2 Saameeli 3
3
1Saaꞌoolichi dabbeenaꞌonaa Daawitichi dabbeenaꞌonochi daggooch beeti koyo meeti yemeenoon yagiye. Daawitiyoo kupphee kupphee hammiye; tunebaani Saaꞌoolichi dabbeenaꞌo niree niree hammiyeete.
Daawiti Bushiisheenaꞌo Mooyo
2Daawiti Kebiroon beechii, shiritte anaami bushiishoon shiyihe. Eboshiyoo: Yezireelechee Akinoꞌam waanee shiijjeti bi gutenee bushoo Aminooni; 3guttinnoo Qermeloosechi Naabaali mechee Abigel waanee shiijjeti Kiliꞌaabi; keejjinnoo Geshuuree taatoo Talimayi bushee Maꞌakichi bushoo Abisoloomi; 4awuddinnoo Hagiiti bushoo Adoniyaasi; uuchinnoo Abixaali bushoo Shefaxiyi, 5shirittinnoo bare Daawiti mechee Egilaah waanee shiijjeti Itiraamine. Ebi bushiisheenaꞌo bulli Kebiroon beechii Daawiti shiyitinaꞌone.
Abeneerinaa Ishiboshesina Kaaro
6Saaꞌoolichi dabbeenaꞌonaa Daawitichi dabbeenaꞌona koyee toommooch boonoshi beehooba, Abeneeri Saaꞌoolichi dabbeenaꞌo daggoochee giidoona beshii beshii hammiye. 7Saaꞌoolich Ritsifi getteebeeti naamache beetine. Biyoo Ayaahi busheene. Ishiboshesiyoo Abeneerin “Ta nihoochi naamache waan ne giyeto, amoyichiye?” iye.
8Abeneeri Ishiboshesichi yibbaatoona oogeton ippeꞌi ishichiye: “Ta, Yihudee asheenaꞌon dabbiibeeti kunaanoo taane? Ta ne nihoo Saaꞌooli kechi asheenaꞌoyich, bi maneenaꞌonaa bi xibeenaꞌonoyich gibeneyoon hanaach beddaahaa kuxaano taane; neenoo Daawitichi kishooch beshiyaꞌa imaano taane. Tunebaani and ne, ebi ureechi mooyoyich taan ittibateebeeto neene. 9Illa Doono Yeeri Daawitich wogeꞌi bi gibenikkiti gibenoon ceechoo ta qayigaata, Yeeri ta toommooch ebin tuniibe; ebinoo daakkibe. 10Biich bi wogetoo taatittinoon Saaꞌooli kexoochee tiijjiree, Daanee Beershaab beddaahaa beeti Israꞌeelee showoonaa Yihudee showoo bullinochi toommooch Daawitichi taatee qeenon manjiiyane” iye.#1 Saam. 15:28 11Ishiboshesiyoo Abeneerin oogichiꞌi bi shattitoyich, ikke amoonolla biich wochaanoon qajjiye.
Abeneerinaa Daawitina Shuno
12Aroochee Abeneeri Daawitich wocheyechinaꞌon daachiiꞌi, “Hini showoo konichone? Taanna tookkaa wogoon ne giyemmona, Israꞌeeleenaꞌo bulli ne waan wottemmoyich neen gaachemmo taane” iye.
13Daawitiyoo “Tunebe; neenna tookki wogoon giyemmo taane. Tunebaani ne waanee ta qaawaabeeti ikke mooyo beetone. Ebiyoo taanna daneya ne waahooba, Saaꞌooli bushee Mikaalin taach yeshiree ne woyemmoyichiye. Ebi tuno qayigaata, ta aafoon ciinaachemmo neene” iye. 14Aroochee Daawiti, “Biin shaagoyich, balle Filsixeemeenaꞌochi shookoon ta qocceti ta mechee Mikaalin taach wochibe” iꞌi wocheyechinaꞌon Saaꞌooli bushoo Ishiboshes waan daachiihe.#1 Saam. 18:25-27
15Ebina Ishiboshesi wocheyechinaꞌon daachiiꞌi, Mikaalin bi keno, Layishi bushoo Felixeel waanee daammiye. 16Bi keno eeppiibee bi hillooch dabbiꞌi, Bahuriimi katemooch beddaahaa hammiye. Aroochee Abeneeri, “Ne hilla wotteree hambe” bi getaa, wotteꞌi hammiye.#1 Saam. 25:44
17Abeneeriyoo Israꞌeelee showoon qeejjiibeeti geeneenaꞌoyich, “Ebiyee aaf Daawiti ittoshi toommooch bi taatemmon qaawito ittoshine. 18Doono Yeeriyoo, ‘Ta guuno Daawiti kishoona ta asheenaꞌo tuneti Israꞌeeleenaꞌon Filsixeemeenaꞌo kishoonaa boonoshi etteenaꞌo bulli kishoonoochee kichemmo taane’ iꞌi Daawitich bi gibenikkitoyich, illa ebi aafi ittoshi gaboon and tuniibote” iye.
19Abeneeri hammiꞌi Biiniyaamee asheenaꞌoyich wotta ebin gettiye. Aroochee Biiniyaamee asheenaꞌo bullinaa Israꞌeeleenaꞌona tuniiya boonoshi maacciti mooyon getta, Daawit waan Kebiroon hammiye.
