1 Taateenaꞌo 22
22
Akaabi Toommooch Mikiyaasi Keemmiti Keemo
(2 Kiinoo 18:2-27)
1Sooriyeenaꞌonaa Israꞌeeleenaꞌona koyeyaanoon keejje naton koteheete. 2Keejjinnee natooba, Yihudee taatoo Yoshafaaxi Israꞌeelee taatoo waan hammiye. 3Israꞌeelee taatoo bi naayinaꞌoyich, “Gilaadee showooch beeti Ramooti katemoo noocho tunoon, nowoo Sooriyee taatoo kishoochee deꞌaanoon cikkiyaa no qayon arii beetote?” iye.
4Yoshafaaxichoo, “Gilaadee showooch beeti Ramootin no kochemmoyich, taanna tookki hammenne?” iye.
Yoshafaaxiyoo Israꞌeelee taatoyich, “Tawoo neenoommo taane; ta ashoo ne ashoommone; ta haresheenaꞌoo ne haresheenaꞌoomminaꞌone” iye. 5Yoshafaaxi daakkiꞌi, Israꞌeelee taatoyich, “Shiichiree Doono Yeerichi daaggoon echebe” iye.
6Aroochee Israꞌeelee taatoo keemechi awudde balli bede asheenaꞌon ikkooch kiciꞌi, “Gilaadee showooch beeti Ramootin koyoyich hambote, qayote?” iꞌi boonoshin echehe.
Boonoshiyoo, “Hambe; Yeeri ne kishooch beshiiree immemmone” iyeete.
7Tunebaani Yoshafaaxi, “Biin no echemmi Doono Yeerichi keemecho baroo hiniich aalle?” iꞌi echehe.
8Yoshafaaxich Israꞌeelee taatoo, “Biinna Doono Yeerin no echaabeeti ikke uro beetone; biyoo Imilaahi bushoo Mikiyaasine. Tunebaani taach bi keemmiibeeto gondoonani, deꞌoon tuno bi qajjitoyich, biin shixxoye” iye.
Yoshafaaxiyoo, “Taatoo ishichaaye” iye.
9Taatoo ikke bi naayon ceeggiꞌi, “Imilaahi bushoo Mikiyaasin kaate ceegi deebe” iye.
10Israꞌeelee taatoonaa Yihudee taatoo Yoshafaaxina taatee tahoon taheꞌi, Shamaari uxeree kellee gaꞌooch beeti maayi buchi xaaꞌooch boonoshi taatee qeeni qeenooch kotee beeheete. Keemechinaꞌo bulliyoo boonoshi aafoochaa keemoon keemmii beeheete. 11Kenanaahi bushoo Sedeqiyaasi qaroommi mooyon xuuroochee shuuneꞌi, “Doono Yeeri ishichiye: ‘Sooriyeenaꞌon boonoshi aallemmi wottoon eboshina kochemmo neene’ itone” iye.
12Keemechinaꞌo bulli, “Gilaadee showooch beeti Ramoot hamiree koye; Doono Yeeri taatoo kishooch beshiiree immemmone” iibee biichoommon keemmii beeheete.
13Mikiyaasin ceegga hammiti wocheyecho biich, “Keemechinaꞌo bulli qaaroon ikkochiꞌi, taatoyich gaaweton keemmii beetinaꞌone. Ne qaaroo boonoshi qaaroona tookki ikkoo bi tunemmoyich, gaaweton ne gettemmoyich, neen qollehoye” iye.
14Tunebaani Mikiyaasi, “Beeyechi Doono Yeeri beege! Doono Yeeri taach gettimmon baach gettemmo taane” iye.
15Taatoo waan bi waammona, taatoo biich, “Mikiyaaso, Gilaadee showooch beeti Ramootin koyooch hambona, qayona?” iye.
Biyoo, “Hami koyi yeshe; Doono Yeeri taatoo kishooch beshiiree immemmone” iꞌi biich wochiye.
16Tunebaani taatoo biich, “Iberoyee besh Doono Yeerichi shigoona koote mooyon taach ne getaachemmoyich, ambiche wottooniye neen ta wogii beeyemmo?” iye.
17Mikiyaasiyoo, “Israꞌeelee asheenaꞌo bulli qiddaalli bagoochoommon guudinaꞌo toommooch boonoshi shacee beetaa beeggoye. Doono Yeeriyoo, ‘Eboshich qiddoo aalloone. Diggoona boonoshi kexi kexooch wottebeete’ itone” iye.
