Ibrani 8

Si Yesus Imam Wangko' imaali mai im perjanjian si lumoorai

1 # Mzm. 110:1 Si penting keli asé im pakasa sé pepaarenta anio', sapaoka kita makaanu Imam Wangko' si ra'io cakua si makalukut ang kakan im palukutan pasiri-siriin i Amang Kasuruan si Mangko-wangko' an sorga. 2Sia maéma' in tawoien-Na tanu Imam Wangko' asi tampa le'nas, siituo si ténda aseli si winangun i Amang Kasuruan in esa ra'ica winangun é tou.

3Susur imam wangko', aitantu e méé i raragés binatang pinokol wo raragés walina. Taniitu ka'i wo si Yesus Imam Wangko'ta, Sia musti makaanu sapa sé ro'na iragés. 4Sa Sia ang kayo'baan, tantu Sia ra'ica mamuali imam, ampa'paan ang kayo'baan awéano sé imam mengawéé i raragés iciit in atoran an ukum Torat. 5#Kel. 25:40 Séra mengaselewir tanu imam an ténda paapo'an en ulitna asalo mamuali patron wo bayangan asé sapa sé an sorga. Ampa'paan an tutuw i Musa masalé' mangun in ténda paapo'an, sia kinuanan i Amang Kasuruan in tana'i, “Musti émaanmu em pakasa iciit im patron si aituru'-Kuo ai co am bawo ing kuntung itu.” 6Taan intarépé' si Yesus imakéréo tawoien tanu imam si lébé iparayo wo pasiriin wo in tawoien é imam indior. Ampa'paan Sia maali mai im perjanjian si lumoorai wo im perjanjian uré, ampa'paan si Amang Kasuruan ijumanjio andumoro' sé lébé loorai.

7Sa woo em perjanjian kataré itu makaleke-lekep, tantu ra'io sangali ka'i émaan i Amang Kasuruan em perjanjian karua. 8#Yer. 31:31-34 Taan indior sérén i Amang Kasuruan séra awéan kaséaan e ra'ica makiit in atoran asi perjanjian kataré, akar Sia kumua ai séra in tana'i,

“Uli-ulit maai oka en témpona,

émaan-Ku oka esa perjanjian weru

ang karapi é tou Israel wo sé tou Yehuda.

9Wo em perjanjian weru itu ra'ica meputé wo

im perjanjian uré si niéma'-Ku a sé apo-apo' éra

an tutuw éra paakinen-Ku kumesot an tana' Mesir.

Séra ra'ica menonou makiit in atoran asi perjanjian si niéma'-Ku,

ampa'paan in ituo séra ra'ica pandungen-Ku.

10Taan intarépé', si anioo em perjanjian si émaan-Ku oka

ang karapi é tou Israel, asé endo mengangai sa.

Iweta'-Ku oka en ukum-ukum-Ku a ngaas éra,

wo ipatic-Ku oka en itu an untep in até éra.

Yaku mamuali oka Amang Kasuruan éra,

wo séra mamuali oka tou-Ku.

11Wo séra ra'io sangali mensusuian wo sé kara-karapi kuma'pa

sé poo-poow éra, wosama' makatuus si Casuruan.

Ampa'paan séra im baya tumo'tol asé tou ra'ica penting

akar a sé tou penting makatuus oka Yaku.

12Wo iwéé-Ku oka eng kaupusan-Ku ai séra

ampa'paan ing kamesé-meséaan si niéma' éra

wo ra'io ka'i ta'néien-Ku eng kamesé-meséaan éra.”

13Anaé, ampa'paan si Amang Kasuruan makua in andumoro' in esa perjanjian weru, kaséréano wutul sapaoka em perjanjian kataré nianggap ra'io mapaké. Wo sapa si ra'io mapaké wo ilumangkoio makala'us oka maka'pu.

Currently Selected:

Ibrani 8: TNT

Highlight

Copy

Compare