20Abeneeri hiye asheenaꞌona tookkii Daawit waan, Kebiroon bi hamaa, Daawiti boonoshich gifiroon geddiye. 21Aroochee Abeneeri Daawitich, “Neenna tookki wogoon boonoshi giyemmoyich, ne qaawitoommonoo tuniiree showoo bulli toommooch ne taatemmoyich, kaate hamiree, taatoo ta doono ne waan Israꞌeeleenaꞌo bullin wochibona” iye. Ebina Daawiti Abeneeri hammemmoyich bi tuniitaa, diggoona kechii hammiye.
Yoꞌaabi Abeneerin Wuxoo
22Areegaata, Daawiti ginee naayinaꞌonaa Yoꞌaabina meeti mooyon kecciꞌi koyoochee waa shaggiyeete. Tunebaani Abeneeri Daawitina tookkii Kebiroon aalloone. Ebiyoo Daawiti bi hammemmoyich bi tuniitaa, diggoona bi hammitoyichiye. 23Yoꞌaabinaa biinna tookkii beeti ginee naayinaꞌona waa shaggimmona, ikke asho Yoꞌaabich Neeri bushoo Abeneeri taatoo Daawit waan womon, taatoo bi hammemmoyich tuniitaa, diggoona bi hamonoo gettiye.
24Ebich Yoꞌaabi taatoo waan giyiꞌi ishichiye: “Ebi aabichaaniye ne beeto? Abeneeri ne waan waataa, aabichaꞌa wotteree bi hammemmoyich tuniinne? 25Neeri bushoo Abeneerin ariyaabeeto neene. Bi waato, neen dawushiya, ne gimonaa ne keyonon, wotta ne shuunaabeeti mooyonoo qiidoyichiye” iye.
26Aroochee Yoꞌaabi Daawiti aafoochee kechiꞌi, Abeneeri hillooch wocheyechinaꞌon daachiihe. Boonoshiyoo biin Siiri aachi oppo beetoochee wochiꞌi deebiyeete. Tunebaani Daawiti ebin ariyaanoone. 27Abeneeri Kebiroon waammona, Yoꞌaabi ikke badd wochiree biin yibbaatiiya ii beeton shaahiꞌi, uxeree kello waan daammiye. Aroochaa bi manoo Asaheelin bi wuxitoyich, nichoon kichoyicha iꞌi, bi maacooch kochiꞌi wuxiye.
28Daawitiyoo ebi mooyon waayehe; biyoo ishichiye: “Taannaa ta taatittinoona Neeri bushoo Abeneeri damoochee Doono Yeeri aafoochaa bulli yemeenoon xalloo noone. 29Bi damoo Yoꞌaabi toommooch, bi nihoo kechi asheenaꞌo toommoochoo tunebe. Yoꞌaabi kechi asheenaꞌo daggooch bi achoochee awaawunoo ufeebeeto, woyee qeddee shaddee biiyecho, woyee baata yesho woyee goraadoona qitemmo, woyee bi maayemmon mucceto aallaaye” iye.
30Yoꞌaabinaa Abishayinochi manoo Asaheelin Gibeꞌoonaa koyeeti koyoochaa bi wuxitoyich, boonoshiyoo Abeneerin wuxiyeete.
Abeneeri Duukko
31Aroochee Daawiti Yoꞌaabinaa bi asheenaꞌo bullinoyich “Ittoshi tahoon keexi, dookoon taheree, Abeneerich eefote” iye. Taatoo Daawitiyoo bi qelloona dubenoon deenniꞌi hammiye. 32Abeneerinoo daammii Kebiroon duukkiyeete. Taatoo oppee gaꞌoochaa bi qaaroon oogichiꞌi eeppiye; asheenaꞌo bulliyoo eeppiyeete.
33Taatoo ishichiꞌi Abeneerich shooshehe:
“Abeneeri yeexere ashi qitoommon qitiba?
34Ne kishoo cucheyaache;
ne baatoo qoqqaaneyaache;
asho gonde asheenaꞌo kishoona qitoommon qitihine” iye.
Asheenaꞌo bulliyoo wochinnoon eeppiyeete.
35Aroochee showoo xumeyaan beetaa asheenaꞌo Daawit waan waaꞌi, maayoon bi maayemmoyich qolleheete. Tunebaani Daawiti “Aabe giyaan beetaa, koshon woyee amee mooyonona ta maagaata, Yeeri ta toommooch ebin tuniibe; ebinoo daakkibe” iꞌi wogehe.
36Asheenaꞌo bulliyoo ebin beeggiꞌi emiriyeete. Taatoo tuniiti mooyo bulli asheenaꞌon emirikkiye. 37Ebina bi asheenaꞌo bullinaa Israꞌeeleenaꞌo bullina Abeneeri qitoyich taatoo kishoo aallo bi tunoon ariiheete.
38Aroochee taatoo bi naayinaꞌoyich ishichiye: “Hanaachi aabo aricheti iraashoo Israꞌeelee showooch qititi aabo bi tunoon ariyaachote? 39Huutteti taatoo ta tunetaanoona, hanaach hakkoo guuteeto taane. Tunebaani ebi Tseruuyi bushiisheenaꞌo tayee beshii giidetinaꞌone. Doono Yeeri bi shuunetoommon gondoyich shuunebe” iye.
Currently Selected:
2 Saameeli 3: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