18Yoshafaaxich Israꞌeelee taatoo, “Gondoonani, deꞌe mooyon taach kemaachemmo bi tunoon getaano taane?” iye.
19Aroochee Mikiyaasi ishichiye: “And illa Doono Yeerichi qaaroon waayebe! Doono Yeeri bi taatee qeenooch koteꞌi, shimaajji maraakoo bulliyoo bi gaꞌooch, bi qanninaa bi yoochinooch neexeꞌi beeton beeggoye. 20Doono Yeeriyoo ‘Koni Gilaadee showooch beeti Ramoot hamiree Akaabin bi qitemmoyich muriciiba?’ iye.
“Ikke maraakoo ikke mooyon, wotta bare maraakoo bare mooyon gettiye. 21Aroochee ikke ayaano kechiꞌi, Doono Yeeri aafooch neexeechii, ‘Ta biin muriciyemmo taane’ iye.
22“Doono Yeeriyoo biich, ‘Aabichireeshiye ne muriciyemmo?’ iye.
“Biyoo, ‘Hamiree, bi keemechinaꞌo bulli kootoon keemmemmoyich tuniyemmo taane’ iye.
“Doono Yeeriyoo, ‘Muriciyemmo neene; neechoo kaamemmone; hamiree, ebin tuniibe’ iye.
23“Andoo ebiyoche, Doono Yeeri ebi ne keemechinaꞌo bulli noonooch koote ayaanoon kotiitone. Doono Yeeri ne toommooch gondoon tuniyemmo bi tunoon gettitone” iye.
24Aroochee Kenanaahi bushoo Sedeqiyaasi Mikiyaas waan giddeꞌi, bi gaakkooch tappeechii, “Doono Yeerichi Ayaano neen bi yibbaatiito, ta waanee aabina besheꞌiniye?” iye.
25Mikiyaasiyoo, “Ebiyoche, arooba aasheya gatooch ne giyiyooba, beeggemmo neene” iye.
26Aroochee Israꞌeelee taatoo ishichiye: “Mikiyaasin yeshote; katemee iraashoo Amooninaa taatoochi bushoo Yoꞌaashina waan daambote. 27Aroochee, ‘Taatoo, “Diggoona ta wottemmi wottoon, ebi uroon cuyee kexooch gedote; dapphe koshonaa aaconoyee besh amoonolla biich immaahote” itone’ getote” iye.
28Mikiyaasiyoo, “Diggoona ne wottegaata, Doono Yeeri taanna getaanoone” iye. Aroochee, “Asheenaꞌote, ittoshi bulliyoo ebin waayebote” iye.
Akaabi Qitoo
(2 Kiinoo 18:28-34)
29Ebina Israꞌeelee taatoonaa Yihudee taatoo Yoshafaaxina Gilaadee showooch beeti Ramootin kocha hammiyeete. 30Yoshafaaxich Israꞌeelee taatoo, “Ta aricheyaachemmoyich, koyooch ta giyemmo ta tahoon shaddireeshiye. Tunebaani ne, ne taatee tahoon tahebe” iye. Israꞌeelee taatoo taatee tahoon shaddiꞌi koyooch giyiye.
31Sooriyee taatoo gaarinaꞌochi ukkireenaꞌo tuneti shaashaa gutte asheenaꞌoyich, “Israꞌeelee taatoyee besh, giisho tuneba oogoo koninolla tookki koyeyaahote” iꞌi gettitone. 32Gaarinaꞌochi ukkireenaꞌoo Yoshafaaxin beeggiꞌi, “Iberoon hini Israꞌeelee taatoone” iꞌi gabiyeete. Ebich biin kocha bi waan guuddiyeete. Yoshafaaxiyoo cookiye. 33Gaarinaꞌochi ukkireenaꞌo Israꞌeelee taatoo tunee bi qayon beeggiꞌi, biin yoohoochee wotteheete.
