌo “Doonochi aabo waatone” getaa, kaate ittoshi shaddeyaachemmonaa ittoshi keqqaachemmonoyichiye. Nooch bekketi keemoona woyee no getteti qaaroona woyee koorii no wocheti wochoona ishichii getteto shaahiitaa ittoshich getteeto tunemmone. 3Tunebaani asho koniyoona amee gommonolla ittoshin muriciyaaye; shiichiree meetinaꞌo Yeeri toommooch tiyiree hukkoon boonoshi shuunemmi wottoon, hukkechi uro, aalloyich kaacheti are uro, bekkemmi wottoon, ebi are aabo tuneyaachemmone. 4Hini are hukkecho nuggisheenaꞌo getteetinaꞌo bulliyee, asheenaꞌo goyinneebeeti mooyo bulliyee bi qelloon besho tuniiree, boonoshin qeexxee kiin bechaachemmone. Yaafee kexooch giyi koteree, “Taane Yeeri” getooch beddaahaa beddemmone.#Daan. 11:36-37
5Ittoshina tookkaa ta beehooba, ebi mooyo tunemmo bi tunoon ittoshich ta geton shalligaachote? 6And bi tuneyaachemmoyich bajjiibeeto amo gaata ariibeeto ittoshine; ebi hukkechi uro biich daaggeeti aabooba bekkemmone. 7Tunebaani ebi aashoona shuuneebeeti hukkee shuunoo and shuunee beetone; xalla bi shuneyaachemmoyich bajjii beeton Yeeri wokkiimmi wottoon ebi are mooyo tuneyaachemmone. 8Aroyee gubb, Doono Yesuusi bi waahooba bi kookkeexi hiinnoona hidemmi, bi oogee yiiree waccoonoo bi aalliyemmi hukkechi uro bekkemmone.#Isi. 11:4 9Ebi hukkechi uro bi woyemmo, Sheexaanoochi shuunoommon baribare giidoona koote worganikkiti malletoonaa gaakkechi shuunoonon shuunoonane.#Maat. 24:24 10Ebiyoommon wotta, boonoshi wodemmi iberee qaaroon shunniꞌi deꞌon qayona aallemminaꞌon dachemmi baribare gonde shuunoon shuunoonane. 11Ebichi naboona koote mooyon boonoshi iberiyemmoyich, Yeeri muriciibeeti giidoon boonoshi toommooch deejjii beetone. 12Yeeri ebin bi tuniibeeto, iberee qaaroon iberiyaaneenaꞌonaa axaaxoon shuunoona emirii beetinaꞌo bullinochi toommooch bi nallemmoyichiye.
Wodoyich Asheenaꞌon Yeeri Kaaco
13Tunebaani Doonona shucheti no maneenaꞌote! Bulli aaboon ittoshi naboyich Yeerin galletehone; ebiyoo Yeeri bi Yaafe Ayaanoona ittoshin yaafiꞌi, iberee qaaroon iberiiree ittoshi wodemmoyich shiichiꞌi ittoshin bi kaaccitoyichiye. 14Yeeri no Doono Yesuus Kiristoosichi oogee yiiroochee ittoshi qoodeyemmoyich, no getteti mishiraachee qaaroona ittoshin ceeggitone. 15Illa no maneenaꞌote! Manjiree neexebote. Noonoona no getteton tunetaa woyee no kooriti wochoona ittoshich no beshiiti doyoon manjiiree yeshote.
16-17Bi qelloona no Doono Yesuus Kiristoosinaa noon shunniti, bi wojjoona bulli yemeenee goggoonaa manje gibenoonon nooch immiti no Nihoo Yeerina ittoshi mulloon goggiibeete; gaawe mooyo bullin ittoshi shuunemmonaa yibbaatemmonoyich ittoshin kupphiibeete.
Currently Selected:
2 Tasaloonqi 2: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.