2 Saameeli 23
23
Ciiroochaa Daawiti Gettiti Mooyo
1Yaaqobichi Nuggishoo huuttito,
Yeeri biin aricheti taatoon tuniito,
Israꞌeeleenaꞌoyich gaaweti shoddoon kichecho,
Iseyi bushoo Daawitichi ciireexi yibbaatoo ebine:
2“Doono Yeerichi Ayaano ta gettemmon taach gettiye;
bi qaaro ta noonooch tunehe.
3Israꞌeelee Nuggishoo yibbaatehe;
Israꞌeeleenaꞌochi Xaqqee Inderoo taach ishichiye:
‘Asheenaꞌon gaawe dayinnetoona nalliꞌi qeejjiibeeto,
Yeerin shatona qeejjiibeeto,
4biyoo maaddee yaaꞌeexi bekkoommo,
qubo aalli maaddoona bekkeebeeti aaboommo,
amiyo shaannitoyee gubb, mocee toommooch bekkeebeeti waccoommone’ iye.
5“Yeeri ta shiijjeroon bi diiremmo ebiyoommi gommonane;
Yeeri bulli yemeenoon beeyemmi wogoon taanna tookkii giyitone;
bulli mooyon tatoona gawaatitone;
biyoo bi gibenikkiton shaddaanoone.
Ta qaawaabeeto ebiniye;
Yeeri iberoon taan gaachemmone;
ebi bulli ceennemmoyich tuniyemmone.
6Tunebaani gonde asheenaꞌo tiijjaa duppeebeeti angixoomminaꞌone;
ebi angixon shokke kishoona tiijjemmo koniyoona aalloone.
7Tunebaani angixon yechiibeeto koniyoona,
xuuree qiicoon woyee ginee yaaboon yechiye;
bi beeti xaaꞌoochaanoo qaaqqoona michaa ciroona aallemmone” iye.
Ginee Anaaminaꞌo Tuneti Daawitichi Naayinaꞌo
(1 Kiinoo 11:10-41)
8Daawitichi ginee anaami asheenaꞌo shigo ebine: Takimoonee asho Yosheeb Beshebeti, keeminaꞌo toommooch ukkiroone. Biyoo ikke koyoochaa bi ginoon tiijjiꞌi, shimitte balle asheenaꞌon wuxitone.
9Keejje ginee anaaminaꞌo daggoochee guttinnoo wotta Ahoohichi yaroo, Doodi bushoo Elazaarine. Israꞌeelee ginee naayinaꞌo gubb shokiichaa, Daawitinaa biinna, koyeya kiceeti Filsixeemeenaꞌona manjii neexeꞌi koyeheete. 10Biyoo manjii neexeꞌi bi kishoo taahimmi wottoon, bi kishoo shikkee cubooch wogimmi wottoon Filsixeemeenaꞌon kochiye. Arooba Doono Yeeri worganikkiti wudoon bi danemmoyich tuniihe; Israꞌeelee ginee naayinaꞌo bi beetooch boonoshi wotteto ginee qiicoon dubenee toommoochee shootoyich baachiye.
11Keejjinnoo wotta Haraaree asho Ageehichi bushoo Shaamine. Filsixeemeenaꞌo michiyee goyoo beeti ikke budooch, Leha kiceeheete. Echeti Israꞌeelee ginee naayinaꞌo wocee aalleheete. 12Tunebaani Shaami are goyee gutte daggooch manjiꞌi neexehe. Biyoo are michiyoon boonoshi daamaachemmoyich bajjiꞌi, Filsixeemeenaꞌon wuxiye. Arooba Doono Yeeri worganikkiti wudoon bi danemmoyich tuniihe.
