2 Tesalonika 3
3
Em pinangilek i Paulus a sé jamaat en sumombayang torona sia
1Poo-poow, pangileken ami ai camu isombayang angé kami, wosama' en taar i Casuruan si pakua ami rior icaserar am bisa-wisa wo ro'na iparayo-rayo é tou tanu si mamuali ai camu indior. 2Wo ka'i isombayang angé wosama' kami cawekar asé tou sé mengaéma' ing kalicokoan wo asé tou léwo', ampa'paan ra'ica im pakasa in tou mapercaya in taar i Casuruan itu.
3Taan si Casuruan itu le'tek. Keteran-Na oka mai en até miow wo téiran-Na oka kamu ang kaléwo-léwo'an. 4Wo percayan ami mauli-ulit a si Casuruan in andumoro' miow, sapaoka kamu ang karoro'ano maéma' in sapa sé aitaaro ami ai camu wo pengéma-ngémaano mangé en itu.
5Pangileken ami a si Casuruan wosama' akinen-Na mai kamu akar en até miow makailek sapaoka si Amang Kasuruan mengaupus icamu wo ka'i si Yesus Kristus mengawéé ing katalesenan ai camu.
Pakasa en tou musti tumawoi
6Poo-poow, peréntan ami kamu maké ing kawasa i Apo' Yesus Kristus, wosama' tumayango mangé kamu asé poo-poow sé ra'ica kiim tumawoi wo sé ra'ica makiit in sususuien si aiwééo ami ai camu. 7Ampa'paan kailekan iow in esa tambisa e musti kumiit ing katouan ami, ampa'paan an tutuw kita mewali-walipé', kami re'dem matawoi. 8Kami ka'i ra'ica kawisa kuman ing kakanen é tou walina wo ra'ica winéran. Taan kami ka'i re'dem ulit matawoi endo wo em bengi wosama' kami ra'ica mamuali pamuléngen iow. 9Émaan ami en itu ra'ica ampa'paan kami ra'ica wana hak en tulungen é jamaat. Taan ra'ica kiim ami e maké in hak itu. Kami re'dem matawoi in taniitu ampa'paan kami masalé' mamuali paandéan wosama' kiiten iow. 10An tutuw ami mewali-walipé' wo icamu, aita'néi amio ai camu sa awéan tou ra'ica kiim tumawoi, sia ra'ica toro kuman.
11Icua ami en anio' ampa'paan liningao ami sapaoka an uner iow awéan sé tou weles, ra'ica kiim tumawoi. Séra itu masalé'ke' marambé-rambét in urusan é tou walina. 12Sé tou taniitu, pokéian wo sina'uenta maké i ngaran i Apo' Yesus Kristus, wosama' séra menawo-nawoi ang karapi in elur wo in taniitu séra mangéréo ing kakanen in esa. 13Wo kamu é poo-poow, tioo mengasuut mengéma-ngéma' sapa sé loor.
14Sa awéan tou ra'ica kiim kumiit sé aipatic ami an surat anio', kamu musti mareti-reti wo tioo makara-karapi wo si tou itu wosama' sia malawi'. 15Taan tioo anggapen iow sia itu kaséké'. Aweso taré' sina'uen angé sia itu tanu poow iow in esa.
En siri' ing kumusi'
16Wayake' si Casuruan e ro'na méma' in até é tou elur. Pangileken ami ai Sia wosama' endo wo em bengi émaan-Na en até miow elur am baya-waya. Pangileken ami ai Sia ka'i wosama' mewali-wali wo icamu im baya. 17En siri' anio' a yaku owo, Paulus. En siri' anio' aipaticku ing kamaku in esa. Pakasa en surat aipaticku maké in tuus tanu siitu. Siituo en tuusna sapaoka en surat itu wutu-wutul a yaku owo. 18Pekiupusenku wosama' si Yesus Kristus, Apo'ta tumambérai in upus-Na ai camu im baya.
Currently Selected:
2 Tesalonika 3: TNT
Highlight
Copy
Compare
Share
Want to have your highlights saved across all your devices? Sign up or sign in
En Taar Weru a nunuwu' é Tontemboan @ LAI 2018
