2 Timotius 3

Em peri é tou an tutuw imayo en endo kaka'puan ing kayo'baan

1Musti kailekanmu é Timotius, sa imayo en témpona in endo kaka'puan ing kayo'baan, meta'up oka in endo-endo sé wuta ing kawenduan. 2Wo asé endo itu ka'i, sé tou asalo oka mengaupus in owak éra in esa wo mamuali ata in doit. Séra mengatowo oka wo mengatirayo in owak éra in esa, mengawuruk i ngaran é tou. Séra mengasundur sé matu'a, ra'ica makailek mengawéé i makapulu'sama' wo ra'ica mapandung i mengaapo' a si Casuruan. 3Séra ka'i ra'ica mengaupus sé tou walina, ra'ica kiim meelu- eluran ang karapi é tou, masalé'ke' mengaléwo' i ngaran é tou, ra'ica makawoo tumang in owak, bengis, ra'ica masalé' pakasa sé loor, 4masalé' mengakianat sé tou, kolek em ipakawerot, mapa im pandéi, masalé'ke' maaru-arui kiit ing kasalé'an éra in esa ra'ica kiim kumiit ing kasalé'an i Amang Kasuruan. 5Sa asalo suméré im paémaan éra, séra itu tanuoka woo mengaapo' wutul a si Amang Kasuruan, taan en ulitna séra ra'ica masalé' maké ing kawasa i Casuruan. Anaé, séra ra'ica wutul makiit si Casuruan. Ampa'paan in itu tumayango mangé ai séra!

6Ampa'paan awéan piraan tou an uner éra muntep maene-enep am balé é tou walina e matawér sé wéwéné bodok sé taporak katawéran ampa'paan sé wéwéné itu wutu-wutul mendam ing keli kamesé-meséaan wo kinawasapé' ing kasalé-salé'an in owak. 7Sé wéwéné itu mangile-ngilek in susuian é tou walina, taan en até éra ra'ica kiim tumerima in sususuien wutul itu. 8#Kel. 7:11 Katané'ianmupé' to en sisisilen i Yanes wo si Yambres? Indior séra in dua isumundur si Musa, en itu tanu intarépé' sé tou mengatawér sé wéwéné, séra itu ka'i mengasundur in sususuien wutul andumoro' si Yesus. Em bewerot é tou itu kinawasao im bewerot léwo' wo em paémanen éra a si Yesus ra'ica wutul. 9Mandé ka'i séra mepé'o tumawér sé tou, taan séra ra'ica makawoo tumawér sé tou itu. Mengu ré-uré kaséréano wutul é tou sapaoka séra itu ra'ica makailek in sapa-sapa, puté ka'i wo indior sé tou isuméréo si Yanes wo si Yambres ra'ica makailek in sapa-sapa.

En sususuien wutul ang Kitap Le'nas

10Taan ko é Timotius, makaileko sé aisusuiku, em periku, em pendirianku, tambisa aku maéman a si Yesus, eng katalesenanku, en upusku a sé tou wo eng kale'tekanku mengaéma' in tawoienku. 11#Kis. 13:14–14:20 Kailekanmu ka'i tambisa sé tou mokoi yaku ang kota Antiokhia, an Ikonium wo an Listra akar aku mawendu ulit. Taan aku aiwekar i Casuruan am pakasa in itu. 12Mémang pakasa in tou maéman a si Kristus Yesus wo kumiit ing kasalé'an-Na meta'up oka in okoi. 13Taan sé tou léwo' wo sé tou mengauwak, séra itu makaléwo' oka. Séra mengauwak sé tou, taniitu ka'i wo sé tou walina maréng sumawel sumuli' muwak iséra.

14Taan musti timboienmu sumama-sama' en sususuien wutul itu sé tinerimamuo wo si paémanenmu. Ampa'paan kailekanmuo im butul sé tou isumusuio ai co indior anaé séra ro'na émanenmu. 15Ta'néienmu sumama-sama', tumo'tolai ko in toyaangé', ico makaileko ing Kitap Le'nas. Eng Kitap Le'nas itu ro'na méma' ico mapinter akar ko ro'na maéman a si Kristus Yesus wo Sia ro'na lumowir ico. 16Pakasa en aipatic ang Kitap Le'nas, nunuwu' i Amang Kasuruan owo. Wo pakasa en itu eng katoronaanna: sumusui sé tou, tumuru' ing kameséaan é tou, mutul im peri léwo' é tou, wo sumusui sé tou wosama' menonou wutul an dior i Amang Kasuruan. 17Wo in taniitu, eng Kitap Le'nas itu méma' sé tou i Amang Kasuruan makawoo méma' im pakasa sé loor.

Currently Selected:

2 Timotius 3: TNT

Highlight

Copy

Compare