1 Taateenaꞌo 1
1
Daawitichi Geenee Yemeenooba Tuneti Mooyo
1Taatoo Daawiti geenee baayehe. Asheenaꞌo bullikkoon tajjitaa, biich qeecon qajjiye. 2Ebich bi asheenaꞌo biich ishichiyeete: “Taatoo no doonoyich gidiide bushee qaaweebuye; areyoo bi aafooch tuneree taatoon heetebuye. Taatoochi sheenooch qeyiree qeechibuye” iyeete. 3Ebich Israꞌeelee showoo bulliichee gaawe malletechi busheen qaawiyeete. Shuneemee ashe Abishagin daneꞌi, taatoo waan deebiyeete. 4Ebi busheyoo oogeton mallet gaawe busheene. Taatoo aafooch beeꞌa biin heetaa beehan; tunebaani taatoo biin qeyaanoone.
Adoniyaasi Taateya Qaawoo
5Ebiyooba Hagiiti bushoo Adoniyaasi#2 Saam. 3:4 “Taatemmo taane” iꞌi tiyiye. Gaarinaꞌon, hareshechinaꞌonaa bi aafooch woccemmi aache asheenaꞌonon qanniihe. 6Bi nihoo kashoona bi beeti yemeenooch, “Amoyich ebin tuniinne?” iꞌi ciroona biin kaaree ariyaanoone. Adoniyaasiyoo oogeton mallet gaawe ashoone; biyoo Abisoloomi hilloone.
7Adoniyaasi Tseruuyichi#1:7 Tseruuyi, Yoꞌaabi, Abishayinaa Asaheelinochi indeene. bushoo Yoꞌaabinaa qeeshoo Abiyataarina tookkii koceehe. Boonoshiyoo Adoniyaasin dabbiꞌi biin gaacheheete. 8Tunebaani qeeshoo Sadooqi, Yoyaadi bushoo Beenayi, keemechi Naataani, Shimeꞌi, Reꞌinaa Daawitichi quyee naayinaꞌona Adoniyaasina tookkii tuneyaaneenaꞌone.
9Adoniyaasiyoo bageenaꞌon, wurinaꞌonaa gubbeneenaꞌonon En Rogeeli aachi xuuphee gaꞌooch beeti Zoheleeti Xaqqoochaa#1:9 Zoheleeti xaqqo geto, “Dingeree xaqqo” getone. deejjiye. Bi maneenaꞌo tuneti taatoochi bushiishoo bullinaa taatoo iraashiiti Yihudee iraasheenaꞌo bullinon ceeggiye. 10Tunebaani keemechi Naataanin, Beenayin, taatoochi quyee naayinaꞌonaa bi manoo Solomooninon ceegaanoone.
Solomooni Taatoo Tuno
11Aroochee Naataani Solomoonichi indee Baarshabich ishichiye: “No doono Daawiti ariyaanoon, Hagiiti bushoo Adoniyaasi taatoon waayeyaane neene? 12Andoo waaree, ne kashoonaa ne bushoo Solomooni kashoonon aabichiree ne wodiyemmo gaata, ta ciicoon waayebe. 13Kaate taatoo Daawit waan hamiree, ‘Taatoo ta doonocho, ne gonnee taach “Ne bushoo Solomooni ta hillooch taatemmone; ta taatee qeenoochoo kotemmone” iyaa wogeyaano neene? Ishigaata, amoyich Adoniyaasi taatehe?’ gete. 14Taatoyich ne geti beetaa, tawoo ne hillooch giyiree, ne gettetooch ceechemmo taane” iye.
15Ebina Baarshabi taatoo waan gatooch giyahan. Taatoo oogichii geenetone. Shuneemee ashe Abishagiyoo biich maddaa beehan. 16Baarshabiyoo showooch yittaꞌa taatoyich goyinnehan.
Taatoo “Amooniye ne qaawaabeeto?” iye.
