2 Saameeli 2
2
Daawiti Yihudee Taatoo Tuno
1Ebiyee gubb Daawiti “Yihudee katemeenaꞌoochee ikkooch hambote?” iꞌi Doono Yeerin echehe.
Doono Yeeriyoo “Eeha, hambe” iye.
Daawitiyoo “Aabiich hambote?” iye.
Doono Yeeriyoo “Kebiroon hambe” iye.
2Ebina Daawiti bi gutte mecheenaꞌona, eboshiyoo Yezireelechi Akinoꞌaminaa Qermeloosechi Naabaali mechee Abigelina tookkii arooch hammiye.#1 Saam. 25:42-43 3Ebiyoommon wotta Daawiti biinna tookkii beeti asheenaꞌo boonoshi kechi asheenaꞌona tookki arooch boonoshi woyemmoyich tuniihe. Boonoshiyoo Kebirooni guudooch beeti gishiishi katemeenaꞌooch koteheete. 4Aroochee Yihudee asheenaꞌo Kebiroon waa, Daawiti shimbooch zayitoon huuttiꞌi, Yihudee asheenaꞌo toommooch taatiiheete.
Saaꞌoolin duukkitinaꞌo Gilaadee showooch beeti Yabeeshi asheenaꞌo tunoon Daawiti waayehe. 5Daawiti ebin bi waayehooba, Gilaadee showooch beeti Yabeeshi asheenaꞌo waan wocheyechinaꞌon daachiiꞌi ishichiye: “Ittoshi doono Saaꞌoolich ebi shaahoon gibeneeto ittoshi tunetoyich, bi dubenoonoo ittoshi duukkitoyich, Doono Yeeri ittoshin diiribe. 6Andoo Doono Yeeri bi deꞌittinoonaa bi gibeneyoonon ittoshich bekkiibe. Ebin ittoshi tuniitoyich, tawoo ittoshich deꞌe mooyon tuniyemmo taane. 7Illa maac kuxo tunebote; kupphebote; ittoshi doono Saaꞌooli qititone; Yihudee asheenaꞌo ta shimbooch zayitoon huuttiꞌi boonoshi toommooch taan taatiitinaꞌone” iye.
Ishiboshesi Israꞌeelee Taatoo Tuno
8Arooba Saaꞌoolichi ginee naayinaꞌo iraashoo, Neeri bushoo Abeneeri Saaꞌooli bushoo Ishiboshesin yechii, Yoordaanoosin kimmiꞌi Mahanayim muricciꞌi hammiye. 9Aroochaa Abeneeri Ishiboshesin Gilaadee showooch, Aseeree showooch, Yezireelee showooch, Efreemee showooch, Biiniyaamee showoonaa Israꞌeelee showoo bullinooch taatiihe.
10Saaꞌooli bushoo Ishiboshesi Israꞌeelee showooch bi taatehooba bi eeno aabbe natone. Biyoo gutte naton taatehe. Tunebaani Yihudee asheenaꞌo Daawitin dabbiyeete. 11Daawiti Kebiroon beechii Yihudee yoodeenaꞌo toommooch bi taateto, shabaatte nattaa qatone.
Israꞌeeleenaꞌonaa Yihudee Asheenaꞌonochi Daggooch Tuneti Koyo
12Ikke areddoon Neeri bushoo Abeneerinaa Saaꞌooli bushoo Ishiboshesichi naayinaꞌona Mahanayimee tiyiꞌi Gibeꞌoon hammiyeete. 13Aroochee Tseruuyichi#2:13 Tseruuyi, Yoꞌaabi, Abishayinaa Asaheelinochi indeene. bushoo Yoꞌaabinaa Daawitichi naayinaꞌona kechii Gibeꞌoon beeti, ooge aachi oppo beetooch hammiꞌi boonoshina daneheete. Boonoshiyoo aachi oppee okkinaa hachinon tunee ciineeꞌi koteheete.
14Aroochee Abeneeri Yoꞌaabin “Ittoshinaa noonna daggoochee gurimaasheenaꞌo tiyiree koyebeete” iye.
Yoꞌaabiyoo “Tunebe; tiyiree koyebeete” iye.
