1 Saameeli 4
4
Filsixeemeenaꞌo Taabootoon Keccii Daamo
1Israꞌeeleenaꞌo Filsixeemeenaꞌon kocha kechiyeete. Boonoshiyoo Ebenezeer kaamboon geddiꞌi koteheete. Filsixeemeenaꞌo wotta Afeeq kaamboon geddiꞌi koteheete. 2Filsixeemeenaꞌo yaaroona kechiꞌi Israꞌeeleenaꞌon kochiyeete. Koyoo qeeccii hammimmona, Filsixeemeenaꞌo Israꞌeeleenaꞌon kochii wochiyeete. Boonoshiyoo are koyee xaaꞌoochaa awudde hum bede asheenaꞌon wuxiyeete.
3Echeti Israꞌeelee ginee naayinaꞌo kaambooch boonoshi wottemmona, Israꞌeeleenaꞌon qeejjiibeeti geeneenaꞌo ishichiyeete: “Doono Yeeri noon Filsixeemeenaꞌo kishooch bi duppito, amoyichiye? Noonna tookki bi hammemmonaa no etteenaꞌo kishoochee noon bi wodiyemmonoyich, Doono Yeerichi wogee taabootoon Shiloohee deebone” iyeete. 4Ebich ginee naayinaꞌo Shilooha asheenaꞌon wocheheete. Kiruubeenaꞌoyee tookk tuneꞌi taateebeeti, Beshe Mawe Doono Yeerichi wogee taabootoon aroochee deebiyeete.#Key. 25:22 Eelichi gutte bushiisheenaꞌo, Hoofininaa Finihaasina, Yeerichi wogee taabootoona tookkii arooch waaheete.
5Doono Yeerichi wogee taabooto boonoshi beetooch bi shaggimmona, Israꞌeeleenaꞌo bulli oogichiꞌi ililiyeete; showoo shuuriye. 6Filsixeemeenaꞌo ebi ililee qaaroon waayeꞌi, “Hibireenaꞌochi kaamboochee waayeebeeti ebi shaahe qaaro, amoone?” iyeete.
Doono Yeerichi taabooto arooch womon ariiꞌi, 7Filsixeemeenaꞌo oogeton shattiyeete. Boonoshiyoo ishichiyeete: “Nuggishoo Israꞌeeleenaꞌo kaambooch waatone. Illa aallaaniye no beeto! Ebiyee aaf hiniyoommi mooyo ciroona tunee ariyaanoone. 8Nooch woowo! Ebi giidechi nuggisheenaꞌo kishoochee, konine noon wodiyemmo? Eboshi Gibitseenaꞌon barahoochaa meeti naxoona yexxiti nuggisheenaꞌone. 9Filsixeemeenaꞌote, illa kupphebote; ittoshi anaamittinoon bekkiibote; boonoshin guuno no tuniitoommon Hibireenaꞌo noon guuno boonoshi tuniyaachemmoyich, anaameree koyebote” iyeete.
10Ebina Filsixeemeenaꞌo koyeheete; Israꞌeeleenaꞌonoo kochii wochiyeete. Israꞌeeleenaꞌoo boonoshi duukkaani duukkaanooch woceheete. Arooba meeti asho ciirehe. Israꞌeeleenaꞌoochee shaashe hume ginee naayinaꞌo qitiyeete. 11Yeerichi taabooto keccehe. Eelichi gutte bushiisheenaꞌo, Hoofininaa Finihaasina qitiyeete.#1 Saam. 2:34
Eeli Qitoo
12Arooba ikke Biiniyaamee asho bi tahoon keexxii, bi shimboochoo buttoon shakkiꞌi, gino koyeebeeti xaaꞌoochee guufeebee Shilooha waahe. 13Bi waahaa, Eeli Yeerichi taabootoyich bi mullo keqqitoyich, gommi gashooch bi gabberoon geddii koteꞌi quyee beehe. Uro katemooch shaggiꞌi gettimmona, katemeexi asho bulla keqqoona cookeehe.
14Eeli cookee qaaroon waayeꞌi, “Ebi shaahoon asho cookeebeeto, amoyichiye?” iye.
Uroo Eelich getta afaafineebee waahe. 15Arooba Eeli yixenaa shimitte nati ashoone. Bi aafo ciinnemmon mawiiꞌi yaametone.
16Uro Eelich “Ginoocheene ta waato; hanaach ginoochee muriccaꞌaniye ta waato” iye.
Eeliyoo “Ta bushoocho, mooyo aabichiye?” iꞌi echehe. 17Ebi woroon deebiti uro ishichiye: “Israꞌeeleenaꞌo Filsixeemeenaꞌo aafoochee aashetinaꞌone. Meeti Israꞌeelee ginee naayinaꞌoo koyoochaa qitii ciiretinaꞌone. Gutte ne bushiisheenaꞌo, Hoofininaa Finihaasina, qititinaꞌone. Yeerichi taabootoo keccetone” iye.
18Uro Yeerichi taabooteechon bi gettimmona, Eeli katemee uxeree kellee gaꞌooch beeti bi gabberoochee ongiraach wotteꞌi dihiye. Biyoo geeneto, oogeti aangechoo bi tunetoyich, bi qettimixo tiishetaa qitiye. Eeli Israꞌeeleenaꞌon aabbe naton qeejjitone.
Eelichi Bushoo Mechee Qitoo
19Arooba Finihaasi mechee tuneti, Eelichi naamechee xifaꞌa shiyi beddetine. Biyoo Yeerichi taabootee kecceyoon, bi abboonaa bi kenoona qitoonoo bi waayehooba, maaxoo biin maataa gutenaachaa shiyahan. 20Bi kasho kecha qettooch shaggimmona, biin yechiibeeti genneenaꞌo “Shattaahine; anaami bushoon shiyeti neene” iyeete. Tunebaani bi ebin aaxxiyemmon, boonoshichoo wochemmon qajjahan.
21Yeerichi taabooto keccetoyich, bi abboonaa bi kenoonoo qititoyich, “Yeerichi oogee yiiroo Israꞌeelee wokkite” iyaꞌa, bushoo shigoon Ikaboodi#4:21 Ikaboodi geto, “Oogaallo” getone. iyan. 22Biyoo “Yeerichi taabooto keccetoyich, Yeerichi oogee yiiroo Israꞌeelee wokkite” iyan.
Currently Selected:
1 Saameeli 4: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