17Biyoo taatoyich “Ta doonocho, ne gonnee taach ‘Ne bushoo Solomooni ta hillooch taatemmone; ta taatee qeenoochoo kotemmone’ iyaꞌa ne Nuggishoo Doono Yeerina wogeto neene. 18Ebiyoche, and Adoniyaasi taatetone. Tunebaani taatoo ta doono ne ebi mooyon ariyaano neene. 19Biyoo meeti wuron, gubbeneenaꞌonaa bageenaꞌonon deejjitone. Taatoochi bushiishoo bullin, qeeshoo Abiyataarinaa ginee iraashoo Yoꞌaabinon ceeggitone; tunebaani ne guuno Solomoonin ceegaanoone. 20Andoo taatoo ta doonocho, ne hillooch taatoo ta doono taatee qeenooch kotemmo konigaata boonoshich ne gettemmoyich, Israꞌeelee asho bulli aafo bi ciinniibeeto, neeniye. 21Ebi tuno qayigaata, taatoo ta doono ne, kashaꞌa ne qaabbechinaꞌo waan ne xaꞌeehooba, taannaa ta bushoo Solomoonina gonde ashooch haddeyemmo noone” iyan.
22Aroochee taatoona tookkaa yibbaatooch bi beetaa, keemechi Naataani waaꞌi giyiye. 23Taatoyich “Ebiyoche, keemechi Naataani waatone” iꞌi gettiyeete. Biyoo taatoo aafooch waa giyii, showooch guufeꞌi goyinnehe.
24Aroochee ishichiye: “Taatoo ta doonocho, ‘Adoniyaasi ta hillooch taatemmone; ta taatee qeenoochoo kotemmone’ ito neene? 25Hanaach desh kindiꞌi, meeti wuron, gubbeneenaꞌonaa bageenaꞌonon deejjitone. Taatoochi bushiishoo bullin, ginee iraashoo Yoꞌaabinaa qeeshoo Abiyataarinon ceeggitone. Ebiyoche, boonoshiyoo bi aafoochaa maa uchiibee, ‘Taatoo Adoniyaasi hume naton taatebe!’ ii beetinaꞌone. 26Tunebaani ne guuno taan, qeeshoo Sadooqin, Yoyaadi bushoo Beenayinaa ne guuno Solomooninon ceegaanoone. 27Ebi mooyo tuneto, ne hillooch taatoo ta doono taatee qeenooch kotemmo konigaata ne guuno nooch getaanoon, ta doono ne daaggeenane?” iye.
28Aroochee taatoo Daawitiyoo “Baarshabin taach ceegote” iye. Biyoo taatoo beetooch waaꞌa bi aafooch neexahan.
29Taatoo ishichiꞌi wogehe: “Ta kasheen iritoo bulliichee wodiiti Doono Yeeri beege! 30‘Ne bushoo Solomooni ta hillooch taatemmone; ta keroon ta taatee qeenooch kotemmone’ iyaꞌa Israꞌeelee Nuggishoo Doono Yeerina neech ta wogetoommon, iberoon hanaach tuniyemmo taane” iye.
31Baarshabiyoo showooch yittaꞌa taatoyich goyinnaachaa, “Taatoo Daawiti ta doono bulli yemeenoon kashoona beebe” iyan.
32Taatoo Daawitiyoo “Qeeshoo Sadooqin, keemechi Naataaninaa Yoyaadi bushoo Beenayinon taach ceegote” iye. Boonoshiyoo waa taatoo aafooch neexeheete. 33Aroochee taatoo boonoshich ishichiye: “Ittoshi doono ta asheenaꞌon yeshi hambote; ta bushoo Solomoonin ta bicereen yebbiiree, desh Giyooni aachi xuuphooch daambote. 34Aroochaa qeeshoo Sadooqinaa keemechi Naataanina biin huutiree, Israꞌeeleenaꞌo toommooch taatiibeete; tiroon (waaringoon) hugibee, ‘Taatoo Solomooni hume naton taatebe!’ getote. 35Biin deeniree damba wobote; biyoo waaree, ta taatee qeenooch kotebe; ta keroon taatebe. Yihudee asheenaꞌonaa Israꞌeeleenaꞌonochi toommooch taatoo bi tunemmoyich biin kaacceto taane” iye.
36Yoyaadi bushoo Beenayi taatoyich ishichiye: “Ameena; taatoo ta doono ne Nuggishoo Doono Yeeri tunebe gete. 37Doono Yeeri taatoo ta doono neenna tookkii bi tunoommon, Solomoonina tookki tunebe. Bi taatee qeenonoo taatoo ta doono ne taatee qeenoyee beshoon tuniibe” iye.
