1 Saameeli 8
8
Israꞌeeleenaꞌo Taatoo Taatemmoyich Qaawoo
1Saameeli bi geenetoyee gubb, bi anaami bushiisheenaꞌo Israꞌeeleenaꞌon boonoshi nalli qeejjemmoyich ukkiriihe. 2Bi gutenee bushoochi shigo Yoꞌeeli tunemmona, bi guuchoochi shigo wotta Abiyi getteehe. Boonoshiyoo Beershaab tuneꞌi nallii qeejjii beeheete. 3Tunebaani bi bushiisheenaꞌo boonoshi nihoochi gommon dabbaaneenaꞌone. Boonoshiyoo gaacoon dano waan guuddiyeete. Xuccoon maabee dayinnetoon dabii beeheete.
4Ebich Israꞌeeleenaꞌon qeejjiibeeti geeneenaꞌo bulla kicee, Saameel waan Raama waaꞌi, 5biich ishichiyeete: “And ne, geeneto neene. Ne bushiisheenaꞌoo ne gommon dabbaaneenaꞌone. Ebich bare aageteenaꞌo bullichoommon noon qeejjemmi taatoon taatiibe” iyeete.#Yibba. 17:14-15
6Asheenaꞌo “Noon qeejjemmi taatoon nooch taatiibe” boonoshi geto Saameelin emirikkaanoone. Ebich Doono Yeer waan corootiye.
7Doono Yeeriyoo Saameelich ishichiye: “Boonoshi toommooch ta taateyaachemmoyich boonoshi qajjito taanani, neen toonoone. Ebich ebi asheenaꞌo neech gettiibeeti mooyo bullin elle waayebe. 8Boonoshin Gibitsee ta kichiti aaboochee tiijjiꞌi hanaach beddaahaa taan qajjiichii, bare nuggisheenaꞌoyich goyinnee maddetinaꞌone. Ebi ne toommooch boonoshi tuniibeeto, ta toommooch boonoshi tuniitoommoniye. 9Ebich boonoshi gettii beeton waayebe; tunebaani boonoshi toommooch taatemmi taatoo bi tuniyemmi mooyon getiree, boonoshin meeqqeqqiibe” iye.
10Saameeliyoo Doono Yeeri gettito bullin taatoon boonoshich bi taatiyemmoyich echeti asheenaꞌoyich gettiye; 11ishichiinoo iye: “Ittoshi toommooch taatemmi taatoo bi tuniyemmi mooyo ebine: Ittoshi anaami bushiishoon daamiree, gaarinaa hareshoona ginee koyechinaꞌon tuniyemmone; bi gaari aafooch woccii beetinaꞌonoo tuniyemmone; 12boonoshin hume ginee iraasheenaꞌonaa aache ginee iraasheenaꞌonon tuniyemmone; bi goyoon gochechinaꞌonaa bi maayoon qeccechinaꞌonon tuniyemmone; wotta ginee qiicoonaa gaarichi qiicoonon shuunechinaꞌon tuniyemmone. 13Ittoshi maache bushiisheenaꞌon daamiree, shittoon shuunechinaꞌonaa maayi kachiyechinaꞌonon tuniyemmone. 14Beshe gaaweto tuneti, ittoshi goyee budon, woyinee goyee budonaa zayitee michi budonon deꞌiree bi naayinaꞌoyich immemmone. 15Ittoshi maayoonaa woyinoonoochee asraatoon deꞌiree biyee deshi ukkireenaꞌonaa bi naayinaꞌonoyich immemmone. 16Ittoshi guuninaꞌonaa gonneenaꞌonon, ebiyoommon wotta gaawi gaawe gurimaashe ittoshi bushiisheenaꞌonaa#8:16 Ikkikke wonnee Yaafe Macaafooch, “Ittoshi gejjeenaꞌo” ii beeto beetone. ittoshi kureenaꞌonon daamiree bi shuunoon boonoshi shuunemmoyich tuniyemmone. 17Ittoshi bagoonaa emmishoonoochee asraatoon deqqemmone. Ittoshiyoo biich guunon tunemmo ittoshine. 18Arooba ittoshich ittoshi kaacciti taatoochi naboona cookemmo ittoshine. Tunebaani arooba Doono Yeeri ittoshi cookoon waayeyaachemmone” iye.
19Tunebaani asheenaꞌo Saameelichi yibbaatoon waayemmon qajjiichii, ishichiyeete: “Ebi tuneyaache; no qaawaabeeto, no toommooch taatemmi taatooniye. 20Nowoo wotta bare aageteenaꞌochoommon, noon qeejjemmi, ginee koyee xaaꞌoochaanoo no aafooch shiichemmi taatooniye no qaawaabeeto” iyeete.
21Saameeliyoo asheenaꞌochi yibbaatoo bullin waayehe. Ebi aroonoo wochiꞌi Doono Yeerich gettiye. 22Doono Yeeriyoo Saameelin “Boonoshi yibbaatoon waayebe; boonoshichoo taatoon taatiibe” iye.
Aroochee Saameeli Israꞌeeleenaꞌo bullich “Ittoshi katemi katemooch wottebote” iye.
Currently Selected:
1 Saameeli 8: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
