2 Saameeli 22
22
Yeeri Biich Wudoon Immitoyich Daawitichi Shoddo
(Shoddo 18)
1Doono Yeeri Saaꞌooli kishoochee, wotta bi etteenaꞌo bulli kishoochee biin bi wodiihooba, Daawiti ebi shoddoon Doono Yeerich shoddehe. 2Biyoo ishichiye:
“Doono Yeeri ta deebe xaqqo,
ta mishigo, taan wodiyecho,
3ta Nuggishoo, shoobbii taan wodiibeeti deebe xaqqo,
gaachoochoommon taan qeriibeeto,
giidechi wodiyecho,
bi shoobooch giyiree ta wodemmi, ta deeboone;
taan wodiyecho, xuꞌechinaꞌo kishoochee taan wodii beetone.
4Galleto biich giddi bede Doono Yeer waan ta cookaa,
biyoo ta etteenaꞌo kishoochee taan wodii beetone.
5“Qitoo, aachi aayochoommon taan giichiye;
aalliyechi ooge aacochoommon taan qooxxa iye.
6 Siꞌoolee woderoo ta qettoona yechiye;
qitoo olloochoommon taan yecha iye.
7“Ta xuuxehooba, Doono Yeerin ceeggoye;
ta Nuggishoo taan bi gaachemmoyich ceeggoye.
Biyoo bi yaafee kexooch beechii, ta qaaroon waayehe;
ta cookoo bi waamooch shaggiye.
8“Showoo qewehe; shuuriinoo iye;
shimaayee tuugeenaꞌo shuuriyeete; qeweenoo iyeete;
ebiyoo Yeeri kaaretoyichiye.
9Bi muddoochee cufoo kechiye;
bi kookkoochee michii aalliibeeti qaaqqoonaa
geecciibeeti qaaqqee bunoona kechiye.
10Shimaayoon qechiꞌi dugilla kindiye;
bi baatee dechiich mandere qubo beetone.
11 Kiruubee toommooch tuneꞌi yoobbiye;
yongoochi qosheenaꞌooch tuneꞌi bekkehe.
12Bi guudoon manderoona qeriye;
aacona ceenniti, dunne qubo bi guudoona tunehe.
13Bi aafooch beeti bekkoochee,
qaaqqee buno aaxxee kechiye.
14Doono Yeeri shimaayoochaa gigehe;
Beshoo Yeeri bi qaaroon waayiihe.
15 Shangeenaꞌon awureꞌi bi etteenaꞌon shacciye;
phaqqoo phaqqemmoyich tuniiꞌi, boonoshin shaccii aalliihe.
16Doono Yeeri kaaroochee,
bi muddoochee bi kachiti kaaree cufoochee tiyitona,
baharee dechi ducho bekkehe;
showee tuugeenaꞌoo shokkaachoon echeheete.
17“Dambee bi kishoon deejjiꞌi, taan yechiye;
aachi gejjoochee taan kichiye.
18Giidechi ta etteenaꞌo kishoochee,
taan shixxii beetinaꞌo kishoocheenoo taan wodiihe;
ebiyoo tayee beshe giidechinaꞌo boonoshi tunetoyichiye.
19Boonoshiyoo ta duꞌehooba ta toommooch waaheete;
tunebaani Doono Yeeri taach dego tunehe.
20Biyoo gamini xaaꞌooch taan daammiye;
taanna bi emiritoyich, taan wodiihe.
21“Ta cadiqittinoochee tiyitona,
Doono Yeeri taach deꞌoon deehe;
ta kishee xallittinoochee tiyitona,
taach wochiꞌi qocciye.
22Ebiyoo Doono Yeerichi gommon ta dabbitoyichiye;
gondoon shuunoona Yeer waanee gubb wotteyaano ta tunetoyichiye.
23Bi sheeroo bullin ceechito taane;
bi qociyoocheenoo gubb wotteyaano taane.
24Bi aafooch oonaallo taane;
gondoon shuunoochee ta qelloon quyeto taane.
25Ebich Doono Yeeri ta cadiqittinoochee tiyitona,
bi aafooch taach beeti mullee xalloochee tiyitona,
taach wochiꞌi qocciye.
