2 Timotius 2

En sina'u malese-lesen kumiit si Kristus Yesus

1Timotius, toyaangku! Si Kristus Yesus tumambéro mai in upus-Na ai co, ampa'paan in ituo pakéno en itu eng kumeter in atému. 2Liningamuo en sususuien si aisusuikuo an dior é tou keli. Musti isusuimu en itu a sé tou walina sé ro'na percayanmu wo sé pandéi masusui. Wo in taniitu séra ro'na sumusui sé tou walina.

3Sa en tawoienmu niéma'muo waya wo ko masusa, ico musti malese-lesen wo le'tek tanu si suraro loor i Kristus Yesus. 4Sa si suraro an tutuw i matawoi, ra'ica pandungenna en owakna wo sé urusan walina. Sia asalo makasaru in tawoienna itu wosama' si kikiitenna arui ai sia. 5Sa si tou kumiit i mekowa', sia musti kumiit in atoran-atoran im pekowaan itu wosama' muntung. 6Awéané' ka'i andumoro' si menganguma. Sia matawoi mauli-ulit an umana, anaé sia eng kataré-taré kumaipi im bua'na in tinanemna. 7Wéanio' rékén sumama-sama' sé aicuakuo itu. Wo in taniitu, tantu ko wéan oka i Casuruan kawooan wosama' makailek waya in itu.

8Ta'néien in sumama-sama' en anio': si Yesus Kristus taranak i Daud, wo maté taan tinou sumawel i Amang Kasuruan. Si anioo en Abar Kaaruien si pakua-kuakuo am bisa-wisa. 9Ampa'paano aku makua in Abar Kaaruien itu, yaku pengaokoien é tou, pengawa'kesen éra i ranté tanuoka tou léwo', taan en taar i Amang Kasuruan ra'ica toro kawa'kesan. 10Ampa'paan in iituo aku talesen mengawuléng ing kawenduan itu wosama' sé tou sinisiro i Amang Kasuruan ro'na maéman a si Kristus Yesus wo makéré ing kalowiran ang karapi i rarayo wo in sisiri' akar ing kauré-uré.

11Ulito e nunuwu' anio',

“Sa kita imatéo ang karapi-Na

kita ka'i menonou oka ang karapi-Na.

12 # Mat. 10:33; Luk. 12:9 Sa kita kasake' le'tek maéman ai Sia,

kita ka'i merénta oka sé tou mewali-wali wo Sia.

Sa kita kumua ra'ica makatuus Sia,

Icua-Na oka ka'i Sia ra'ica makatuus icita.

13Mandé kita ra'ica le'tek, Sia kasake' tuu le'tek,

ampa'paan sapa en aicua-Na ra'ica kawisa sangkalen-Na.”

Eng katouan si casalé' i Casuruan

14Pokéiano mangé sé tou maéman andumoro' im pakasa sé aicuaku ai co. Icua mangé ai séra ang karapi i mauli-ulit an dior i Amang Kasuruan sapaoka séra ra'ica toro meindo-indoan roma' andumoro' ing kaangéan i nunuwuun itu, ampa'paan en itu ra'ica wana torona wo asalo lumicoko sé tou iluminga in itu. 15Émaano mangé sumama-sama' en tawoienmu wosama' si Amang Kasuruan masalé' ico. Ang karapi i méma' in taniitu, ko ra'ica malawi' an dior i Casuruan, wo ro'nao icuamu a sé tou ang karapi i makakii-kiit en sususuien wutul itu. 16Ico ka'i tioo sumusut a sé tou mapaar im papaaren sé ra'ica wana torona wo a sé tou sé ra'- ica mengasiri' si Casuruan. Ampa'paan sé tou mapaar in taniitu méma'ke' taré iséra ra'ica maindé' ai Sia. 17Em papaaren éra si ra'ica wutul itu icaseraro wo kaindéén, puté wo en sakit kanker. Wo an uner é tou mapaar itu, am bitu si Himeneus wo si Filetus. 18Séra in dua itu isumélé'kowo a si sususuien wutul. Pengasusui éra sapaoka sé tou imatéo, tinouo sumawel i Amang Kasuruan, anaé ra'io wana tou en touené' sumawel. Wo em pengasusui éra itu, lumicokoo piraan tou sé maémano a si Yesus. 19Taan em patuuran niéma' i Amang Kasuruan ulit keter. Em patuuran itu aipatic in tana'i, “Katuusan i Casuruan sé tou-Na” wo “Si séike' mangé sé maapo' a si Casuruan, mentoo mengéma-ngéma' in léwo'.”

20Am balé é tou siya', awéan pakakas-pakakas sé niéma' a mas, am pérak, ang kayu wo ka'i awéan sé niéma' an tana' pulut owo. Em pakakas sé niéma' a mas wo pérak papakén ang kasalé-salé'an wangko'. Wo em pakakas si niéma' ang kayu owo wo tana' pulut, papakénke' ang kasalé-salé'an teké' sé kanaramenke'. 21Taniitu ka'i wo sé tou maéman. Sa awéan tou mento' maéma' ing kaléwo-léwo'an, sia asalo pengapakén i Casuruan asé tawo-tawoien loor. Émaan i Casuruan en até i tou itu male'nas. Si Casuruan arui maké isia ampa'paan sia ka'i tu'tul mengaéma' pakasa in tawoien loor.

22Ampa'paan ituo, tumayango mangé ko asé kasalé-salé'an sé manaram pengaémaan é tou wo'bas. Taan ko rumaméji mangé mengaéma' in tana'i: Ra'ica mengarapit, lume'tek angé a si Casuruan, mengaupus angé sé kakélé in tou wo menonou angé elur wo sé kakélé tou. Émaano mangé waya en itu mewali-wali wo sé pakasa in tou sé maémano a si Casuruan ang karapi in até weresi. 23Tioo ko meindo-indoan roma' andumoro' i roroma' sé ra'ica wutul wo ra'ica patus. Kailekanmu sa meindo-indoan roma' taniitu mengaéma' ing kaperéndéran é tou. 24Taan si tou matawoi torona i Casuruan tanu ico ra'ica toro meindo-indoan roma' taniitu. Aweso taré si tou itu musti sama' a sé pakasa in tou, pandéi masusui wo ka'i talesen a sé pakasa in tou. 25Sia musti masusui ang karapi ing ko'kos en até a sé tou sé mengasundur in sususuien wutul. Sia musti mengaéma' in taniitu ampa'paan sa si Casuruan méé mai témpo ai séra, séra ro'na mape'dis akar séra ro'na makailek in sususuien wutul itu. 26Wo in taniitu séra makailek in tou sumawel wo icawekar an ta'kong i kikiiten é sétang si kumawasa iséra indior akar séra kumiit ing kasalé'an i kikiiten é sétang itu.

Currently Selected:

2 Timotius 2: TNT

Highlight

Copy

Compare