1 Saameeli 1
1
Eliqaaninaa Bi Kechi Asheenaꞌona Shilooha Hamo
1Geppechi Efreemee showooch beeti Raami katemooch, Efreemi yoodoochee tuneti Eliqaani getteebeeti ikke uro beehe. Biyoo Tsuufi bushoo, Toohi bushoo, Elihi bushoo, Yerohaami bushoone. 2Eliqaani gutte mechechone. Ikkeechi shigo Haanni, wotta bareechi shigo Finaani getteehe. Finaani bushechine; tunebaani Haanni bushaalleene.
3Are uro Beshe Mawe Doono Yeerich goyinnoonaa deejjoon deejjoonoyich bi beeti katemoochee Shilooha nati natona hammii beehe. Eelichi gutte bushiisheenaꞌo, Hoofininaa Finihaasina, qeesheenaꞌo tuneꞌi arooch beetinaꞌone. 4Eliqaani Shilooha hammiꞌi deejjoon bi giddii beehoobee aabo bullin, bi mechee Finaanich, bi anaami bushiisheenaꞌonaa maache bushiisheenaꞌona bulloshich meenoochee boonoshi qoodi qoodoon immii beehe. 5Haannin oogichiꞌi bi shunnii beetoyich, gutte kishoon tuniiꞌi biich immii beehe. Tunebaani Doono Yeeri bushoon bi shiyaachemmoyich Haanni maacoon dookkitone. 6Doono Yeeri bi maacoon bi dookkitoyich, bi nuutee Finaani biin shewiiya ippiiya beehan. 7Ebiyoo nati natona tunee beehe. Haanni Doono Yeerichi kexooch bi hammemmi aabo bullin bi nuutee biin shewiiya beehan. Ebina Haanni eeppaabee maayoon maayemmon qajjaa beehan.
8Bi keno Eliqaaniyoo “Haanne, amoyichiye ne eeppaabeeto? Amoyich maataachine? Amoyichiye ne ayinaabeeto? Ta neech aashire anaami bushiishoyee beshaachote?” ii beehe.
Haanni Bushoon Shimoyich Corootoo
9Ikke areddoon Shilooha beechii maa uchii boonoshi tiyitoyee gubb, Haanni tiyaa neexahan. Areegaata, qeeshoo Eeli Doono Yeerichi kechi kellee gaꞌooch, gabberooch koteꞌi beetone. 10Haanniyoo bi kasho caammetoyich oogichaa eeppaabee Doono Yeer waan corootiyan. 11Ishichaanoo mookkahan: “Beshe Mawe Doono Yeero, ne gonnee ta xuuxoon beeggaꞌa taan ne gabigaata, ne gonnee taanoo batteyaanoon anaami bushoon taach ne imigaata, kashoona bi beemmi yemeeno bullin neech immemmi taane; bi qelloochoo appoo shagaachemmone”#1:11 Ebi, Yeerich barito bi tunoon bekkiihe. iyan.#Had. 6:5
12Haanni kuxaanoon Doono Yeer waan corootaa bi beetaa, Eeli bi noonoon ciinnii beehe. 13Haanniyoo bi mulloona bi corootaa beetoyich, bi noonoo shuuribani, bi qaaro waayeyaanoone. Ebich Eeli “Mashetine” iꞌi gabiye. 14Biyoo “Aati wottooniye ne mashe beeyemmo? Ebi woyinee uyoon ne waanee wokkiibe” iye.
15Haanniyoo ishichaꞌa biich wochiyan: “Ta doonocho, masheyaane taane. Woyinee uyoon woyee mashiibeeti uyoon uyaane taane. Ta, oogeton ayiniti ure ta tunetoyich, ta iritoon Doono Yeerich shooshaaniye ta beeto. 16Ebi shaahoon ta corootito, ta toommooch shaggiti iritoonaa xuuxoonoochee tiyitona bi tunetoyich, ne gonnee taan gaacaalli ureen tuniiree ciinnaahine” iyan.
17Eeliyoo “Diggoona hambe! Israꞌeelee Nuggishoo ne qolleton neech imbe” iye.
18Biyoo “Ne gonnee tawoo ne aafoochaa gidoo danetin tunebone” iyan. Aroochee wottaa hammahan; maayoonoo maahan. Aroyee gubb, illa aafichoommon ayinaaneene.
Saameeli Shiijjoonaa Yeerich Icheyona
19Bi dechara maaddoona Eliqaaninaa bi kechi asheenaꞌona tiyiꞌi Doono Yeerich goyinneheete. Aroochee Raama beeti boonoshi kexooch wotteꞌi hammiyeete. Eliqaani bi mechee Haannina danehe. Yeeriyoo Haanni qolloon waayehe. 20Ebina Haanni xifaꞌa, anaami bushoon shiyahan. “Doono Yeer waanee ta qolletone” iyaꞌa, bi shigoon Saameeli iyan.
21Ebiyee gubb, Eliqaani Doono Yeerich nati deejjoon deejjoonaa bi mookketi mookkoon giijjoonoyich, bi kechi asheenaꞌo bullina tookkii Shilooha hamma tiyiye. 22Tunebaani Haanni bi kenoyich “Bushoo xano bi kuxxitoyee gubb, daamiree Doono Yeeri aafooch giddiyemmi taane. Biyoo echeti bi yemeeno bullin arooch beeyemmone” iyan. Ebich hamaaneene.
23Bi keno Eliqaaniyoo biich ishichiye: “Gaaweto tuneꞌi neech bekketon tuniibe; bushoo xano bi kuxximmi wottoon hiniich beebe; Doono Yeeri baach bi qaaroon ceechibe” iye. Ebina Haanni bushoon xaachaabee xano bi kuxximmi wottoon bi kexooch beehan.
24Bushoo xano bi kuxxitoyee gubb, Shilooha beeti Doono Yeerichi kexooch daammahan. Wotta biinna tookkaa keejje nati ikke gubbenoon, keejje qunnee buddinoonaa ikke mollexxee woyinee uyoonon yechaꞌa hammahan. Arooba bushoo batt nallefoone.
25Gubbenoon boonoshi guuritoyee gubb, bushoon Eeli waan deebiyeete. 26Haanniyoo Eelich ishichiyan: “Ta doonocho, hini xaaꞌooch ne aafooch neexaꞌa Doono Yeer waan corootiti ure ta tunoyich, ne kashoona wogehoye. 27Hini bushoon taach bi immemmoyich qollehoye. Doono Yeeriyoo ta qolleton taach immiye. 28Ebich tawoo biin Doono Yeerich immaabeeti taane. Bi kashee yemeeno bullin Doono Yeerich icheto tunemmone” iyan.
Aroochee Doono Yeerich aroochaa goyinneheete.
Currently Selected:
1 Saameeli 1: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
