1 Timotius 1

En siri'

1En surat anio' a yaku owo Paulus, si mamualio ruru'du'an i Kristus Yesus kumiit im perénta i Amang Kasuruan Si Lumolowirta wo si Kristus Yesus si paarapenta.

2 # Kis. 16:1 Ico é Timotius uli-ulit toyaangku am paémanen. Pangilekenku a si Amang Kasuruan wo si Kristus Yesus Kasuruanta, tumambérai ing kamang, tumuru' mai ing kaupusan wo méma' ing katouanmu elur.

Matéi-téir a sé tou sé masusui in sususuien ra'ica wutul

3An tutuwku maangém a Makedonia, pangilekenku ko mentoo mio' an Efesus. Am bitu ko ro'na sumina'u sé tou masusui in sususuien ra'ica wutul, wosama' yento' érao masusui in sususuien sé ra'ica wutul itu. 4Wo icua mangé ka'i ai séra wosama' ra'io toro mengasisil in sisisilen sé asalo niéma' é tou wo sisisilen andumoro' é apo-apo' sé aipatic taloso lambot. Pakasa en itu asaloke' méma' ing kaperéndéran wo ra'ica tumawang sé tou kumiit ing kasalé'an i Amang Kasuruan e makéré ing kalowiran. 5Sina'uku waya en anio' ai co wosama' sé tou meupu-upusan. Wo en upus itu musti lumembomai an até le'nas wo an até weresi owo wo am paémanen imauli-ulit. 6Taan awéan sé tou ra'io kiim maéma' im pakasa in itu, séra memaa-maarke' im pepaaren sé ra'ica wana eng katoronaan. 7Séra itu sé masalé' mamuali guru en sumusui in ukum Torat si aipatic i Musa, taan ra'ica kailekan éra sapa em pasusui éra itu. 8Kailekanta en ukum Torat itu loor, sa pakén é tou makakii-kiit. 9En ukum ang Kitap Le'nas itu ra'ica niéma' torona é tou sé maéma' im butul, taan niéma' torona é tou sé ra'ica makiit in ukum wo sé tou ra'ica le'tek, torona é tou léwo' wo sé tou mengaéma' ing kamesé-meséaan, torona é tou makiit ing kasalé'an ing kayo'baan wo ra'ica maéman a si Casuruan, torona é tou sé mengapaté si amang wo si inang, torona é tou sé kinakelian mengapaté tou, 10torona ka'i é tou mengacabul, sé tuama mengacabul a sé kakéléna tuama, sé mapu'is in tou en wangkér émaan ata, sé kotowo, sé tou mengasairi in towo wo ka'i sé tou makélong in sususuien wutul. 11En sususuien wutul itu aipatic an Abar Kaaruien andumoro' i Yesus Kristus, si asi Amang Kasuruan wangko' owo si patus parayo. Wo en Abar Kaaruien itu aitokéo a yaku en icua.

Si Paulus kumua i makapulu'sama' a si Kristus Yesus

12Yaku kumua i makapulu'sama' a si Kristus Yesus Apo'ta, ampa'paan Siao si méé mai ing kaketeran a yaku. Anggapen-Na aku tou le'tek ai Sia, akar tinokéan-Na mai aku mamuali maselewir ai Sia. 13#Kis. 8:3, 9:4-5 Indior aku maojat si Apo' Yesus. Paokoienku wo paséro'ku ka'i sé tou maéman ai Sia. Mandé in taniitu, aituru'-Na eng kaupusan-Na a yaku ampa'paan aku ra'ipé' maéman ai Sia si Toyaang i Amang Kasuruan wo ra'ica kailekanku sapa e niéma'ku. 14Wopé'ka'i, si Casuruanta tumambéro mai ing kamang si lumébé-lébéo a yaku. Niéma'-Na ka'i aku akar makawoo maéman a si Kristus wo ka'i ro'na mengaupus sé tou walina.

15Sé nunuwu' anio' ulit wo ro'na teriman wo percayanmu. En aicua tana'i: Si Kristus Yesus mai ang kayo'baan en lumowir sé tou ang kamesé-meséaan. Wo a sé im pakasa in tou sé sumangkumo mengaéma' ing kamesé-meséaan, yakuo si kumeli-keli mengaéma' ing kamesé-meséaan. 16Mandé ka'i in taniitu, aituru' i Amang Kasuruan eng kaupusan-Na akar turu' i Kristus Yesus eng katalesenan-Na a yaku si tou keli kamesé-meséaan. Wo in taniitu aku mamuali pengaandéan é tou walina sé mengaéma' ing kamesé-meséaan, wosama' séra ka'i ro'na maéman a si Yesus wo makéré ing katouan akar ing kauré-uré. 17Irayoo si Amang Kasuruan! Siao si Colanota akar ing kauré-uré. Sia awéan akar ing kauré-uré, Sia ra'ica kaséréan wo Sia wayake' in esa. Sia itu parayo-rayo wo pasiri-siriin akar ing kauré-uré. Ulit.

En tawoien i Timotius

18Toyaangku Timotius! En tawoien anio' iwééku ai co tanu si ainuwu' i Amang Kasuruan a sé jamaat andumoro' ico, wosama' ko ang karapi i nunuwu' itu raméjinmu am paraméjian loor ang karapi i maéman wo in até weresi. 19Ico ka'i musti tatap maéman a si Apo' Yesus karapi in até weresi wo le'nas. Ampa'paan awéan tou ra'io mengakiit in até weresina akar em paémanen éra materi. 20An uner éra awéan si Himeneus wo si Aleksander. Séra in dua itu aisarakankuo a si kikiiten é sétang. Niéma'ku in taniitu wosama' séra mape'dis e maojat i ngaran i Amang Kasuruan.

Currently Selected:

1 Timotius 1: TNT

Highlight

Copy

Compare