2 Saameeli 5
5
Daawiti Yihudee Showoonaa Israꞌeelee Showoonooch Taatoo Tuno
(1 Kiinoo 11:1-9; 14:1-7)
1Ebiyee gubb, Israꞌeelee yoodeenaꞌo bulli Kebiroon, Daawit waan waaꞌi, biich ishichiyeete: “No, ne meeno, ne damoo noone. 2Besheti yemeenooch, Saaꞌooli no toommooch taateꞌi beehooba, Israꞌeeleenaꞌon ginee koyee xaaꞌoochaa yaabito neene. Doono Yeeriyoo neech ‘Ta asheenaꞌo tuneti Israꞌeeleenaꞌon qiddemmo neene; boonoshinoo qeejjemmo neene’ itone” iyeete.
3Ebina Israꞌeeleenaꞌon qeejjiibeeti geeneenaꞌo bulli Kebiroon, Daawit waan waaheete. Taatoo Daawitiyoo Kebiroonaa Doono Yeeri aafoochaa boonoshina tookkii wogoon giyiye. Boonoshiyoo Daawiti shimbooch zayitoon huuttiꞌi, Israꞌeelee showooch biin taatiiheete.
4Daawiti bi taatehooba, bi eeno shaashe natone. Biyoo aabbe naton taatehe. 5Kebiroon beechii, Yihudee showooch shabaatte nattaa shiritte agenoon taatehe; wotta Yerusaalem beechii, Israꞌeelee showoo bullinaa Yihudee showoo bullinooch shaashaa keejje naton taatehe.#1 Taat. 2:11; 1 Kiin. 29:27
Yerusaalemin Daawiti Kochii Yesho
6Ikke areddoon taatoo Daawitinaa bi asheenaꞌona Yerusaalemin kocha hammiyeete. Are showee asheenaꞌo tuneti Yebuseenaꞌo “Daawitinaa bi asheenaꞌona noon kochii wochoon hakkaachemminaꞌone” iꞌi gabiyeete. Ebich biich ishichiyeete: “No katemooch gimon hakkaachemmo neene; aaf doogeenaꞌonaa baata sheqqeenaꞌonona ne giyaachemmoyich bajjemminaꞌone” iyeete. 7Tunebaani Daawiti kochiꞌi, Tsiyooni mishigoon yechiye. Ebiyoo Daawiti Katemoo getaa ceekkehe.
8Arooba Daawiti bi ginee naayinaꞌoyich ishichiye: “Yebuseenaꞌon kocha qaawiibeeto koniyoona, Daawitin shixxiibeeti, ebi aaf doogeenaꞌonaa baata sheqqeenaꞌona beetooch shagoyich, aachi bobboona kaama hambe” iye. “Aaf doogeenaꞌonaa baata sheqqeenaꞌona Yeerichi kexooch giyaayeete” bi getteeto, ebichiye.
9Aroochee Daawiti bi beeyi xaaꞌoon are mishigechi katemooch tuniihe. Aroonoo Daawiti Katemoo iꞌi ceeggiye. Biyoo Miilee#5:9 Miiloo, showoo ceecheeti xaaꞌoone. tiijjii bi guudoon xaqqoona shuunehe. 10Daawitiyoo Beshe Mawe Nuggishoo Doono Yeeri biinna tookkii bi tunetoyich, qemi qemona kupphee kupphee hammiye.
11Arooba Xiroosi taatoo Kiraami Daawit waan wocheyechinaꞌon deejjiye; ebiyoommon wotta yigee mixon, anaaxeenaꞌonaa xaqqee xarechinaꞌonon deejjiye. Boonoshiyoo Daawitich taatee kexon haggiyeete. 12Daawitiyoo Doono Yeeri Israꞌeelee taatoo tuniiꞌi biin bi manjiyoon, bi asheenaꞌo tuneti Israꞌeeleenaꞌoyicha iꞌi bi taatittinoon bi oogiyoonoo ariihe.
13Daawiti Kebiroonee Yerusaalem bi hammitoyee gubb, bare mecheenaꞌonaa naamacheenaꞌonon daakkiye. Biyoo anaami bushiishoonaa maache bushiishoonon daakkiꞌi shiyihe. 14Yerusaalem beechii bi shiyiti bushiisheenaꞌochi shigo ebine: Shamuꞌi, Shobaabi, Naataani, Solomooni, 15Ibihaari, Elishuwi, Nefeegi, Yafiyi, 16Elishami, Eliyaadinaa Elifeleexinane.
Israꞌeeleenaꞌo Filsixeemeenaꞌon Kochii Wochoo
(1 Kiinoo 14:8-17)
17Filsixeemeenaꞌo, Daawiti huutteꞌi Israꞌeeleenaꞌo toommooch bi taatoon waayeheete. Boonoshi bulliyoo Daawitin qaawi yecha kaama waaheete. Tunebaani Daawiti ebin waayeꞌi, mishigechi xaaꞌooch dugilla hammiye. 18Filsixeemeenaꞌo waa Refayee bambooch shaceꞌi koteheete. 19Daawitiyoo “Ebi Filsixeemeenaꞌon keyiree koyote? Ta kishooch beshiiree immenne?” iꞌi Doono Yeerin echehe.
Doono Yeeriyoo Daawitin “Hamiree koye; iberoon boonoshin ne kishooch beshiiree immemmo taane” iye.
20Ebina Daawiti Baꞌaal Feratsim hammiꞌi, aroochaa Filsixeemeenaꞌon kochii wochiye. Biyoo “Diqqoona ambamboo shaggiꞌi bi gaahoommon, Doono Yeeri ta etteenaꞌon gaakkiye” iye. Ebich are xaaꞌoo Baꞌaal Feratsimi#5:20 Baꞌaal Feratsimi geto, “Gaakkii beshechi Nuggishoo” getone. getteehe. 21Filsixeemeenaꞌo boonoshi shahalleenaꞌon arooch duppiichii hammitinaꞌone. Daawitinaa bi asheenaꞌona eboshin shaaggiꞌi daammiyeete.
22Filsixeemeenaꞌo wochinnoon waaꞌi, Refayee bambooch shaceꞌi koteheete. 23Andoo Daawiti Doono Yeerin echehe. Biyoo “Boonoshi beetooch baad cikki hammaahine. Gubbaa guudiree caaree mixinaꞌo beetooch hamiichi arooch quye beebe. 24Ebi caaree mixinaꞌochi cilloochaa guubbee qaaroon ne waayegaata, Doono Yeeri ta, Filsixeemeenaꞌochi ginee naayinaꞌon kocha ne aafooch kecheto ta tunetoyich, afaafinoona keyi koyebe” iye. 25Daawitiyoo Doono Yeeri gettitoommon tuniihe; Filsixeemeenaꞌon Geebee tiijjii Gezeer beddaahaa yookkii dabbiꞌi kochiye.
Currently Selected:
2 Saameeli 5: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
