1 Korintus 14

Eng kamang tatambér sé ro'na méé ing kaketeran a sé jamaat

1Poo-poow, musti raméjin iow mengaupus a sé tou walina. Musti raméjin iow ka'i makéré ing kamang tatambér asi Roh Le'nas owo, eng kataré-taré kamang tatambér makua in taar i Amang Kasuruan. 2Wo si tou maroma' mapaké i nunuwu' i Roh, sia itu ra'ica maroma' a sé tou taan maroma' a si Amang Kasuruan. Ra'ica wana esa tou ka'i e ro'na makaangé in sapa sé ipakuana, ampa'paan e Roh Le'nas méma' sia ro'na makua en andumoro' si ra'ica kailekan é tou. 3Taan sa si esa tou awéano kamang tatambér eng kumua in taar i Amang Kasuruan, ipakuana en itu a sé tou e méé ing kaketeran, méé kaincayaan wo sumina'u iséra, wo ka'i mibor iséra. 4Si tou maroma' ang karapi i nunuwu' i Roh, sia itu asalo mawéé kaketeran in owakna in esa. Taan si tou makua in taar i Amang Kasuruan, sia itu mawéé kaketeran a sé jamaat.

5Arui aku sa kamu im baya ro'na manuwu' a nunuwu' i Roh. Taan lébépé' loor ka'i sa kamu ro'na makua i nunuwu' i Amang Kasuruan. Ampa'paan si tou makua i nunuwu' i Amang Kasuruan en lébépé' awéan katoronaan wopé'taré si tou maroma' mapaké i nunuwu' i Roh si ra'ica kaangéan é jamaat. Taan sa si tou maroma' mapaké i nunuwu' i Roh wo ituturna sapa eng kaangéan i nunuwu' itu, en itu awéan katoronaan a sé jamaat.

6Anaé é poo-poow, sa aku maai ai camu wo maroma' mapaké i nunuwu' i roh, en itu ra'ica wana en toronana ai camu. Lébé awéan torona sa aku makua i nunuwu' sapa si aicua i Amang Kasuruan a yaku kuma'pa eng kakailekan andumoro' i Amang Kasuruan, kuma'pa kumua in abar asi Amang Kasuruan owo, kuma'pa sumusui icamu. 7Yandéku mai im pakakas i musik sé ra'ica nimu'kuran, tanumai peloit wo kecapi. Sa sengon kuma'pa téngén é tou wo ra'ica makiit wutul i not ing kakantaren, tumambisa sé tou malinga ro'na makailek ing kakantaren itu? 8Awéan andéan walina ka'i tana'i: sa en terompét sinengo ra'ica metu'tul en téngéna, ra'- ica wana suraro tumu'tul in owak e mangé merang. 9Taniitu ka'i kamu, sé maroma' mapaké i nunuwu' i Roh. Sa sé nunuwu'mu itu ra'ica kaangéan, tantu ra'ica kaangéan é tou walina sapa em pakua miow. Sé ipakua miow itu ra'ica wana en toronana, tanuoka maroma' an deges. 10Awéan kelian nunuwu' asi cayo'baan anio'. Taan ra'ica wana mandé esake' nunuwu' sé ra'ica makaanu ing kaangéanna. 11Sa awéan tou maroma' ai cita wo ra'ica kaangéanta e nunuwuun ipakuana, tantu icuana kita tou manangkéi, taniitu ka'i sia, tantu icuata sia tou manangkéi. 12Tanu siituo ka'i kamu in esa, kamu irumaméjio makéré ing kamang tatambér i Roh Le'nas. Taan eng kumataré-taré kamu musti rumaméji maké ing kamang tatambér itu e méé ing kaketeran im paémanen a sé jamaat.

