1 Saameeli 7
7
1Qiriyaat Yeꞌariimi asheenaꞌo waaꞌi, Doono Yeerichi taabootoon daammiyeete. Aroochee geppechi katemooch beeti, Abinadaabi kexooch daammiyeete. Ebi taabootoon bi quyemmoyich, bi bushoo Elazaarin yaafiyeete.
Saameeli Woraaferashoo Tuneꞌi Israꞌeeleenaꞌon Qeejjoo
2 Taabooto Qiriyaat Yeꞌariim bi kotetoochee tiijjiꞌi meeti yemeeno beshehe. Aroochoo hiye naton kotehe. Aroobee yemeenooch Israꞌeeleenaꞌo bulli ayinii tuummiꞌi Doono Yeer waan wotteheete.
3Aroochee Saameeli Israꞌeeleenaꞌo bullich ishichiye: “Ibere mulloona Doono Yeer waan wottoon ittoshi qaawigaata, dallaawe nuggisheenaꞌonaa Ashitarooti misileenaꞌonon ittoshi waanee wokkiibote; ittoshi mulloonoo Doono Yeer waan wochibote; biich baach goyinne maddebote; biyoo Filsixeemeenaꞌo kishoochee ittoshin wodiyemmone” iye. 4Ebina Israꞌeeleenaꞌo Baꞌaaleenaꞌonaa Ashitarootinochi shahalleenaꞌon boonoshi waanee wokkiiꞌi Doono Yeerich baach goyinnee maddeheete.
5Saameeliyoo Israꞌeeleenaꞌo bullich wocheꞌi, “Mitsiphi katemooch kiceebote; tawoo aroochaa ittoshich Doono Yeerin qollemmo taane” iye. 6Ebich Mitsipha kiceeheete. Aacon kittiꞌi Doono Yeerich ukkii deejjiyeete. Arooboo coomiyeete. Boonoshiyoo “Doono Yeerin xuqqeto noone” iyeete. Saameeliyoo Mitsipha tuneꞌi Israꞌeeleenaꞌo mooyon nallii beehe.
7Israꞌeeleenaꞌo Mitsipha kiceyoon Filsixeemeenaꞌo waayeheete. Ebich Filsixeemee taateenaꞌo boonoshin kocha kechiyeete. Israꞌeeleenaꞌo ebin waayeꞌi oogichii boonoshi shattitoyich, 8Saameelich “Filsixeemee asheenaꞌo kishoochee noon bi wodiyemmoyich, no Nuggishoo Doono Yeer waan kuxaanoon corootibe” iyeete.
9Saameeliyoo xammiibeeti, ikke bagee bushoon daammii guuriꞌi, amolla echeyaanoon micciibeeti deejjoon tuniiꞌi Doono Yeerich deejjiye. Aroochee Israꞌeeleenaꞌon bi gaachemmoyich Doono Yeer waan corootiye. Doono Yeeriyoo bi corootoon waayehe.
10Saameeli micciibeeti deejjoon bi deejjii beetaa, Filsixeemeenaꞌo Israꞌeeleenaꞌon kocha giddeheete. Tunebaani arooba Doono Yeeri xeeyoochoommon boonoshi toommooch gigeꞌi Filsixeemeenaꞌon keqqichiye. Israꞌeeleenaꞌo aafoocheenoo woce boonoshi aallemmoyich tuniihe. 11Israꞌeeleenaꞌo Mitsiphee kechiꞌi, Filsixeemeenaꞌon wuxiibee, Beet Kaari katemoon boonoshi beshiimmi wottoon boonoshin yookkii dabbiyeete.
12Aroyee gubb Saameeli ikke xaqqoon daammiꞌi, Mitsiphinaa Sheeninochi gutte daggooch neechiye. Biyoo “Hanaach beddaahaa Doono Yeeri noon gaachetone” iꞌi, aroon Ebenezeeri#7:12 Ebenezeeri geto, “Gaachee xaqqo” getone. iꞌi shigiihe. 13Ebina Filsixeemeenaꞌo hakkoo guuteeheete. Aroyee gubb wochinnoon Israꞌeeleenaꞌo showooch shagaaneenaꞌone.
Saameeli kashoona bi beeti yemeeno bullin Doono Yeeri bi giidoon Filsixeemeenaꞌo toommooch bekkiihe. 14Filsixeemeenaꞌo Israꞌeeleenaꞌo waanee deqqiti, Eqiroonee tiijjiꞌi Gaat beddaahaa beeti katemeenaꞌo Israꞌeeleenaꞌoyich wotteheete. Wotta Israꞌeeleenaꞌo ebi katemeenaꞌochi guudoona beeti boonoshi showoon Filsixeemeenaꞌo kishoochee wochiiheete. Arooba Israꞌeeleenaꞌonaa Amooreenaꞌonochi daggooch shunoo beetone.
15Saameeli kashoona bi beeti yemeeno bullin Israꞌeeleenaꞌon nallii qeejjii beehe. 16Biyoo nati natona Beeteeli, Galigalinaa Mitsiphinooch guuddiꞌi, arooch beeti Israꞌeeleenaꞌon nallii qeejjii beehe. 17Aroochee bi kexo Raama bi tunetoyich, Raama wottee beehe. Aroochaanoo Israꞌeeleenaꞌo mooyon nallii qeejjii beehe. Biyoo Doono Yeerich deejjee gudoon Raama shuunehe.
Currently Selected:
1 Saameeli 7: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