38Ebich qeeshoo Sadooqi, keemechi Naataani, Yoyaadi bushoo Beenayi, taatoochi quyee naayinaꞌo tuneti Kereeteenaꞌonaa Feleeteenaꞌona desh hammiꞌi, Solomoonin taatoo Daawitichi bicereen yebbiiꞌi, Giyooni aachi xuuphooch deebiyeete. 39Qeeshoo Sadooqiyoo zayitee xoofoon danee duukkaanoochee deebiꞌi, Solomoonin huuttiye; tiroon huggiyeete. Asheenaꞌo bulliyoo “Taatoo Solomooni hume naton taatebe!” iyeete. 40Boonoshiyoo shumburoon huggii, oogichii cookii ililiibee, bi hillooch dabbii hammiyeete; boonoshi cookoochee tiyitona showoo shuuriye.
41Adoniyaasinaa bi ceeggiti asheenaꞌona gifiroon maa uchii ciicha boonoshi bedooch, ebin waayeheete. Yoꞌaabiyoo tiree qaaroon waayeꞌi, “Katemoochee waayeebeeti, ebi dullee qaaro, amoone?” iye.
42Ebin getooch bi beetaa, qeeshoo Abiyataari bushoo Yonaataani waahe. Adoniyaasiyoo “Ne gaawe asho neene; ne deebaabeeto gaawe worooniye; hach gibe” iye.
43Yonaataaniyoo Adoniyaasich ishichiye: “Gaawe woroo toonoone. Taatoo no doono Daawiti Solomoonin taatiitone. 44Biinna tookkii qeeshoo Sadooqin, keemechi Naataanin, Yoyaadi bushoo Beenayin, Kereeteenaꞌonaa Feleeteenaꞌonon taatoo daachiitone. Boonoshiyoo biin taatoochi bicereen yebbiitinaꞌone. 45Qeeshoo Sadooqinaa keemechi Naataanina Giyooni aachi Xuuphoochaa huuttiꞌi taatiitinaꞌone. Aroocheenoo emiroona kechiyeete. Katemoo bi dullito ebinane. Ittoshi waayeti qaaro ebine. 46Solomooni taatee qeenooch kotetone. 47Ebiyeenoo wotta taatoochi asheenaꞌo taatoo no doono Daawit waan waaꞌi, ‘Ne Nuggishoo Solomoonin neyee besh aricheton, bi taatee qeenonoo ne taatee qeenoyee beshoon tuniibe’ iꞌi biin diiritinaꞌone. Taatoo Daawitiyoo bi qeenoochaa Doono Yeerich goyinneꞌi, 48‘Hanaach ta yaroochee ta taatee qeenooch kotemmon ta hajjee aafo beeggemmoyich tuniiti, Israꞌeelee Nuggishoo Doono Yeeri galleteebe’ itone” iye.
49Ebina Adoniyaasi ceeggiti asheenaꞌo keqqoona qeweheete; tiyii boonoshi kaatti kaatta shaceheete. 50Adoniyaasiyoo Solomoonin shattiye; tiyii hammiꞌi, deejjee gudee qareenaꞌon#1:50 Qaro, bi getteeto qaroochoommon kaame bi xuuggitoyichiye. yechiye. 51Asheenaꞌo Solomoonich, “Ebiyoche, Adoniyaasi neech shattiꞌi, ‘Taatoo Solomooni bi guuno taan goraadoona bi wuxaachemmoyich wogebe’ iꞌi deejjee gudee qareenaꞌon yechitone” iyeete.
52Solomooniyoo ishichiye: “Bi shaaddoon bi tachigaata, bi qelli eexoochee ikkeyona showooch hollaachemmine. Tunebaani ikke gondo bi waanee danegaata, qitemmone” iye. 53Aroochee taatoo Solomooni asheenaꞌon wochetaa hammiꞌi deejjee gudoochee biin kindiiheete. Biyoo waaꞌi, taatoo Solomoonich yittii goyinnehe. Taatoo Solomooniyoo “Ne kexooch hambe” iye.
Currently Selected:
1 Taateenaꞌo 1: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
