1 Saameeli 27
27
Daawiti Filsixeemee Showooch Hamo
1Tunebaani Daawiti bi mulloona “Ikke areddoon Saaꞌooli taan wuxoon qayaachemmone. Ebich muricciꞌi Filsixeemeenaꞌo showooch hamoyee besh, taach bare gaawe mooyo aalloone. Aroochee Saaꞌooli Israꞌeelee showoo bulliich taan qaawoon qajjemmone. Tawoo bi kishoochee muriccemmo taane” iꞌi gabiye.
2Ebich Daawitinaa biinna tookkii beeti shiritte balle asheenaꞌona tiyiꞌi, Maꞌooki bushoo, Gaati taatoo Akiish waan hammiyeete. 3Daawitinaa bi asheenaꞌona boonoshi kechi asheenaꞌona tookkii Akiish waan, Gaat koteheete. Daawitiyoo bi gutte mecheenaꞌona tookkii beehe. Eboshiyoo Yezireelechee Akinoꞌaminaa Naabaali mechee, Qermeloosechi Abigelinane. 4Saaꞌooliyoo Daawiti Gaat muricciꞌi bi hamon waayeꞌi, biin qaawoon qajjiye.
5Aroochee Daawiti Akiishich ishichiye: “Ne aafoochaa gidoon daneto ta tunegaata, hini showooch beeti katemeenaꞌo daggoochee ta beeyemmi xaaꞌoo taach ichebe. Ne guuno ta, neenna tookki taatee katemooch ta kotemmo, amoyichiye?” iye.
6Ebina arooba Akiishi Tsiqilaagi katemoon Daawitich immiye. Ebich hanaach beddaahaa Tsiqilaagi Yihudee taateenaꞌocho tunehe. 7Daawitiyoo Filsixeemeenaꞌo showooch ikke nattaa awudde agenoon kotehe.
8Daawitinaa bi asheenaꞌona kechiꞌi Geshuureenaꞌon, Gerizeenaꞌonaa Amaleeqeenaꞌonon kochii beeheete. Ebi asheenaꞌo Xeleemee tiijjiꞌi, Shuurinaa Gibitsinooch beddaahaa beeti asheenaꞌone. 9Daawitiyoo are showoon kochiꞌi aalliihe. Anaamon tuneba maacheen koninolla kashoona echiyaanoone. Tunebaani bageenaꞌon, miiminaꞌon, kureenaꞌon, gaaleenaꞌonaa tahoonon kecciꞌi Akiish waan waahe.
10Akiishiyoo “Hanaach aabi waan hammiꞌi kochiyote?” iꞌi echee beehe. Daawitiyoo “Negeebi barahooch beeti Yihudee showooniye”; woyee “Negeebi barahooch beeti Yerahimeeleenaꞌo showooniye”; woyee “Negeebi barahooch beeti Qeeneenaꞌo showooniye” ii beehe. 11Daawiti woroon Gaat hamiree boonoshi getaachemmoyich, anaamo tuneba maache, koninolla kashoona echiyaanoon wuxii ciichiye. Ebiyoo “Daawiti ebin tuniitone getiree asheenaꞌo gettemminaꞌone” iꞌi bi gabitoyichiye. Filsixeemee showooch bi beemmi yemeeno bullin ebi bi doyoone. 12Akiishiyoo Daawitin gibenehe. Ebiyoo “Bi asheenaꞌo tuneti Israꞌeeleenaꞌona tiyaareeto bi tunetoyich, bulli aaboon taach maddemmone” iꞌi bi gabitoyichiye.
Currently Selected:
1 Saameeli 27: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
