1 Saameeli 28
28
1Ebiyee gubb, Filsixeemeenaꞌo Israꞌeeleenaꞌon koyoyich boonoshi ginee naayinaꞌon kiciyeete. Akiishiyoo Daawitich “Neennaa ne asheenaꞌona koyooch taanna tookki hammemmo ittoshi tunoon ariibe” iye.
2Daawitiyoo Akiishich “Deꞌa; ne guuno ta tuniyemmon arooba ne aafoona beeggemmo neene” iye.
Akiishiyoo “Gaawiye; tawoo bulli aaboon taan ne quyemmoyich, quyee naayon tuniyemmo taane” iye.
Qititinaꞌona Yibbaataabeeti Ure Waan Saaꞌooli Hamo
3Aroyee aaf Saameeli qititone. Israꞌeeleenaꞌo bulliyoo biich eeppiꞌi, bi hajjee katemoo tuneti Raama biin duukkitinaꞌone. Saaꞌooliyoo qititi ashoona tookkii yibbaatee beetinaꞌonaa allaameenaꞌonon Israꞌeelee showoochee boonoshi aallemmoyich tuniitone.#Lew. 20:27; Yibba. 18:10-11; 1 Saam. 25:1
4Filsixeemee ginee naayinaꞌo kiceeꞌi hammii Shuneemi katemee gaꞌooch kaamboon geddii koteheete. Saaꞌooli Israꞌeeleenaꞌon kiciye. Boonoshiyoo Giliboꞌa hammii kaamboon geddii koteheete. 5Saaꞌooli Filsixeemee ginee naayinaꞌon beeggiꞌi shattiye; bi mulloo keqqoona qewehe. 6Biyoo Doono Yeer waan corootiye. Doono Yeeriyoo gumona woyee Uriimoona woyee keemechinaꞌona biich wochemmon qajjiye.#Had. 27:21 7Saaꞌooliyoo bi naayinaꞌon “Eke qititi asheenaꞌona yibbaataabeeti ureen ittoshi qaawaa hamiree bi waanee eche waayebona” iye.
Bi naayinaꞌo biich “Qititinaꞌona yibbaataabeeti ure En Door beetine” iyeete.
8Saaꞌooliyoo koni bi gaata bi aricheyaachemmoyich tunii, bi tahoon shaddii, gutte asheenaꞌon bi hillooch dabbiiꞌi, xumoona ure waan hammiye. Biinoo “Eke qititi ashoon echeree, ta toommooch amo tunemmo gaata taach gete; eke ta gettemmi ashoon taach ceegi tiijjibe” iye.
9Tunebaani ure biich ishichiyan: “Saaꞌooli qititi asheenaꞌona yibbaatee beetinaꞌonaa allaameenaꞌonon Israꞌeelee showoochee bi aalliyoon xiishaa ariyaabeeto neene. Ishigaata, taan wuximmoyich taach olloon ne tunaabeeto, amoyichiye?” iyan.
10Saaꞌooliyoo “Beeyechi Doono Yeeri beege! Ebi mooyona ne toommooch shaggemmi amee iritolla aalloone” iꞌi Doono Yeerichi shigoona wogehe.
11Ureyoo “Konin neech ceegi tiijjibote?” iyaa echahan.
Biyoo “Saameelin taach ceegi tiijjibe” iye.
12Ureyoo Saameelin ceeggaa tiijjiyan; biinoo beeggaꞌa, oogeti qaaroona cookiyan. Saaꞌoolinoo “Ne, Saaꞌooli tunaachaa, amoyich taan dawushinne?” iyan.
13Taatoo biin “Shattaahine; amooniye ne ciinnaabeeto?” iye.
Ureyoo “Ayaano showoochee kechii beeton beeggaabeeti taane” iyan.
14Biyoo “Bi shaahoo amoommone?” iye.
Ureyoo “Iddimoon taheti ikke geene uro kechii beetone” iyan.
Saaꞌooliyoo ure beeggeto Saameelin bi tunoon ariiꞌi, showooch baroona guufeꞌi goyinnehe.
15Saameeliyoo Saaꞌoolin “Amoyichiye taan kashiyaache ne iyaabeeto? Amoyichiye ta woyemmoyich ne tuniito?” iye.
Saaꞌooliyoo “Oogeton xuuxeto taane. Filsixeemeenaꞌo taanna koyee beetinaꞌone. Yeeriyoo ta waanee wokkitone. Keemechinaꞌona, woyee gumona, taach wochemmon qajjitone. Neen ta ceeggeto, amoon ta hallemmo gaata taach ne gettemmoyichiye” iye.
16Saameeliyoo ishichiye: “Doono Yeeri ne waanee wokkitoyee, neech ettoon bi tunetoyee, illa taan ne echaabeeto amoyichiye? 17Doono Yeeri ta noonoona bi gettiton ne toommooch ceechitone. Biyoo ne taatittinoon ne kishoochee tiijjiꞌi ne giyoo Daawitich immitone.#1 Saam. 15:27-28 18Doono Yeerich deꞌa geton ne qajjetoyich, bi kaaree shiixxoonoo Amaleeqeenaꞌo toommooch kindiyoon ne qajjetoyich, Doono Yeeri and ebi mooyon ne toommooch tuniitone.#1 Saam. 15:3-9 19Doono Yeeri neennaa Israꞌeeleenaꞌonon Filsixeemeenaꞌo kishooch beshiiree immemmone. Yaach neennaa ne bushiisheenaꞌona taanna tookki tunemmo ittoshine. Ebina Doono Yeeri Israꞌeelee ginee naayinaꞌon Filsixeemeenaꞌo kishooch beshiiree immemmone” iye.
20Saameeli gettiti mooyoochee tiyitona shattiꞌi Saaꞌooli neexoona showooch yangeehe. Aroobee areddoo bullinaa xumo bullinon maayoon maataano bi tunetoyich giidoo qachehe.
21Ureyoo Saaꞌool waan waa, keqqee toommooch bi beemon beeggaꞌa biich ishichiyan: “Ebiyoche, ne gonnee ta, ne getoon waayeti taane. Ta kashoon qitooch beshiyaꞌa imona ne getteton ceechiti taane. 22Andoo ne gonnee ta gettaa beeton waayebe. Kuppheree gommon ne hammemmoyich, giisheche maayoon ta giddiitaa mame” iyan.
23Biyoo “Maataache” iꞌi qajjiye. Tunebaani bi naayinaꞌo ureena tookkii tuneꞌi, kupphii boonoshi qolletoyich, boonoshi qolloon waayehe. Showoocheenoo tiyiꞌi qeenooch kotehe.
24Ureyichoo awujjiti gubbenoo beetone. Ebi gubbenoo afaafinoona bi basheyemmoyich tuniihan. Buddinoon daammaꞌa xiriqqahan. Bukee shittoon gedaanoon koshon kachiihan. 25Saaꞌoolinaa bi asheenaꞌonoyich giddiihan. Boonoshiyoo maaheete. Aroochee aroobee xum tiyii hammiyeete.
Currently Selected:
1 Saameeli 28: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