26“Doono Yeero, neech gibeneetinaꞌoyich gibeneeto neene;
oonneyaaneenaꞌoyich ceeni gaaweto neene.
27Mulli xalleenaꞌoyich gaaweto neene;
xummeenaꞌoyich marecho neene.
28Xukketinaꞌon wodiihine;
tunebaani geecechinaꞌon giishiihine.
29Doono Yeero, ne ta ceechoo neene;
ta Nuggishoo ta manderoon bekkii beetone.
30Taach ne immaabeeti giidoona, ta etteenaꞌon yookko;
ta Nuggishoochi gaachoona
katemee xaqqee uxeroon cappheho.
31Yeerichi gommo muricaalloone;
Doono Yeeri gettiti mooyo gibeneetone;
bi shoobooch giyitinaꞌon gaachoochoommon qerii beetone.
32“Doono Yeeriyee besh, Nuggishoo konine?
No Nuggishoyee besh, Xaqqee Inderoo konine?
33Ta Nuggishoo, taach giidechi deeboone;
ta gommon taach kaachii beetone.
34Biyoo ta baatoon doollee baatoochoommon kupphiihe;
geppee toommooch keqqaalloon ta neexemmoyich tuniihe.
35Ta kishoo aabichi bi koyemmo gaata dojjiye;
ta mochoo gooshoochee shuuneeti maꞌoon yeepphiye.
36Taan wodiyemmi ne gaachoon taach immehine;
ta qolloon waayaꞌa taan kupphiihine.
37Taan koniyoona yechemmoyich tuniyaano neene;
ta baatoo giinaanoone.
38“Ta etteenaꞌon yookkaa dabbaꞌa boonoshin aalliihoye;
boonoshi aallemmi wottoon gubb wotteyaano taane.
39Boonoshin aalliihoye; yexxaa dichaanoo iyoye;
boonoshiyoo aroochee tiyaaneenaꞌone;
ta aafooch dihiꞌi echeheete.
40Ginoochaa giidechon ta tunemmoyich, taan kupphiihine;
ta toommooch tiyitinaꞌo ta baatooch goyinnemmoyich tuniihine.
41Ta etteenaꞌo boonoshi hilla wotteree woccemmoyich tuniihine;
taan shixxii beetinaꞌon aalliihoye.
42Boonoshin gaachemmon qaawiyeete;
tunebaani boonoshin wodiito aalloone;
Doono Yeer waan cookiyeete;
tunebaani bi boonoshi cookoon waayeyaanoone.
43Boonoshin yiikkaꞌa quttoon tuniihoye;
gommooch beeti dengoochoommon, boonoshin kotoye.
44“Deꞌa getaani macceenaꞌo kishoochee taan wodiihine;
aageteenaꞌo toommooch taan iraashiihine;
boonoshin ta ariyaani asheenaꞌo taach hajjeeheete.
45Ashi showee asheenaꞌo waaꞌi, ta aafooch yittiyeete;
ta gettaahaa, bekkech ta getoon waayeheete.
46Boonoshi mullo qitiye;
boonoshi aasheti xaaꞌoochee qeweebee ta waan waaheete.
47Doono Yeeri beeyechone! Taach deebe xaqqo tuneto galleteebe!
Deebe xaqqo tuneꞌi taan wodiibeeti ta Nuggishoo oogebe!
48Yeeri ta etteenaꞌo toommooch nichoon kichii beetone;
biyoo aageteenaꞌo taach hajjeyemmoyich tunii beetone.
49Bi ta etteenaꞌo kishoochee taan wodii beetone.
Doono Yeero, ta etteenaꞌo toommooch taan oogiihine;
xuꞌechinaꞌo kishoochee taan wodiihine.
50“Ebich neen aageteenaꞌo daggoochaa galletoye;
ne shigoyich galletee shoddoon shoddoye.
51Doono Yeeri bi taatiiti taatoyich wudoon immii beetone;
bi huuttitoyich bi shoodoon bekkii beetone;
ebinoo Daawitinaa bi shiijjereenaꞌonoyich bulli yemeenoon tuniihe” iye.
Currently Selected:
2 Saameeli 22: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
