1 Taateenaꞌo Gimo
Gimo
Taateenaꞌochi ikkinnee Macaafooch kooreeto, Solomooni taateti yemeenoochee, ebiyoo K.sh.a. 971 natoochee tiijjii, gutta qoodeeti taatee showee mooyon geddiꞌi, Akaabi bushoo Akaziyaasi qitiyooba beddaahaa beeti, Israꞌeeleenaꞌo mooyone. Haaree keemoochee tiijjiꞌi, haaree aaraa ikkooch beddaahaa beeto, Solomoonichi taatoon, wotta Yerusaalem yaafee kexonaa bi taatee kexonon bi hagon gettii beetone.
Solomooni qititoyee gubb, bi bushoo Roboꞌami taateꞌi bi taatee qeenooch kotehe; tunebaani dambi-waani taatee showoon Yeroboꞌami bi waanee boggii deqqitone. Ebiyee gubb, dambi-waani taatee showoo Israꞌeelee showoo getteehe; deshi-waani taatee showoo wotta Yihudee showoo getteehe. Taateenaꞌochi Ikkinnee Macaafee ciireexi haareenaꞌooch beeto, gonde taatoo tuneti Akaabi mooyonaa Akaabin bi shuuneti axaaxoyich, wotta Israꞌeeleenaꞌon Doono Yeerich deꞌa boonoshi getti qayoyich, ittibateti Yeerichi keemechi Eliyaasi mooyonane.
Yeerich, boonoshina tookkii bi giyiti wogoyichoo, gibeneetinaꞌo tuno Israꞌeeleenaꞌoyich qaawiibeeto bi tunoon Taateenaꞌochi Ikkinnee Macaafoonaa Guttinnee Macaafoonon kooriti asho bi arii beetoyich, taateenaꞌo Yeerich gibeneetinaꞌo boonoshi tunoonaa tunee qayonon bekkiibee, boonoshi ikkikkoochi mooyon kooriye. Biyoo taateenaꞌo deꞌeenaꞌo woyee gondeenaꞌo tunoon bekkiyoyich, deꞌe taateenaꞌo mooyon gettiibee, “Doono Yeeri aafoochaa kaame mooyon tuniihe” iye; ebiyoommon wotta gonde taateenaꞌo mooyon gettiibee, “Doono Yeeri aafoochaa gonde mooyon tuniihe” iye. Ebi mooyon wochii wochii gettii beetone.
Biyoo, Woraaferasheenaꞌochi Macaafoon kooriti ashichoommon, Israꞌeeleenaꞌo Doono Yeerich deꞌa boonoshi ii beehooba, Yeeri, boonoshi showoon diggoo tuniyoon, tunebaani biich deꞌa geton qajjiꞌi, shahalleenaꞌoyich boonoshi goyinnee maddiyooba, boonoshi showooch koyoonaa baribare naxoona waabeeto bi tunoon kooritone.
Inde Moochi Sheqqo
Solomooni taato (1:1–11:43)
Roboꞌaminaa Yeroboꞌaminochi mooyo (12:1–14:31)
Israꞌeelee taateenaꞌonaa Yihudee taateenaꞌonochi mooyo (15:1–16:34)
Eliyaasinaa Akaabinochi mooyo (17:1–19:21)
Akaabinaa Elizabeelinochi mooyo (20:1–22:53)
Currently Selected:
1 Taateenaꞌo Gimo: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.