1 Taateenaꞌo 21
21
Elizabeeli Nabootin Wuxiyoo
1Yezireelee asho Nabootich Shamaaree taatoo Akaabichi taatee kechi gaꞌooch woyinee budo beehe. 2Ikke areddoon Akaabi Nabootich, “Ne budo beeto, ta taatee kechi gaꞌooch bi tunetoyich, bechee michi xaaꞌoo ta tuniyemmoyich taach imbe. Ebichi keroon biyee beshe woyinee budon neech immemmo taane; woyee ne qaawigaata, bi gatiyee gijjoon qoccemmo taane” iye.
3Tunebaani Nabooti Akaabich, “Ta qaabbechinaꞌo waanee ta woraashiti showoon neech imon Doono Yeeri ta waanee wokkiibe” iye.
4Yezireelee asho Nabooti, “Ta qaabbechinaꞌo waanee ta woraashiti showoon neech imaache” bi itoyich, Akaabi ippee kaareꞌi bi kexooch hammiye; bi aafoon daabbo waan wochiꞌi, bi qeenooch teeqqehe; maayoonoo mahehe.
5Bi mechee Elizabeeli bi waan waaꞌa, “Ebi shaahoon ne ippeto, maayoonoo ne maheto, amoyichiye?” iyan.
6Biyoo areyich “Yezireelee asho Nabootin ‘Ne woyinee budon gijjoona taach kembe; woyee ne qaawigaata, bi keroon bare woyinee budon neech imbona’ iyo. Tunebaani bi, ‘Ta woyinee budon imaache’ iꞌi taach bajjiye” iye.
7Bi mechee Elizabeeli biich, “Ebi neene, Israꞌeelee showoon qeejjemmo? Tiyiree maayoon mame; ne mulloo emiribe; Yezireelee asho Nabootichi woyinee budon ta, neech immemmi taane” iyan.
8Biyoo Akaabichi shigoona koorichoon kooriyan; Akaabichi maatemoonoo dukkahan. Nabooti beeti katemooch biinna tookkii beeti geeneenaꞌonaa ogoogeenaꞌonoyich daachiihan. 9Koorichoon ishichaꞌa kooriyan: “Coomee awaajjoon awaajjibote; Nabootichoo oogee xaaꞌoon imbote. 10Gutte gaacaalli asheenaꞌon bi ciinooch ittoshi kotiitaa, ‘Yeerinaa taatoonon naaggitone’ geti bi toommooch miixebeete. Ebiyee gubb, biin katemoyee maach kichiree, xaqqoona yexi wuxibote” iyan.
11Ebina Yezireeli katemee asheenaꞌo, eboshiyoo geeneenaꞌonaa ogoogeenaꞌona, Elizabeeli koorichoon kooraꞌa boonoshich bi gettetoommon tuniiheete. 12Coomee awaajjoon awaajjiyeete; Nabootichoo oogee xaaꞌoon immiyeete. 13Gutte gaacaalli asheenaꞌoo waaꞌi bi ciinooch koteheete. Ebi gaacaalli asheenaꞌo, asheenaꞌo aafoochaa, “Nabooti Yeerinaa taatoonon naaggitone” iꞌi bi toommooch miixeheete. Ebich asheenaꞌo biin katemoyee maach kichiꞌi, xaqqoona yexxii wuxiyeete. 14Ebiyee gubb, Elizabeelich, “Nabooti xaqqoona yexaa qititone” iꞌi wochoon daachiiheete.
15Elizabeeli Nabooti xaqqoona yexaa bi qitoon waayaꞌa, bekkech Akaabich, “Nabooti qititone; ‘Gijjoona kemaache’ iꞌi bi bajjiti, bi woyinee budon tiyi hamiree woraashibe” iyan. 16Akaabiyoo Nabooti qitoon waayeꞌi, bekkech bi woyinee budon woraashoyich tiyii, desh hammiye.
17Aroochee Doono Yeeri Tishibee asho Eliyaasich ishichiye: 18“Shamaara beeti Israꞌeelee taatoo Akaabina danoyich, tiyiree desh hambe. Ebiyoche, woraashiya bi hammiti, Nabootichi budooch beetone. 19Newoo biich ‘Doono Yeeri ishichiye: “Wuxaachaa bi showoon woraashinne?” itone’ gete; wotta daakkiree biich, ‘Doono Yeeri ishichiye: “Kunaaneenaꞌo Nabootichi damoon nappheti xaaꞌoochaa ne damoon ebiyoommon napphemminaꞌone” itone’ gete” iye.
20Akaabi Eliyaasin beeggiꞌi, “Ta ettoocho, batt taan danenne?” iye.
Eliyaasiyoo biich wochiꞌi ishichiye: “Eeha, Doono Yeeri aafooch gonde shuunoon shuunoyich ne qelloon kemmeto ne tunetoyich, neen daneto taane. 21Ebich Doono Yeeri ishichiye: ‘Gonde mooyon ne toommooch deebemmo taane. Neen ciroona hidi aalliyemmo taane. Akaabi yaroochee guuno tuneba doono, anaamo bullin Israꞌeelee showoochee aalliyemmo taane. 22Taan ne ippiitonaa Israꞌeeleenaꞌon axaaxoon ne shuuniitonoyich, ne kechi asheenaꞌon Nebaaxi bushoo Yeroboꞌami kechi asheenaꞌonaa Akiyi bushoo Baꞌaashi kechi asheenaꞌonochoommon tuniyemmo taane’ itone.
23“Wotta Doono Yeeri Elizabeelichon ishichii beetone: ‘Yezireeli katemee xaqqee uxeree gaꞌoochaa Elizabeelin kunaaneenaꞌo maayemminaꞌone’ itone.
24“Akaabi yaroochee katemoochaa qitimmon kunaaneenaꞌo maayemminaꞌone; gaddoochaa qitimmonoo shimaajji gaceenaꞌo maayemminaꞌone” iye.
25Bi mechee Elizabeeli biin shuurikkaa, Doono Yeeri aafooch gonde mooyon shuunoyich bi qelloon kemmiti, Akaabiyoommi asho aalloone. 26Doono Yeeri Israꞌeeleenaꞌo aafoochee yookkii kichiti Amooree asheenaꞌo tuniitoommon, biyoo shahalloyich goyinnee maddoona oogichii ciigiiti shuunoon shuunehe.
27Akaabi ebi qaaroon waayeꞌi, bi tahoon keexxiye; dookoon taheꞌi coomiye; dookoochoo qeyiye. Qumittimiꞌinoo hammii beehe.
28Aroochee Doono Yeeri Tishibee asho Eliyaasich ishichiye: 29“Akaabi bi qelloon ta aafooch aabichiꞌi bi giishiito gaata beeggaa beetine? Bi qelloon ta aafooch bi giishiitoyich, gonde mooyon bi yemeenooch deebaachemmo taane. Tunebaani bi bushoochi yemeenooch gonde mooyon bi kexooch deebemmo taane” iye.
Currently Selected:
1 Taateenaꞌo 21: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