15Ebina Biiniyaami yoodoonaa Saaꞌooli bushoo Ishiboshesinoyich aaraa gutte asheenaꞌo, wotta Daawitich aaraa gutte asheenaꞌo tunee tiyiꞌi haddeeheete. 16Aroochee asheenaꞌo boonoshi ikkikkoona boonoshi ettoon qelloona yechiꞌi naabooch koyaa, boonoshinaa boonoshina yesheꞌi dihiyeete. Ebiichee tiyitona Gibeꞌoon beeti are xaaꞌoo Aci Goraadee Showoo getaa ceekkehe.
17Aroochee gino duullii duullii hammiye, Daawitichi asheenaꞌo Abeneerinaa Israꞌeeleenaꞌonon kochii wochiyeete.
18Tseruuyichi keejje bushiisheenaꞌo arooch beetinaꞌone. Eboshiyoo Yoꞌaabi, Abishayinaa Asaheelinane. Asaheeliyoo gaddoona woccaabeeti xiixxechoommon afaafinaa woccechone. 19Biyoo qanna yoocha getaanoon, Abeneerin yookkii dabbiye. 20Abeneeriyoo gubb guuddii wotteꞌi, “Asaheelo, ebi neene?” iꞌi echehe.
Biyoo “Eeha, taane” iye.
21Abeneeriyoo “Qanne badd woyee yooche badd guudi ikke gurimaashoon yeshiree, bi qiicoon boge” iye. Tunebaani Asaheeli womiꞌi biin dabbiye.
22Abeneeri wochinnoon biich, “Taan yookkii dabboon qaye; neen ta wuxemmoyich ne qaawaabeeto, amoyichiye? Eechiichi ne manoo Yoꞌaabichi aafoon aabichireeshiye ta ciinnemmo?” iye.
23Tunebaani Asaheeli womiꞌi yookkii dabbiye. Ebich Abeneeri ginee guxoona bi maacooch kochiye. Ginoo hottiꞌi gubbaa kechiye. Biyoo dihiꞌi arooch qitiye. Asaheeli qitiꞌi beeti xaaꞌooch shaggiti asho bulli neexee beehe.
24Tunebaani Yoꞌaabinaa Abishayina Abeneerin yookkii dabbiyeete. Boonoshiyoo yookkiibee Gibeꞌooni barahooch daammiibeeti gommooch, Giyaahi katemoochaa aabi-keyo waan beeti, Aama boonoshi shaggiyee aabe giyahan. 25Aroochee Biiniyaamee asheenaꞌo Abeneer waan giddee kiceeꞌi geppee cillooch neexeheete.
26Abeneeriyoo Yoꞌaabin ceeggiꞌi, “Goraado asheenaꞌon bi wuxi aallii beeyemmo bulli yemeenooniye? Ebichi ciiro oogeton caamo bi tunoon ariyaachine? Ne asheenaꞌo boonoshi maneenaꞌon yookkii dabboochee boonoshi wottemmoyich getaanoon ne cikki beeyemmo, aati wottooniye?” iye.
27Yoꞌaabiyoo “Beeyechi Nuggishoo Yeeri beege; ishin ne getaanegaata, ta asheenaꞌo boonoshi maneenaꞌon yaach maadda beddaahaa yoohi dabbeshinaꞌone” iye.
28Ebich Yoꞌaabi tiroon huggiye; bi huggimmona, bi asheenaꞌo bulli Israꞌeeleenaꞌon yookkii dabboon qajjiyeete; koyoo ebina neexehe.
29Abeneerinaa bi asheenaꞌona aroobee xumo bullin Yoordaanoosi bamboona qaxiriyeete; Yoordaanoosinoo kimmiyeete. Aroochee qaxiriibee aabo daggehaa, Mahanayim shaggiyeete.
30Yoꞌaabiyoo Abeneerin yookkii dabboochee wotteꞌi, bi asheenaꞌon ikkooch kiciye. Daawitichi asheenaꞌo daggoochee, Asaheeli giyaanoon, aaraa yiixiye asheenaꞌo aallo arichehe. 31Tunebaani Daawitichi asheenaꞌo Abeneerichi asheenaꞌoochee keejje ballaa shicha bede Biiniyaameenaꞌon wuxitinaꞌone. 32Asaheelichi dubenoon tiijjiꞌi, Beetilehem beeti bi nihoochi maashooch duukkiyeete. Aroochee Yoꞌaabinaa bi asheenaꞌona aroobee xumo bullin qaxiriibee, showee harooch Kebiroon shaggiyeete.
Currently Selected:
2 Saameeli 2: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