13Ampa'paan in ituo, si tou maroma' mapaké i nunuwu' i Roh, sia musti sumombayang a si Amang Kasuruan wosama' sia ro'na tambéranai ing kamang makua ing kaangéan i nunuwu' i Roh itu. 14Ampa'paan sa aku masombayang mapaké i nunuwu' i roh, e rohku ulit masombayang, taan e ngaasku ra'ica icumiit. 15Anaé, sapa si musti émaanku? Si anio' en émaanku: Yaku ro'na sumombayang a rohku owo maké nunuwu' i Roh, wo ka'i aku ro'na sumombayang maké i nunuwuun si ro'na kaangéan i ngaasku. Wo aku ro'na kumantar a rohku owo, wo ro'na kumantar maké i nunuwuun a ngaasku owo. 16Ampa'paan sa kamu kumua makapulu'sama' a si Amang Kasuruan asalo mapaké i nunuwu' i roh a roh miow in esa, wo sé tou am bitu ra'ica makailek ing kaangéan i nunuwu' i roh miow itu, tantu ra'ica kiim éra kumua ‘ulit’ ampa'paan ra'ica kailekan éra eng kaangéan sé ipakua miow. 17Mandé ka'i en sombayang makua i makapulu'sama' a si Amang Kasuruan sé aicua miow itu loor keli, taan sé pakua miow itu ra'ica méé kaketeran am paémanen éra ampa'paan sé pengakua miow ra'ica kaangéan éra.

18Yaku kumua makapulu'sama' a si Amang Kasuruan, ampa'paan pendamenku in esa aku lumébémai wo icamu im baya mengaroma' i nunuwu' i Roh. 19Taan am pali'usan i maapo' a si Amang Kasuruan, casalé'ku keli makua lima nuwu' sé ro'na ka- angéan é tou, wotaré mapaké mariwu-riwu nuwu' a nunuwu' i Roh. Lébé icasalé'ku taniitu wosama' ro'na susuianku sé tou.

20Poo-poow! Tioo em pakawerot iow tanuoka sé toyaangé' teké', wo mamualio toyaang teké' andumoro' ing kaléwo'an. Taan em pakawerot iow musti mamuali tanu in tou wangkoo. 21#Yes. 28:11-12 Ang Kitap Le'nas aipatic in tana'i, “Icua-Ku oka a sé tou-Ku maké sé tou manangkéi sé mapaké i nunuwu' é tou imanangkéi, mandé in taniitu sé tou-Ku ra'ica kiim luminga Yaku. Si anioo en Taar i Casuruan.”

22Anaé tana'i: Sa awéan tou tinambéranai ing kamang maroma' mapaké i nunuwu' i roh, en itu tanu tuus ing kawasa i Amang Kasuruan a sé tou sé ra'ica maéman, ra'ica a sé tou maéman. Taan awéan tou tinambéranai ing kamang makua i nunuwu' i Amang Kasuruan, en itu tanu tuus ing kawasa i Amang Kasuruan a sé tou maéman, ra'ica a sé tou sé ra'ica maéman. 23Anaé, sa pakasa sé jamaat mali'usai mewali-wali esa wo si esa tou sé maroma' mapaké i nunuwu' i roh, wo muntepai ka'i sé tou ra'ica maéman kuma'pa sé tou ra'ica makailek andumoro' ing kamang tatambér i Amang Kasuruan, tantu cua éra kamu itu tou sé malicokoo e ngaas. 24Taan sa kamu im baya sé an jamaat ang karoro'an makua in taar i Amang Kasuruan wo muntepai sé tou ra'ica maéman kuma'pa ra'ica makailek andumoro' ing kamang tatambér i Amang Kasuruan wo linganna waya sé ipakua miow, niéma'tao si tou itu manesel ing kamesé-meséaan an aténa wo pawerotenna sia patus makéré ukuman. 25Sé pakaenepna an untep in aténa kaséréan oka sa, akar iko'kosna en owakna wo kumundu maapo' a si Amang Kasuruan wo kumua, “Ulit! Si Amang Kasuruan an uner iow.”