34Tunebaani ikke uro diqqoona bi maꞌoona shangoon awureꞌi, Israꞌeelee taatoon, bi getee ginee tahee danoochaa kochiye. Aroochee taatoo bi gaarin gashee beetoyich, “Kochaa mayeto taane; gubb wochi gasheree koyee daggoochee taan kichibe” iye. 35Arooba koyo qeeccii hammiye. Taatoo Sooriyeenaꞌo waan bi aafoon wochii, bi gaari toommooch teeqqeꞌi beehe. Bi mayee damoo gaari maacooch ufee beehe; aroobee xumoo qitiye. 36Aabee gimooch Israꞌeelee ginee naayinaꞌo daggooch, “Asho bi ikkikkoona bi katemooch, bi ikkikkoona bi showooch wottebe” ii beeti cookoo cookeehe.
37Ebina taatoo qitiye; Shamaara deebiꞌi, arooch duukkiyeete. 38Aroochee Shamaara beeti kote aacona gaarin machiyeete. Doono Yeeri gettiti qaaroommon, bi damoon kunaaneenaꞌo nappheheete; yahechinaꞌo are aacona macheheete.
39Akaabi shuuneti eche shuunoo, bi tuniiti mooyo bulli, dangeyi gashoona bi mashaamiiti bi taatee kexochonaa bi shuuneti katemeenaꞌo bullichona Israꞌeelee taateenaꞌo kiinee macaafooch kooreetone. 40Akaabi qitiꞌi bi qaabbechinaꞌo waan xaꞌeehe. Bi bushoo Akaziyaasi bi xaaꞌooch kereeꞌi taatehe.
Yihudee Taatoo Yoshafaaxi Mooyo
(2 Kiinoo 20:31–21:1)
41Israꞌeelee taatoo Akaabi taateti awuddinnee natooba, Aasi bushoo Yoshafaaxi Yihudee showooch taatehe. 42Yoshafaaxi bi taatehooba, bi eeno shaashaa uuche natone. Yerusaalem beechii hiyaa uuche naton qeejjiye. Bi indee Azuubi getteehan; biyoo Shilihi busheene. 43Yoshafaaxi bulli mooyona bi nihoo Aasichi gommon dabbiye; aroochee okk hach getaanoone. Doono Yeeri aafooch kaame mooyon tuniihe. Tunebaani guudi toommeexi goyinnee xaaꞌeenaꞌon aalliyaanoone. Asheenaꞌo andoo guudinaꞌo toommooch beeti goyinnee xaaꞌeenaꞌooch deejjoon deejjii, ixaanoonoo shookkii beeheete. 44Yoshafaaxiyoo Israꞌeelee taatoona tookkii shunoona beehe.
45Yoshafaaxi shuuneti eche shuunoo, oogeti giidecho bi tunoonaa bi koyeti koyoona Yihudee taateenaꞌo kiinee macaafooch kooreetone. 46Bi nihoo Aasi yemeenooba echeti, yaafee kechi yahechi anaaminaꞌon showoochee aalliihe. 47Ebiyooba Edoomee showooch taatoo aalloone; showoon qeejjiibeeto, Yihudee taatoo iraashiiti iraashoone.
48Yoshafaaxi aachoon deeboyich, Ofiir hammemmi, Tarisheshee markabeenaꞌon shuuniihe. Ebi markabeenaꞌo Etsiyoon Geberaa boonoshi tiishetoyich, hamaaneenaꞌone. 49Akaabi bushoo Akaziyaasi Yoshafaaxich, “Ta asheenaꞌo ne asheenaꞌona tookki markaboona hambeete” iye; tunebaani Yoshafaaxi qajjiye.
50Yoshafaaxi qitiꞌi bi qaabbechinaꞌo waan xaꞌeehe. Boonoshi duukketi, bi qaabbechi Daawiti Katemooch duukkehe. Bi bushoo Yehoraami bi xaaꞌooch kereeꞌi taatehe.
Israꞌeelee Taatoo Akaziyaasi Mooyo
51Yihudee taatoo Yoshafaaxi taateti araa shabaattinnee natooba, Akaabi bushoo Akaziyaasi Shamaara beechii, Israꞌeeleenaꞌo toommooch taatehe; Israꞌeeleenaꞌon gutte naton qeejjiye. 52Biyoo Doono Yeeri aafooch gonde mooyon shuunehe. Bi indeenaa bi nihoonochi, wotta Israꞌeeleenaꞌon axaaxoon shuuniiti, Nebaaxi bushoo Yeroboꞌaminochi gommon dabbiye. 53Baꞌaaloyich goyinnee maddehe; bi nihoochoommon, Israꞌeelee Nuggishoo Doono Yeerin ippiihe.
Currently Selected:
1 Taateenaꞌo 22: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
