2 Saameeli 6
6
Israꞌeeleenaꞌo Taabootoon Yerusaalem Deebo
(1 Kiinoo 13:1-14; 15:25–16:6,43)
1Daawiti wochinnoon Israꞌeeleenaꞌo daggoochee aricheti shaashe hume asheenaꞌon kiciye. 2Aroochee Daawitinaa biinna tookkii beeti asheenaꞌo bullina, taabootee toommooch beeti kiruubeenaꞌoyee tookk tuneꞌi taateebeeti, Beshe Mawe Doono Yeerichi shigoona ceekketi, Yeerichi taabootoon aroochee deeba Yihudee showooch beeti Baali katemooch hammiyeete.#Key. 25:22 3Yeerichi taabootoon geppooch beeti Abinadaabi kexoochee kichiꞌi, andire gaari toommooch kotiiheete. Abinadaabi bushiishoo Uuzinaa Ahiyohina andire gaarin gashee beeheete.#1 Saam. 7:1-2 4Ahiyohiyoo Yeerichi taabootoyee aaf hammii beehe. 5Daawitinaa Israꞌeeleenaꞌo bullina boonoshi giidoon qoophaanoon, Doono Yeerin oogiyoyich, giishi ximboon, ooge ximboon, kamboon, bare duubbi qiicoonaa qaaxilloonon yexxii kaachiibee, shoddee beeheete.
6Nakoonichi maayi buchi xaaꞌooch boonoshi shaggimmona, gatteenaꞌo#6:6 Ebi gaari bi geecheebeeto gattoona bi tunetoyichiye. yaaditoyich Uuzi bi kishoon yaggiꞌi Yeerichi taabootoon yechiye. 7Uuzi taabootoon bi kishoona bi yechitoyich, Doono Yeeri oogichii kaareꞌi biin wuxiye; biyoo aroochaa Yeerichi taabootee aafooch qitiye. 8Doono Yeeri ippoona Uuzin bi wuxitoyich, Daawiti kaarehe. Hanaach beddaahaa are xaaꞌoo Ferets Uuzi#6:8 Ferets Uuzi geto, “Uuzi gaaho” getone. getteehe.
9Arooba Daawiti Doono Yeerin bi shattitoyich, “Doono Yeerichi taabooto ta waan bi woyemmo, aabichireeshiye?” iye. 10Ebich Daawiti Doono Yeerichi taabootoon Daawiti Katemooch daamon qaawaanoone. Biyoo gommon shaddiꞌi, Gaati katemee asho Obeed Edoomi kexooch daammiye. 11Doono Yeerichi taabooto Gaati katemee asho Obeed Edoomi kexooch keejje agenoon kotehe. Doono Yeeriyoo Obeed Edoominaa bi kechi asheenaꞌonon diiriye.#1 Kiin. 26:4-5
12Arooba ebi Yeerichi taabootee naboona Doono Yeeri Obeed Edoominaa bi kechi asheenaꞌonon, biich beeto bullinoo bi diiroon taatoo Daawiti waayehe. Ebich Daawiti hammiꞌi, Yeerichi taabootoon Obeed Edoomi kexoochee Daawiti Katemooch oogeti emiroona deebiye. 13Doono Yeerichi taabootoon shaaggii daammiibeeti asheenaꞌo shiritte shaaddoon hammimmona, ikke gattoonaa ikke gubbenoonon deejjiye. 14Daawitiyoo muttee tuppoochee shippeti efoodoon gitee desh marixxiꞌi, bi giidoon qoophaanoon Doono Yeeri aafooch capphii beehe. 15Ebiyoommi gommona Daawitinaa Israꞌeeleenaꞌona emirii ililiibee, tiroon huggiibeenoo, Doono Yeerichi taabootoon Yerusaalem deebiyeete.
16Doono Yeerichi taabooto Daawiti Katemooch giyii bi beetaa, Saaꞌooli bushee Mikaali mallee kelloona ciinnaa beehan. Taatoo Daawiti taabootee aafooch capphii duubbii bi beetaa beeggaꞌa, bi mulloona biin hoxahan.
17Aroochee Doono Yeerichi taabootoon deebii, Daawiti xogiti duukkaanooch giijjiꞌi, bi kotemmoyich qanniti xaaꞌooch kotiiheete. Daawitiyoo micciibeeti deejjoonaa ikkittinee deejjoonon Doono Yeerich deejjiye. 18Daawiti micciibeeti deejjoonaa ikkittinee deejjoonon bi deejjitoyee gubb, Beshe Mawe Doono Yeerichi shigoona asheenaꞌon diiriye. 19Biyoo asheenaꞌo bullich, eboshiyoo dofee Israꞌeeleenaꞌo bullich, anaaminaꞌonaa maacheenaꞌonoyich, boonoshi ikkikkoona ikke koshon, boonoshi qoodee meenonaa ikke nuuphi woyinee aafoonon immiye. Aroochee asheenaꞌo boonoshi kexooch wotteheete.
20Aroochee Daawiti bi kechi asheenaꞌon diiriya bi kexooch wottehe. Saaꞌooli bushee Mikaali biinna daneya kechaꞌa, “Qellaalli asheenaꞌo yeelleyaanoon boonoshi achoon bekkiyoommon, Israꞌeelee taatoo shokke qeddoon tuneꞌi bi naayinaꞌochi shaajjeteenaꞌo aafooch bi achoon bi bekkiyoo biin am shaahoon oogiite” iyan.
21Daawitiyoo Mikaalich ishichiye: “Bi asheenaꞌo tuneti Israꞌeeleenaꞌochi iraashoo ta tunemmoyich, ne aabbinaa bi kechi asheenaꞌonoyee beshiiꞌi taan kaacciti Doono Yeeri aafooch cappheto taane. Andoo daakkiree Doono Yeeri aafooch capphemmo taane. 22Halla ebiyee beshoon ta qelloon giishiyemmo taane. Neennoo hoxeeton tunemmo taane; tunebaani ebi are ne getteti shaajjeteenaꞌo taan oogiyemminaꞌone” iye.
23Saaꞌooli bushee Mikaali ciroona bushoon shiyaaneene.
Currently Selected:
2 Saameeli 6: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