En atoran am pali'usan é jamaat

26Anaé é poo-poow, sapa eng kaangéan im pakasa in itu? An tutuw iow mali'us mewali-wali i maapo', awéan sé tou makantar ing kakantaren marayo si Amang Kasuruan, awéan sé tou masusui, awéan sé tou makua i nunuwu' i Amang Kasuruan, awéan sé tou maroma' mapaké i nunuwu' i roh, wo awéan ka'i sé matutur ing kaangéan i nunuwu' i roh itu. Musti émaan iow pakasa en itu en sumusui wo torona ing kalooran iow im baya.

27Wo sa awéan tou maroma' mapaké i nunuwu' i roh, lébé loor sa wayake' in dua kuma'pa ra'ica lumébé in telu tou e maroma' wo ra'ica toro ka'i mewali-wali manuwu', taan musti maesa-esa maroma'. Wo musti awéan ka'i esa tou matutur ing kaangéan sé ipakua éra itu. 28Taan sa ra'ica wana tou e ro'na kumua ing ka- angéan i nunuwu' i roh itu, aweso taré si tou maroma' i nunuwu' i roh itu menes, am pali'usan an jamaat itu. Séra ro'na rumoma' i nunuwu' i roh itu a si Amang Kasuruan, an untepke' in até éra in esa.

29Taniitu ka'i wo sé nabi, lébé loor wayake' in dua kuma'pa telu tou ai séra eng kumua in taar i Amang Kasuruan wo sé tou walina oka manilai sapa em ipakua éra itu. 30Taan sa awéan esa tou ang karoro'an i makalukut am bitu tumarépé'anke'mai pinapaturu'an eng kumua i nunuwu' i Amang Kasuruan, si tou ang karoro'an maroma' musti mento' owo maroma'. 31Wo in taniitu, kamu im baya si esa wo si esa ro'na kumua i nunuwu' i Amang Kasuruan wosama' pakasa en tou an jamaat ro'na susuian wo em paémanen éra ka'i makaketer. 32Sé tou winéanai kamang tatambér mamuali nabi, séra ro'na kumawasa in owak wo kumawasa sé iparoma' éra. 33Ampa'paan si Amang Kasuruan ra'ica masalé' ing kalicokoan, taan en icasalé'-Na kaeluran.

34Meputé sé pengaémaan é tou le'nas am pakasa in jamaat, si wéwéné makapeneso mio' an tutuw i mali'us mewali-wali wo sé jamaat i maapo'. Séra ra'ica winéan kaloasan e rumoma'. Séra musti kumuru' in owak, tanu si aipatic an ukum Torat. 35Sa séra masalé' makailek in sapa-sapake', musti wuéien éra a si penanaan éra am balé. Ampa'paan kalawiin keli sa sé wéwéné manuwu' tutuw éra am paapo'an.

36Paweroten iow réén en Taar i Amang Kasuruan mai ai camu owo? Kuma'pa ai camuke' réén en Taar i Amang Kasuruan itu ipakua-kua? Tantu ra'ica. 37Sa awéan tou makapendam makaanu ing kamang tatambér mamuali nabi kuma'pa tatambér walina i Roh, musti kakailekanna sapaoka sé aipaticku anio' uli-ulit perénta i Apo' Yesus. 38Taan sa awéan sé ra'ica kiim tumerima sapa sé ipakuaku anio', sia ka'i ra'io sangali wéan iow rékén.

39Ampa'paano in itu é poo-poowku, rumaméjio mauli-ulit wosama' kamu ro'na tambéranai ing kamang makua i nunuwu' i Amang Kasuruan, wo tioo pengapéron sé tou tinambéranai ing kamang maroma' i nunuwu' i roh. 40Taan an tutuw kamu maapo', eluren iow sumama-sama' pakasa en itu, oréoka malicoko.

Currently Selected:

1 Korintus 14: TNT

Highlight

Copy

Compare