13Ikke areddoon, maayi qecci gooroo shagg bedooch, Filsixeemee ginee naayinaꞌo Refayee bambooch kaamboon geddiꞌi boonoshi beetaa, ebi aricheti shaasheexi keeminaꞌo Daawit waan, Adulaami xaqqee gofooch dugilla hammiyeete. 14Ebiyooba Daawiti mishigooch bi beetaa, Filsixeemee ginee naayinaꞌo Beetilehemin yechitinaꞌone. 15Daawitiyoo “Beetilehemi uxeree kellooch beeti aachi oppoochee ta uchemmi aacon taach koni deeba?” iꞌi oogichii qaatiye. 16Ebina ebi giidechi keejje asheenaꞌo Filsixeemeenaꞌochi kaambee gutte daggoona kuxxii besheꞌi, Beetilehemi uxeree kellooch beeti aachi oppoochee aacon kittii, Daawitich deebiyeete. Tunebaani Daawiti uchemmon qajjiichii, Doono Yeerich deejjoon tunii ukkiꞌi, 17“Ebi aacon uyon Doono Yeeri ta waanee wokkiibe; ebi boonoshi kashoona gajjiteeꞌi hammiti asheenaꞌochi damoo toone?” iye. Ebich are aacon uchemmon qajjiye.
Ebi giidechi keejje asheenaꞌo tuniiti mooyo ebine.
18Tseruuyi bushoo, Yoꞌaabi manoo Abishayi shaasheenaꞌochi#23:18 Hibiree Yaafe Macaafo “keeminaꞌochi” iye. toommooch ukkiroone. Aroo bi ginoon tiijjiꞌi keejje balle asheenaꞌon wuxiye. Ebina keeminaꞌoyee barii aricheti ashoon tunehe. 19Biyoo shaasheenaꞌo#23:19 Hibiree Yaafe Macaafo “keeminaꞌo” iye. daggoochee beshoon aricheton tuneꞌi, boonoshi toommooch ukkirehe. Tunebaani keeminaꞌochoommon aricheto toonoone.
20Kabizeelee asho, Yoyaadi bushoo Beenayi aricheti mooyon tuniiti ginee anaamone. Biyoo gutte Moꞌabee ginee anaaminaꞌon wuxiye. Wotta ikke areddoon kecho shimaayoochee kindiyooba dugilla hammiꞌi oppooch beeti daaheroon wuxiye. 21Wotta andoo ikke mallet gaawe Gibitsee ashoon wuxiye. Ebi Gibitsee asho ginoon yechito bi tunetaanoona, Beenayi gumboon yechiꞌi bi waan hammiye. Biyoo ginoon Gibitsee ashoochi kishoochee shottee deqqiꞌi uroon bi hajjee ginoona wuxiye. 22Yoyaadi bushoo Beenayi tuniiti aricheti mooyo ebine; biyoo giidechi keeminaꞌochoommon aricheton tunehe. 23Shaasheenaꞌo#23:23 Hibiree Yaafe Macaafo “keeminaꞌo” iye. daggooch aricheton tunehe; tunebaani ohe keeminaꞌona tookkii tateyaanoone. Daawiti bi quyee naayinaꞌo toommooch biin ukkiriihe.
24Shaasheenaꞌo eboshine:
Yoꞌaabichi manoo Asaheeli,
Beetilehemechi Doodichi bushoo Elihanaani,
25Haroodechi Shaami,
Haroodechi Eliqaahi,
26Feliixechi Heleezi,
Teqoꞌechi Ikeeshi bushoo Iraahi,
27Anaatootechi Abezeeri,
Hushatechi Mebunayi,
28Ahoohechi Tsalimooni,
Nexoofechi Maharayi,
29Nexoofechi Banaahi bushoo Heleebi,
Biiniyaamee showooch beeti Gibaahee asho Ribayi bushoo Itayi,
30Feratoonechi Beenayi,
Bambooch beeti Gaashee asho Hidaayi,
31Arebee asho Abiyaliboni,
Bahariimechi Azimaweeti,
32Shalibonechi Eliyahibi,
Yasheeni bushiisheenaꞌo,
Yonaataani,
33Haraaree asho Shaami,
Haraaree asho Sharaarichi bushoo Ahiyami,
34Maꞌakechi Ahasibayi bushoo Elifeleexi,
Giloonechi Akixofeeli bushoo Eliyaami,
35Qermeloosechi Hetsiri,
Aribee asho Faraayi,
36Tsobaahechi Naataani bushoo Igaali,
Gaadee asho Baniyi,
37Amoonee asho Tseleeqi,
Tseruuyi bushoo Yoꞌaabichi quyee naayo tuneti,
Beerootee asho Naharaayi,
38Itiree asho Iraahi,
Itiree asho Gareebinaa
39Hitee asho Uuriyinane.
Eboshi bulli shaashaa shabaatteenaꞌone.
Currently Selected:
2 Saameeli 23: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
