1 Saameeli 3
3
Saameelin Doono Yeeri Ceego
1Bushoo Saameeli Eeliyee desh tuneꞌi Doono Yeerich maddee beehe. Aroobee yemeenooch Doono Yeerichi qaaro oogeti aaxxoone. Wodde kaalloon yaaꞌoo bekkeyaanoone.
2Ikke xumoon, bi aafo yaametaa ciinnemmon mawiiti Eeli bi qeenooch qeyii beehe. 3Saameeliyoo wotta Yeerichi taabooto beeti, Doono Yeerichi yaafee kexooch tokketetone. Yeerichi ceechoo batt tahaan beetaa, 4Doono Yeeri “Saameelo! Saameelo!” iꞌi ceeggiye.
Saameeliyoo eekkehe. 5Eeli waan wocona hammiꞌi, “Taan ne ceeggetoyich, ebiyoche waato taane” iye.
Tunebaani Eeli wochiꞌi, “Ta neen ceegaano taane; wotteree tokketebe” iye. Saameeliyoo wotteꞌi tokketehe.
6-7Doono Yeeri wochinnoon Saameelin ceeggiye. Aroyee aaf Doono Yeeri biich yibbaatee ariyaano bi tunetoyich, Saameeli Doono Yeerin batt ariyaanoone. Ebich tiyii Eeli waan hammiꞌi, “Taan ne ceeggetoyich, ebiyoche waato taane” iye.
Eeliyoo wochiꞌi, “Ta bushoocho, ta neen ceegaano taane. Wotteree tokketebe” iye.
8Doono Yeeri Saameelin keejjinnoon ceeggiye. Biyoo tiyii Eeli waan hammiꞌi, “Taan ne ceeggetoyich, ebiyoche waato taane” iye.
Areegaata Eeli, bushoon ceeggiibeeto Doono Yeeri bi tunoon ariihe. 9Ebich Eeli Saameelin “Hamiree tokketebe; wochinnoon neen bi ceegigaata, ‘Doono Yeero, ne guuno ta, waayaabeeto taane; yibbaatebe’ gete” iye. Ebich Saameeli wotteꞌi bi beerooch tokketehe.
10Doono Yeeri waa arooch neexeꞌi, aafichoommon “Saameelo! Saameelo!” iꞌi ceeggiye.
Saameeliyoo “Ne guuno ta, waayaabeeto taane; gete” iye.
11Doono Yeeriyoo Saameelich ishichiye: “Ebiyoche, waayemmo bullin keqqichemmi, oogeton shattiiti mooyon Israꞌeeleenaꞌo toommooch tuniiya iyaabeeto taane. 12Arooba shiichoochee ciirooch beddaahaa Eelinaa bi kechi asheenaꞌona toommooch ta getteton, ikke mooyinona echiyaanoon bullin ceechemmo taane. 13Bi kechi asheenaꞌon bulli yemeenoon naxemmo ta tunoon shiichaꞌa getteto taane. Ebiyoo bi bushiisheenaꞌo taan boonoshi qallayitoyichiye. Ebin tunii beetinaꞌo boonoshi tunoon Eeli ariibee boonoshin kaaree bayaanoone. 14Ebich ‘Eeli kechi asheenaꞌo xuꞌo, deejjoona tuneba buuroona ciroona xalleyaachemmone’ iyaꞌa Eeli kechi asheenaꞌo toommooch wogeto taane” iye.
15Saameeliyoo showoo harimmi wottoon tokketehe. Aroochee Doono Yeerichi kechi kelleenaꞌon qechiye. Biyoo ebi yaaꞌoon Eelich gettemmon shattiye.
16Eeliyoo Saameelin “Ta bushoo Saameelo!” iꞌi ceeggiye.
Saameeliyoo eekkeꞌi, “Hini tawoche” iye.
17Eeliyoo ishichiye: “Doono Yeeri neech gettiti mooyo, amoone? Ebi mooyon taach aachiyaahine. Yeeri neech bi gettitoochee ikke mooyonona taach ne aachigaata, Yeeri ne toommooch ebin tuniibe; ebinoo daakkibe” iye.
18Ebich Saameeli bulli mooyon biich gettiye. Ikke mooyonona biich aachaanoone.
Eeliyoo “Bi, Doono Yeerine. Gaaweto tuneꞌi biich bekketon tuniibe” iye.
19Saameeliyoo diccii oogehe. Doono Yeeri biinna tookkii tuneꞌi, bi yibbaateti mooyo bulli ceennemmoyich tunii beehe. 20Daanee Beershaab beddaahaa#3:20 Daani katemoo beeto dambi-waani Israꞌeelee showee ciirooch tunemmona Beershaabi katemoo beeto wotta deshi-waani ciiroochiye. beeti Israꞌeeleenaꞌo bulli Saameeli Doono Yeer waanee tuneti, gibeneeti keemecho bi tunoon ariiheete. 21Doono Yeeriyoo aroyee aaf bi bekketoommon, Saameelich Shiloohaa bekkeebee biich yibbaatee beehe. Saameeli yibbaatoon Israꞌeeleenaꞌo bulli elleꞌi waayee beeheete.
Currently Selected:
1 Saameeli 3: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
